1 10. СИДЯ-ПЭ-ТЕР
2 Сидя-Пэ-Тер таня Няв-Некав, няв несавэй.
3 Нябав Не-Тасиняңы.
4 Нябан ңацекыда юңгу.
5 Такы хавна Недко-Папав таня.
6 Маняˮ мякананаˮ тет ненэцяˮмаˮ.
7 Ты илебцоваˮ юркад яңгня самбляңг юˮ, тад тикахад Нябан вадарта луца юˮ хурёда.
8 Няби хэвняʼ моʼнаван харваʼ.
9 Луца юˮ хурёда нябиюмʼ пеля ялринда нохо, тэравы нохо, няби пеляда ялринда тэравы тёня.
10 Недко-Папани ңани юˮ хурёда.
11 Ңобтикы вада: тэравы нохо, тэравы тёня.
12 Тад тикахад мань вадартами юˮ пя хан: няби пелядуʼ ялринда париденя тёня, няби пелядуʼ ялринда сеңг нохо.
13 Тад тикахад ңопой илеваваʼ ни ңаˮ, сидя илеваваʼ ни ңаˮ.
14 Сяˮны ңэбту ңодˮ пэвсюмняна ед пина, Няв-Некав ваˮаванда ямбʼ серʼ халцана, пинна едмʼ ңатесь.
15 Не-Тасиняңы едамда пиреби, тумда пятамби.
16 Няв-Некав нендя ңэбт еси сянакуˮу.
17 Не ңэвы нерцюй, Не-Тасиняңы ңэбт варде, не тарем ма:
18 - Хурцада ңэвы, нюдя ңа нись ңа.
19 Мэманда ваданда танябʼ тяхакуд мэдадава.
20 Няв-Некав тикы вадамʼ намда пурцерйˮ.
21 Пыда ма:
22 - Ненэсябтванда мэдами вадами таня.
23 Не-Тасиняңы-Пухуцяв, вадами тям: Юˮ-Тасиняңы сэвду ңадимя, тад ңод ңэсь ңо Не-Тасиняңы, Не пивасялма, Не панэсялма.
24 Тасиняңы янʼ мюсе хэсь харвамʼ.
25 Тикы вадамʼ намда Не-Тасиняңы-Нябав-Нея тарем ма, пиняку паңгабтей:
26 - Тасиняңы яхана ңамгэмʼ пявнаваˮ?
27 Тасиняңы я - я ңаврёй ңопой-сидя ңэвахана.
28 Тад ңо, ңэсь ңо тэвваʼ юркад вата самляңг юˮ.
29 Сава хамаду таня, вэва хамаду таня.
30 Харта пивадамда, панэдамда сэда ныхында янгобˮнанда - таня ханьямд!
31 Тадькад Няв-Некав пинякуʼ панамйˮ, иканда ңэсонда лакадаванонда.
32 Няв-Някав пыда тарем ма:
33 - Не сарёңэ мундваханʼ нидамзь намдˮ.
34 Хувыняна ямдаңгунаˮ.
35 Ңаворˮмахананаʼ хара яңгу, хонаʼвахананаʼ хара яңгу.
36 Хонаядʼ.
37 Ңарка нумгы тидхалкава, Няни-Некани пихи пихиня пяда яңгаценда юхуна латанʼ пехэдаванонда.
38 Тикымʼ намда мань пэвдя мякана мальцями серадмʼ, пинʼ санаювˮ.
39 Нябав-Нея тумда пятада.
40 Маниʼ едмʼ пинван няхарˮ юˮ ханми харв паңг нимня вэңгалэйниʼ.
41 Тикына малесь мятʼ тюниʼ, орңаниʼ.
42 Ңаворць малесь, пинʼ санэйниʼ.
43 Ханониʼ малейниʼ.
44 Сидя не - няби Нябами, няби Недко-Папами сидямбой хаяхаʼ, мятиʼ хаˮмы.
45 Тад тикахад мань юркад, вата самляңг юˮ тэми маʼлаванзь хаямʼ.
46 Тыниʼ мятʼ танайн, ёркалъянаˮ, ханонаˮ пуйдайнаˮ.
47 Ханонаˮ, мюднаˮ подеръянаˮ.
48 Малʼ малейнаˮ.
49 Няв-Некав ңудонда ңэдалайˮ.
50 Тикавахад Не-Танисяңы вэсаконда пумна манзабтада.
51 Мань танырңадмʼ.
52 Тадикахад тад мюселманаˮ Ңарка-Пай-Хоймʼ сябтʼ мадаваˮ.
53 Ңарка-Саля-Явмʼ сябтʼ мадаваʼ.
54 Явмʼ мадаˮмаданаˮ хой недарманʼ хаˮмынаˮ.
55 Наңэдя сыраʼ ямбан мюсеваˮ, нумʼ нарэйңэ хая.
56 Хармыдонаниʼ сыра холкаˮлыˮ.
57 Нерденя сарё сэв хаˮмыˮ.
58 Тарем сырңадмʼ: нерняʼ хой ниня юˮ ябта мяˮ.
59 Тад тикахад ими ядэрңа:
60 "Хад ңод ңэдакы Юˮ-Тасиняңы мядˮ".
61 Некав мядоʼ ңадъянʼ ңэсолкулвы.
62 Пыда таремʼ ма:
63 - Мяʼ лаʼ серта тара.
64 Мань мядонзь хантамʼ.
65 Маняˮ хаиваˮ.
66 Мань Некав мядоʼ няюʼ ңэдалайʼ.
67 Маняˮ мяʼма сертаваʼ.
68 Няв-Некав ёльцянда ёльце мяканда то.
69 Тиканда хонавахананаʼ хара яңгу, хувыняна юркынаʼ вуни хара яңгу.
70 Некав ембы, пинʼ тарпыʼ.
71 Пинʼ тарпыʼ, синяңгы ханда ниʼ ңамдывʼ.
72 Мань ембывʼ, пинʼ тарпывʼ, Некани хэванʼ ханʼ ниʼ ңамдывʼ.
73 Яля ерʼ ңэсонд маниʼ хано ниня ңамдыниʼ.
74 Яля ерʼ пиркана вэнекоˮ тёреядˮ.
75 Нёʼ няюʼ юркад яңгня самляцг юдʼ тэниʼ пиняювʼ сэвав хая.
76 Юркад яңгня самляңг юˮ тэниʼ пиняңы хэвхана ңока ңэдалёда.
77 Толырканда тола юʼ ңэдалёда.
78 Тасиняңы-Ерв нята нерде.
79 Юˮ-Ңэдалёда пелейдуʼ сую сырэй, сую нямна.
80 Таремʼ маниеян: юркад яңгня самляңг юˮ тэниʼ понд пакалъядˮ.
81 Таремʼ инзеледмʼ, Тасиняңы-Ерв пыда мамонода:
82 - Хэй, тюку тыни ңаркарка ңэвы!
83 Сую ңэбнанду намна хора ңар, сую сырэй нензады ңар, тикахад намда нермнанду сидя сие ңар, сидя си ңэбнанду сиʼив сии менаруй ңар!
84 Тасиняңы-Ерв ңаниʼ мамонода:
85 - Хэй, ханя тарця ңа, пэй ты ним ңа!
86 Юˮ-Тасиняцы ханонаˮ маланʼ тэйвыдˮ.
87 Тасиняңы-Ерв ханонаˮ мание, ңаниʼ таремʼ ма:
88 - Хэй, тикы ханонаˮ ңани ңаркарка ңэвыˮ.
89 Тад тикахад ңаниʼ мамононда:
90 - Хэй, ханяʼ тарця ңаˮ, пэй хан ним ңаˮ!
91 Тад тикахад хэвхани нултадуʼ.
92 Неновна лаханако вададу юңгуʼ, ты мание, хано маниеʼ:
93 - Хэй, тюку тыд ңарка ңэвыʼ, тюку ханонаʼ ңарка ңэвы, ханя тарця ңа, пэ ты, пэ хан ним ңа!
94 Няв-Некав пыда таремʼ ма:
95 - Нюдя-Пэй-Тер! Янэдод мядимярць тоˮ.
96 Ңаябаддадоʼ яркˮ!
97 Некани-Няни манзь ханʼ ниʼ хаˮмывˮ.
98 Тасмани инямʼ еныни тяхаʼ няʼмав, мальцяни ңуйнам махани мов.
99 Тад тикахад нарони ңылад тынзями тюхулңав, няхарˮ юˮ тибя.
100 Няхарˮ юˮ тибя Неками паңгалмы, сив хора икм тэра паңголома пад ню лэтми.
101 Малмда екав, тынзяни сармикмʼ ңудани тяхаʼ сармикадав.
102 Тыни няюʼ ядалъявʼ, Тасинявна хэвувна тынзями нюхулы.
103 Тыңзями манэць ңаниʼ таремʼ маˮ:
104 - Хэй, тюку тынзя ңаниʼ няңосаркавы!
105 Ханяʼ тарця ңаˮ - пэй тынзя вунив ңаˮ!
106 Юркад вата самляңг юˮ тэни варанʼ тэвывʼ, мань яни мысыˮманаˮ тивни помна ябта сюдмпой тэнрибтав.
107 Тикымʼ намда юркад вата самлянг юˮ тэми ңобтʼ санаядˮ.
108 Мятʼ танэйнˮ, няхарˮ юˮ тибями, пад ню лэтми санюв.
109 Пеңгдани ватамда ңудини хара ниʼ моёв.
110 Юркад вата самляңг юми мяту сидиʼмана нявотарңаˮ.
111 Сэрцюм ты харёда нямдорта, нята вар нямна юрˮ тибявна санарңа.
112 Нята понд ңули ни харваˮ.
113 Тадикахад сёнзяни мюня ненхами то.
114 Хэвувнани юрˮ тибывна сэрцюм ты нялида няңгары.
115 Мань яни мысыʼманаˮ сянри санэювˮ.
116 Ёльцянда тэва, няхарˮ юˮ тибями хаця марць нимня ханелебтев.
117 Няхарˮ юˮ тибями пиня мимбанянда сян сармик мунабц мал толайда.
118 Тынзяʼ сюйрёхоˮ сэрць ты харида нямдорта.
119 Юркад вата самляңг юˮ нянда понд пыяримда сыңыби.
120 Таняна хунанда салтна мярами пыянда тяхама.
121 Ңэварида нялңа.
122 Сэрцюм ты пиня ңэкалңада, няхарʼ тармъев.
123 Няхарˮ сыра надомʼ ярелабтавэдмʼ.
124 Няхарˮ юˮ тибявнани няни нэхэдав, няни тэврав, сэрˮ тюндымʼ таску суюдарев, няби сялңгани мов.
125 Сэр тюнды ңэри вайнорңа.
126 Сэр тюндымʼ минесь хуюмгарт ңэми хад ни ханасˮ.
127 Юˮ-Тасиняңы понд тэврав, вададей тыра павэнда сюмбанʼ дадав.
128 Сэр тюнда ңэда ванораха, индта юңгу.
129 Сэр тюндымʼ ерав, хобамʼ хабарңав, тад тикахад тивнда хаˮаврав, ңаябаддуʼ вэяндуʼ мюʼ маторъян.
130 Тад тикахад ңайбарць ңамдыдˮ.
131 Юˮ-Тасиняңы сабе ңорма нямна вададу яңгу.
132 Сидямбой вадамда саебтамби:
133 - Хэй, тюку тынаʼ ңарка ңэвы, хэй, ханяʼ тарця пэй ты ним ңа!
134 Хану мание ңаниʼ манзетыˮ:
135 - Хэй, тюку ханод нарка нэвыʼ, хэй, ханя траця ңаˮ - пэй ханʼ ним ңаˮ!
136 Мякы мякана ед ханя пи, ңайбарць малесь мятʼ ханя тюʼ.
137 Мань сэр тюндымʼ яхав, ханʼ ниʼ ңарибтев.
138 Мякана мядимярʼ манду малеʼ махадандуʼ пинʼ тарпыдˮ.
139 Няв-Некав тынзянда нэкалңа, няхарʼ хабтмʼ няʼма Пухуцянда хананʼ подеръяда.
140 Пыда ңаниʼ няхарʼ хабтмʼ няʼма, ханханда подеръяда.
141 Тад тикахад ңэдалёдаˮ хаяˮ.
142 Няв-Некав, Нябав-Нея ңэдалёди пумна хаяхаʼ.
143 Маниʼ сидяңэ Не-Ңацекы-Папан няʼ хаиниʼ.
144 Няв-Некав, Не-Тасиняңы няхарʼ яля ямбан сыңгрёди яңгу.
145 Няхарамдэй яля пэвсюмя хонэйниʼ.
146 Хувы няна юркыниʼ, ңаворць малесь пинʼ юркывˮ, тынзями ңэкалңамʼ, няхарʼ тэмукэцямʼ хабтмʼ яркадмʼ, ханхани подеръян.
147 Ңэдалёвиʼ мюмня хаядмʼ.
148 Няби вары мядʼ нёʼ нямна миңадмʼ.
149 Юˮ мякад ңобкад исяда вэнеко ңадиберта юңгу.
150 Вадоʼ ёрканʼ нултав, ханми сярав.
151 Ер мякана инзелебˮнани - ябеня ңэвондуʼ.
152 Нябав-Нея, Не-Тасиняңы сёнда ңардан хыномонода, таремʼ мамонода:
153 - Юˮ-Тасиняңы, не сарыңэ пирми нидя ңаˮ.
154 Ңулиˮ вэваеда.
155 Мань не сары ңэ ибяʼмахани, ваңуˮмаханани Сидя-Пэй-Термʼ ңылнда тэврадмʼ.
156 Юркад вата самляңг юˮ ты тикы мэˮмаханда мась, сидя юˮ хурёда няби пеляду ялри нохо, няби пеляду ялри тёня, юˮ пя хан няби пеляду париденя тёня, няби пелядуʼ сеңг нохо ңамаханда мась, мэˮмаханда мась.
157 Сянди тяхамна недамдаʼ тадмʼ.
158 Мань тенева Сидя-Пэй-Тер сиддиʼ пюванда, яркы нядиʼ юңгу хибяхарт.
159 Тарць харахана хада вэвахамʼ.
160 Тарем сырпани - Тасиняңы-Ерв мяʼ ну паханзавэй манзада, ну паханзавэй мазадавамʼ манэць, ямбри еңгахана мядʼ няʼ ядалъявʼ.
161 Нёмʼ няʼмав.
162 Тюку мэв вэнекодарев, нябири сэвми хая мядʼ мюня.
163 Таремʼ маниебʼнани: Няни-Некани тавада ханимя нёʼ сыран.
164 Мятʼ нидмʼ тюˮ, та минни ханхани парумба хаямʼ, инями вэрдамʼ, мякани хаямʼ.
165 Мякани тэвывʼ, ханми ңэдав.
166 Мань мадмʼ:
167 - Недко-Папав, еддами пиреʼ, ңавортаниʼ.
168 Пудана ңаворʼмамиʼ, тедаʼ хава.
169 Недко-Папав едда ханя пиʼ, тедада хыдяʼ мюʼ, маниʼ ңаворңаниʼ.
170 Мань мадмʼ:
171 - Недко-Папав, хась мэмдар панэр серʼ, пибид серʼ хась мэмдид.
172 Мань хась мэмдини пибини таˮ, мальцями таˮ.
173 Недко-Папав паныда серыда, мани пибини тайда, мальцями тада, маниʼ ембъяниʼ.
174 Ембаць малесь мань таремʼ мадмʼ:
175 - Теда хантаниʼ, сидя ңэни ниня, хаˮмами ңэя.
176 Тад тикахад мань таремʼ мадмʼ:
177 - Ты яебтярˮ.
178 Ңамзиʼ ңэниʼ ниня варцядтемиʼ.
179 Яля, сив яля маниʼ яданиʼ.
180 Сибимдей яляхана пуни няюмд тёр хэбехама.
181 Марцони нимня пу няʼ сылывʼ - Юˮ-Ңэдалёда.
182 Юˮ-Ңэдалёда ңынодуʼ тёндерʼ няр мэвыдуʼ.
183 Тасиняңы-Ерв таремʼ маманода:
184 - Хэй, мэвандами неми хуʼ хунтамбирˮ?
185 Ими ядэлы:
186 "Ңаванда ңод ненэй ябсявэд, яб танявы ңэвда, нумгарт хадумьись".
187 Тад тикахад тарця имʼ хаˮавра, ибанда няд няли хадңэ нялпадада.
188 Юˮ-Тасиняңы ңопой тёрдуʼ сив яля ямбан, Юˮ-Тасиняңы таремʼ минзетыʼ хадандуʼ поңгана:
189 - Хэй, мэвандаваʼ неваʼ хуняʼ хунтамбир?
190 Ихинян мадмʼ:
191 "Иба хадхана сяняʼ ёхода, ңэрм хадңэ, тецьда халңэ ладвы ңэбта - сава ңэись."
192 Тарця имʼ хаˮавра ңэрмда няд ңэрм хадңэ тецьдасавэй паңгрибтада Ңудамʼ вэңгала - ңуда ни ңадюʼ.
193 Яля, сив яля ңаниʼ тёрдуʼ со.
194 Сив ёльцңгана сюрмбадаханиʼ пендляʼ харанʼ еремяниʼ.
195 Хыняхарт сюрхалць хэсь яда юңгу, та минниʼ пендля ваңганʼ мантэйниʼ.
196 Пендля варанʼ сидниʼ та ёˮоʼ.
197 Хаддиди поңгана Тасиняңгы-Ерв ядˮмами пюванода.
198 Пыда мамонода:
199 - Ядˮмада хыняхартана яңгу.
200 Маси мантэнакы пендляʼ ваңганʼ?
201 Ёльценда ёльце, хад савумда.
202 Тасиняңы-Ерв тарем мамонода:
203 - Юˮ-Тасиняңы, харта теневараˮ пендˮмянда юˮ таркада.
204 Пендˮмянда тарка мал савумбовна лэтмбидаˮ!
205 Хонаранара яңгоя.
206 Мань ңаниʼ пендʼмяни нявмʼ лэтмбаңгудмʼ.
207 Тякандуʼ Юˮ-Тасиняңы пендʼ мю малхаʼ хэбянадуʼ.
208 Тасиняңы-Ерв пендˮми няванʼ хабяңода.
209 Сив яляʼ ямбан Юˮ-Тасиняңы пендˮмяʼ малхана ңопой тёрдуʼ.
210 Тасиняңы-Ервнда пендʼмя нявхана ңобтикы ңопой тёрда.
211 Ңобоʼ манзеты:
212 - Юˮ-Тасиняңы, яңгодара яңгоя!
213 Тюкумʼ намда Юˮ-Тасиняңы хай тёрңэ тёрсетыдʼ.
214 Сиʼив ёльцянгана хад ңэвадэй.
215 Ңобтʼ маʼлёвандуʼ, лаханаковондуʼ, хонёдаваʼ сив яляʼ ямбан ңобˮ юңгу.
216 Тасиняңы-Ерв, пыда таремʼ ма:
217 - Хынямна ңэдарабтаваˮ?
218 Ңацекые, хаядаˮ, пендʼмята малʼ ңаниʼ лэтмбидаˮ.
219 Мань ңаниʼ пендˮмя ваңг тухуˮ.
220 Няванда няд нарэхэна сырамʼ сидерпа минреңгувʼ.
221 Тиканда Юˮ-Тасиняңы хэбяңодуʼ.
222 Тасиняңы-Ерв пендˮмянда няванʼ хэбяңода.
223 Пендʼмя нявахад сырамʼ сидерпа миˮманода.
224 Ңавэʼ ёльцяңгана нини тэввонда, икни харавна ензя наря хырнарида то.
225 Наре тохова ензя наремʼ сэхэркаданда ңулиˮ мэёвна няˮмав.
226 Тасиняңы-Ерв ңэкалпаванода, сян ңэкалпата переня пярха.
227 Та ёльцңгана Тасиняңы-Ерв таремʼ мамонода:
228 - Юˮ-Тасиняңы, талякуʼ тодаˮ, сеня ңавнанда ибэй табʼ ниʼ сыра хаˮамвы.
229 Синзибэй нарями табанʼ нимней.
230 Юˮ-Тасиняңы тованодуʼ, тюрмʼ ңэкалпа пяванодуʼ.
231 Ңулиˮ мэёвна мань няˮамбив.
232 Сян нэкалпатуʼ Юˮ-Тасиняңы тюр переня паха.
233 Ңамгэ ёльцяңгана Тасиняңы-Ерв ма:
234 - Ңацекыеʼ, ханани мюй тыбкаваʼ ходаʼ, тюрмʼ мадараʼ, наре хаёя.
235 Наремʼ таʼ хобцакэваˮ.
236 Тыбкамʼ тованодуʼ, тюрмʼ мадавонодуʼ, тюрмʼ мадаʼмахадандуʼ Юˮ-Тасиняңы хэбянодуʼ.
237 Сыңгрёсялма.
238 Сыра ваңгхад тюрмʼ сидяняʼ сюртамбив, сыра сидяʼнама тикы сивняʼ тюрувна танайвˮ.
239 Яля явнанда ңадимядмʼ.
240 Мань тарпˮмахадани мадмʼ:
241 - Недко-Папав, наре сэхэркаданда ңулиˮ мэёвна няʼмад.
242 Мань сит нэкалтамʼ.
243 Недко-Папав наремʼ сэркаданда няˮмада, мань нэкалңав.
244 Недко-Папав тюʼуй яляханда тэвравʼ.
245 Таремʼ сырңаниʼ - ңадьда яхананаˮ хибяхарт юңгу.
246 Юˮ-Тасиняңы мякандуʼ хэйвыˮ.
247 Тедаʼ хыняʼ хэбʼнанди ямʼехэрамиʼ.
248 Ненэцямʼ хобˮнаниʼ - ненэциедуʼ ехэрайниʼ.
249 Илесь ядʼми ханяхартад ниниʼ хоңгуʼ.
250 Вэва ңэбʼнанда, сава ңэбʼнанда мяканиʼ хэхэниʼ.
251 Мяканиʼ тэвыниʼ.
252 Мяˮмиʼ ңахат яхананда паллавы.
253 Юркад вата самляңг юми мятуʼ сидя хэвхана хадырңаˮ.
254 Мяканиʼ тэвыни, Недко-Папав едмʼ пире, едмʼ ңаманиʼ.
255 Пинʼ санаювˮ, няхарˮ юдʼ ханмʼ сидя мюдңэ вэтаңахаюн.
256 Тыни маˮладмʼ, Недко-Папав мята хаˮавра, ёркаланиʼ, мюд пуйданиʼ, подеръяниʼ, манзаданиʼ - сеней туˮма неда мюмня.
257 Няхарˮ яля мюсейниʼ, ңопой нись ңэсуʼ.
258 Няхарамдэй яля пэвсюмбняна тёр хибяхаˮма пуня няюмд.
259 Марцьни нимня пуняʼ сылывˮ - Тасиняңы-Ерв нята нерде.
260 Ңынмда тюрңэ мэʼэда.
261 Ңопой вадада:
262 - Хэй, мэвнанда неваˮ хыняʼ хунтамбир?
263 Тарця тёрмʼ намдась нултавʼ.
264 Недко-Папав ирмняни то, нултада.
265 Мань мадмʼ:
266 - Недко-Папав, панэр екад, мань мальцями серʼ.
267 Пибид, екан, мань пибини серˮ!
268 Недко-Папав панэмда екада, пибида екайда, пыда мань мальцями сера, пибини сера.
269 Тад тикахад мань мадмʼ:
270 - Недко-Папав, ханми тиʼ, мюдми тиʼ.
271 Мюсеˮ, ңахакуна хэˮмяхаданд - ңысуˮ.
272 Недко-Папав хасавадревʼ инямда няˮма, манзабтада.
273 Мань Недко-Папами пумна неданда мюмңя, сэрˮ янсавэй ңавка хабтми ңартиʼ иняда тет ңэнда помна нюхулимбида.
274 Мань ной писуʼ ниня няр юʼ харценадмʼ.
275 Янамбовна мань миңадмʼ.
276 Тасиняңы-Ерв иня няңы хэвувнани то.
277 Нернякуна сидя-нярˮ тибя ёльцянд нултада.
278 Сэрˮ янзавэй ңавка хабтми Тасиняңы-Ерв ханʼ хэванʼ нултада.
279 Тасиняңы-Ерв сэрˮ янзавэй ңартеңы инямʼ няˮмада, малмда иканда тяхаʼ сярада, вэняңы ханда ңэнʼ сярада, няби малмда.
280 Тасиняңы-Ерв пыда тарем ма:
281 - Нюдя-Пэ-Терʼ хананада юңгу.
282 Таня хэйя!
283 Маняˮ тедаʼ неваˮ ханаңгуваˮ мякана.
284 Неда мюмня пуʼ няюʼ сюрхалъянаˮ.
285 Сиˮми вада хана.
286 Сянад миндякэваˮ ңэдалёвандуʼ мюня яха танявы.
287 Тасиняңы-Ерв лаңганʼ тэва нултада.
288 Сэрˮ янзавэй инямда екада, ңартиңо инямда малмʼ няни тада.
289 Пыда хая.
290 Ханамда яхаʼ тяханяʼ хана.
291 Таняд яда то.
292 Тасиняңы-Ерв сэрˮ янзавэй ңартиңы инямʼ сёхотата няʼмада.
293 Пыда тарем ма:
294 - Тасиняңы, ханяна хаедаʼ?
295 Хан ңэдадаˮ.
296 Ханона пыяк нёя ланзедуʼ.
297 Юˮ-Тасиняңы хано пыяхаʼ ңопойлад лабцейдˮ.
298 Тасиняңы-Ерв сэрˮ янзавэймʼ ваʼлңада Ңаниʼ намдахана яханда хаˮмода, туйпа ңэйвы.
299 Сэрˮ янзавэмʼ салик савак лабиде нивув.
300 Сэрˮ янзавэй сяˮны тарем пэрмы?
301 Сэвнда лэнʼ естеба сэрˮ янзавэй лэрада ңэвы.
302 Тад нэкалманда Тасиняңы-Ерв пындё хаˮмыˮ.
303 Ханни хэвувна пыньдена хаи.
304 Ензя наремʼ харта наремда ханʼ вэʼ няд вэрда нивув, панда ңылмна ензя наремʼ ңэдара нивув.
305 Ензя наре Тасиняңы-Ерв сивняʼ хырнарида хае.
306 Тасиняңы-Ерв индакартада юңгу.
307 Тасиняңы-Ерв хадаʼмахадани Юˮ-Тасиняңы ңопой нареханани малʼ хадайн.
308 Тад тикахад мюдми ханни мювна хаˮаврав, не хан мэць ңэдалёбиту мюмня хаядмʼ.
309 Тасиняңы мякаˮ тэйвывˮ.
310 Не-Тасиняңы нябами няˮмав, лясабтав.
311 Мань мадм:
312 - Не-Тасиняңы-Не-Нябами, пыдар вэва.
313 Манась: юркад яңгня самляңг юˮ тымʼ тэврам, Сидя-Пэй-Термʼ ңылнда тэврадмʼ, сидя юˮ хурёда няби пеляду ялри нохо, няби пеляду ялри тёня, юʼ пя хан няби пеляду париденя тёня, няби пелядуʼ сеңг нохо тэврадмʼ.
314 Тедаʼ Юˮ-Тасиняңы хадавэдаˮ.
315 Пыдар ңобтаремʼ хаңгун!
316 Мань Не-Тасиняңы-Нябами ңэваханда лададмʼ, индта юңгума, ха.
317 Тад тикахад мюдамда вэта, неданда мюмня хая.
318 Тайна хыняна Недко-Папами ңэсовы, мюднда ңэда.
319 Навраʼмахадандиʼ хонаяхаʼ.
320 Хуняна юркъяхаʼ.
321 Тедахава сян яля миннакэхэʼ.
322 Минвамдиʼ ёльцеˮмахадандиʼ сеней тумандиʼ недандиʼ мюмня мюселъяниʼ.
323 Тад тикахад ңамгэри харамʼ нись мэсʼ явмʼ мадарңахаʼ.
324 Явʼ мадаˮмахадандиʼ Пэʼ-Хоймʼ мадаңахаʼ.
325 Пэʼ-Хойʼ тяханаңы тэланʼ мята мярадаʼ.
326 Теда тюку яляʼ ңэсондʼ Пэйʼ тэлхана иленакэхэʼ.
327 Та валакада.