1 6. СЯНДЁ ЕВАЛЁ
2 Сяндё-Евалё мяквада мята тас юрˮ мята, юрˮ ңацекэда.
3 Тэхэвадоʼ тэдоʼ вада нида хоˮ.
4 Падроко-ңаць мякнандоʼ ян няхарпод.
5 Тамна таневы Нябакоʼяда, тамна таневы Не-Хабисяда.
6 Падроко-Ңаць ялехэʼ тебтэхэʼ хонюсеты.
7 Сяˮны ңэбта ңоˮ пихий пихина мядʼ сиңгана ңэʼ мунˮ товонда.
8 Ханя ңэдакы Евалё-Сусой.
9 Евалё-Сусой пыда таремʼ мамононда:
10 - Падроко-Ңаць, мэсь хонювахаˮ!
11 Понʼ хонын.
12 Тюʼуняʼ ңаˮ!
13 Тарця вадахаʼна Падроко-Ңаць ңамда харнамйˮ, таремʼ ма:
14 - Нябако, панэдами таˮ, пивадами таˮ!
15 Нябакоˮяда вадаʼ мальңгана нихивась ңаˮ, ханзонда няд пиби, паны тюхулңа.
16 Тикавахана Падроко-Ңаць пинʼ тарпыˮ.
17 Еволё-Сусой пыда таремʼ ма:
18 - Сит нелесь таран.
19 Тедаʼ хантаниʼ Паңгдё янʼ.
20 Паңгдё-Ерв недкода Нюда танева.
21 Мири хэбилема, ңэв салвома.
22 Евалё-Сусой мале ты танавы.
23 Евалё-Сусой сидя сюндымʼ ты подермы.
24 Мале ңэдалэйˮ, хадрида хая.
25 Сяндё-Евалё сяндамда тыда подерпи, янабоковна ты вэнусоби.
26 Падроко-Ңаць янабоковна ңок ты няʼ миңа.
27 Евалё-Сусой тыʼ вархана таня нувы.
28 Падроко-Ңаць та тэвыˮ.
29 Тикавахана Евалё-Сусой пыда таремʼ ма:
30 - Падроко-Ңаць, нён хаюрˮ, Паңгдё ядоʼ саць хубта.
31 Евалё-Сусой ңаниʼ ңэдалэйˮ.
32 Ханда ябцохона поңгой хадда сюра.
33 Сидя сюндада сава ты ңэвы.
34 Падроко-Ңаць ңодˮ, пыда ңо тет падвэда пуй тёндеркад пыидуʼ падлыˮ.
35 Сяʼны ңэбта ңоˮ Евако-Сусой пыда таремʼ ма:
36 - Падроко-ңаць, тальняʼ инзелеˮ.
37 Паңгдё-Ерв пыда таремʼ манда:
38 "Ңамгэ серв еˮэмня ядэрпатиʼ?
39 Яриʼ хубтасинюˮ".
40 Маниʼ тюңгуниʼ матʼ, мань мандамʼ:
41 "Тэрико маниʼ мядуман серˮ ңэдалёрңаниʼ".
42 Паңгдё-Ерв нибʼнанда таˮ, мань мадм:
43 "Тыниʼ вэваценюˮ, пэбтанакыˮ.
44 Пинʼ хантамʼ, ханун хамадаңгумʼ".
45 Пыдар санаин, СэдоранаН емʼ сяланд ваңганʼ мэир.
46 Ңавоʼ пиркаʼна тэвыхыʼ.
47 Паңгдё-Ерв пыда таремʼ ма:
48 - Ңамгэ серв еʼэмня ядэрпатиʼ?
49 Яриʼ хубтасенюˮ.
50 Евалё-Сусой пыда таремʼ ма:
51 - Тэрико маниʼ мядуманзь серˮ ңэдалёрңаниʼ.
52 Паңгдё-Ерв пыда таремʼ ма:
53 - Мядоʼмахава вэва вуни ңаˮ.
54 Паңгдё-Ерв Пухуцянда ярейˮ, пыда таремˮ ма:
55 - Луца ңавонаваˮ яңгусав ңамгэ?
56 Пухуця ханя тюленакы.
57 Тиканда идарць пядуʼ.
58 Евалё-Сусой пыда таремʼ ма:
59 - Паңгдё-Ерв, тэри вунисяниʼ туˮ.
60 Недконд Нюнд еʼэмня туˮ нисяниʼим.
61 Талимна ңэвамда, тяхамна ңэвамда ңулиˮ намдхава, сападабʼнаниʼ?
62 Паңгдё-Ерв пыда таремʼ ма:
63 - Нерˮ мядинзь:
64 "Мядуʼма еˮэмня ядэңаниʼ".
65 Товамдаʼ теневы ңэбˮан сиддиʼ мятʼ ниманзь тюлеңхуˮ.
66 Тамна таремʼ ма:
67 - Нюв нив татˮ.
68 Таремʼ товандиʼ нябтиʼ пинʼ хаядиʼ.
69 Яхандиʼ хаядиʼ, сян нёдиʼ туˮ!
70 Евалё-Сусой пыда таремʼ ма:
71 - Нибˮнанд таˮ ныхыриʼ нимиʼ ханабюˮ.
72 Тикахана мядуңгаваˮ ңаниʼ идарць пядуʼ.
73 Таремʼ идартандоʼ малʼ ябельядˮ.
74 Евалё-Сусой пыда таремʼ ма:
75 - Сяндё-Евалё, ңамгэмʼ ңатен?
76 Неры вадав юрар?
77 Тикы вадида мэсоˮмахаданда Евалё-Сусой пинʼ санайˮ.
78 Сяндё-Евалё ңодˮ, пыда ңодˮ санаванда серˮ, Сэдорана-Немʼ няʼмада, сяланда ваңганʼ мода, ханханда ханада.
79 Не сятора, не хадиторңа.
80 Евалё-Сусой мале хануда хамадавыда, Немʼ та хурадиʼ, ти ңэдлэяхаʼ.
81 Мякатиʼ тэвыдˮ.
82 Няхарˮ по илеˮ.
83 Сяʼны ңэбга ңоˮ яраха саювˮ мяду талвыˮ.
84 Пыдуʼ таремʼ ма:
85 - Падроко-ңаць, тюʼуняʼ ңаˮ!
86 Мал мядʼ мюʼ хась пяңгурув?
87 Мирцяда-Нехэна немар ненза.
88 Падроко-ңаць макодаʼ сивна пухубтейˮ, тобысь падʼ мюʼ ңудамʼ ңыдара, ңынмʼ енемы.
89 Пой ңутосʼ лехэна сыраʼ ңылна таклада ңынмда ңэкална, ңын енамы, мадавы.
90 Сяндё-Евалё мята сюрась ти сюберңа.
91 Сяˮны ңэбта Сяндё-Евалё сюрберць вади моёку, пыда таремʼ ма:
92 - Тюку ңэвы пяхавабʼнан хавыдарахамʼ.
93 Нябаков, Сэрˮя-ңо-Ерванʼ хантанакэн, Нюмда ңэдарая нядаңгодаңэ.
94 Юрˮ-Сэракомд подертанакудˮ.
95 Тюкоход хэбат хойри сюмбримʼ нёдаңгун сиˮивхава яля.
96 Сиˮив ңэсоңгана, яляʼ ңэсоңгана тасий лаптанʼ хаʼамгун.
97 Лаптавна сидя сиˮив миндан.
98 Сидя ңэсоңгана, сиˮив ңэсоңгана итя ңабтеня ямʼ нярхалтˮ, Тет-Сэракомд ямд пидеямд.
99 Ямна сиˮив миндан, яля миндан.
100 Сиˮив ңэсоңгана явʼ маранʼ тэвңгун.
101 Явʼ маранʼ хаˮаврёда пензя танеңгу.
102 Тикы пензявна танаңгун.
103 Ңоʼ ерня нойри ейта мяˮ ңэңгу.
104 Мяд минʼ ңулмаңгур.
105 Нултаˮма минд мятʼ тюин.
106 Пыдар маньин:
107 "Сэр-Ңо-Ерв, Сяндё-Евалё тевʼ ёльцңгана нинекы илеˮ.
108 Саюв тось.
109 Сяндё-Евалё нюмдʼ хаңась нядаңгодаңэ".
110 Ти вадин валак.
111 Нябакоˮяда вадаʼ мальңгана нихивась ңаˮ пинʼ тарпвыˮ.
112 Тыда танавы, Юрˮ-Сэракомда. Тыда подерңа, ти мюселйˮ.
113 Хойё сюмбмʼсиˮив нёдада, яляʼ нёдада.
114 Сиˮив ңэсоңгана, яляʼ ңэсоңгана лаптанʼ хаˮмыˮ.
115 Лаптамʼ сидя сиˮив нёдада.
116 Сидя сиˮив ңэсоңгана итя ңабтеня ямʼ нярхалйˮ.
117 Явʼ варанʼ тэвˮмахаданда Сяндё-Нябако нултада.
118 Еся хаденада пыда моеңга ямдʼ.
119 Юрˮ-Сэракода пыядыдˮ, парыдˮ, Юрˮ-Сэрˮ-Варк ңэсь хая.
120 Тикавана Сяндёʼ-Нябако Юрˮ-Сэрˮ-Варкмда итʼ харейда.
121 Юрˮ-Сэрˮ-Варк пыядась итʼ санэйдˮ.
122 Хан хамбра, хамбариˮ мялырңа.
123 Сиʼив ңэсоңгана, яляˮ ңэсоңгана Сяндёʼ-Нябако маранʼ танэйˮ.
124 Сяндёʼ-Нябако нултада.
125 Есяʼ хадиңгата сэксе-нексе ңарти таркавыдˮ.
126 Сяндёʼ-Нябако сэксе-нексе ңарти хаˮаврада.
127 Юрˮ-Сэрˮ-Варк пыядыдˮ, парыдˮ, Юр-Сэракоңэ ңаниʼ хаяˮ.
128 Ңаниʼ мюселйˮ.
129 Пензявна тюˮуʼ танэйˮ.
130 Ңоʼ саво ерня мяʼ ңадимя.
131 Мяˮ ңэбтаʼ ңодʼ нойри ейта мяˮ ңэвы ненэсянда ңодˮ.
132 Сяндёʼ-Нябако мядʼ синд нултанюʼ.
133 Сяндёʼ-Нябако ханда ниня таня ңамды.
134 Ңамдёданда ханˮ харцеядˮ.
135 Вада-Сюдбабц сянд ңоˮ Сяндёʼ-Нябакомʼ лэтмбовнанда.
136 Вада-Сюдбабц ңаниʼ пуняʼ пуˮлэйˮ.
137 Сяндё-Евалё тамна сюрберңа, мята сюрале вада моёку.
138 Пыда таремʼ ма:
139 - Паңгдё-Недко, нябакодан ңамгэхэрт ниняраха ңадивˮ.
140 Понʼ хибяхарт ни туˮ.
141 Паңгдё-Недко, пыдар хэбцюн.
142 Паңгдё-Недко пинʼ тарпыˮ, мюдамда хамадамба сюрба ханʼңа.
143 Юрˮ-Сэракомда-Тыда подерңа.
144 Тикавахана пыда мюселйˮ.
145 Паңгдё-Недко нянда хэˮмявна пыда мюсе.
146 Сянд мюсебта, Итя-Ңабтеня-Ямдʼ тэвы.
147 Явʼ хэванʼ нултаданюʼ.
148 Юрˮ хурюданда хадеңо моёңга.
149 Юрˮ-Сэракода пыядыдˮ, парыдˮ.
150 Пармандуʼ серˮ, пыядавандуʼ серʼ Юрˮ-Сэракода Юрˮ-Сэрˮ-Варкңэ хая.
151 Паңгдё-Недко тыда Сэрˮ-Варк инямʼ пинабта.
152 Юрˮ-Сэрˮ-Варк пыядась итʼ санэйдˮ.
153 Паңгдё-Недко сиˮив яляʼ ямб юрˮ хурюдада хан хамбра, хан хылвана.
154 Сиˮив ңэсоңгана, яляʼ ңэсоңгана янʼ тэвыˮ, тэвˮмахаданда нултада.
155 Нултаˮмахад юрˮ хурюданда хадеңгана нексе-сэксе пыдуʼ таркавыдˮ.
156 Не нексе-сэксе хаˮаврайда.
157 Юрˮ-Сэрˮ-Варк пыядыдˮ, парыдˮ, Юр-Сэракоңэ ңаниʼ тэңэ хаяˮ.
158 Паңгдё-Недко ңани мюселйˮ ңарка хойʼ няʼ.
159 Сиˮив яля мюсе.
160 Сиˮив ңэсоңгана, яляʼ ңэсоңгана нерда няна ңоˮ саво ерня мяˮ ңадимя.
161 Паңгдё-Недко мядʼ синдʼ нултада.
162 Таремʼ сырңа: Сяндё-Нябако синенда ханда ниня ңамдёвы.
163 Сававна манэць пэңэ хэвы.
164 Тыда и ханда малʼ пэˮ.
165 Паңгдё-Недко мятʼ сюрбыʼ, нёмʼ тядада, мятʼ тюнюˮ.
166 Мядмʼ саңоʼ сидиˮңада.
167 Сидяда хэвда ваˮав ңэривы.
168 Няби хэвхана ваˮавʼ ниня Вэсако ңамдювы.
169 Вэсакоʼ ңэвакоˮмда пяʼ мюйраха.
170 Ной ёхородʼ мюня ңамдювы.
171 Няби хэвхана ваˮав, ниня ңоʼлери хонюда нойтоʼ вэңгалы.
172 Тены хонавы нинекы ңаˮ.
173 Ной тоньямда татуʼ пувэвадуʼ письˮ ваңграха.
174 Сидя хэвханда ңувˮ вадёвыˮ.
175 Сэрˮ-ңоʼ-Ерв-Вэсако пыда таремʼ ма:
176 - Не-ңацекы, ңахаʼ тэввэн.
177 Тюку янʼ тэри тарця хибяˮ нисетыˮ турˮ, тось ңоˮ яˮамңгуˮ.
178 Не ңацекы, ңамгэво серˮ еˮэмня ториданакэн?
179 Паңгдё-Недко пыда таремʼ ма:
180 - Сяндё-Евалё симʼ ңэдарась.
181 Маняˮ яханаˮ саюв тось.
182 СяндёЕвалё пыда таремʼ мась:
183 "Сэрˮ-ңоʼ-Ерв Нюмда нядаңгоданан ңэдарая".
184 Тевʼ ёльцгана нинекы илеˮ.
185 Сэрˮ-ңоʼ-Ерв пыда таремʼ ма:
186 - Не-ңацекы, ханьˮ пуй ңуˮумнанд!
187 Нюв ңэдараңгув.
188 Харта тута.
189 Паңгдё-Недко ңаниʼ мюселйˮ пуй ңуˮумнанда.
190 Явʼ маранʼ хаˮамˮ - махаданда еся хадиңода ңаниʼ ямд моёяда.
191 Юрˮ-Сэракода пыядыдˮ, парыдˮ, Сэр-Варкңэ хаяˮ.
192 Паңгдё-Недко Юрˮ-Явыˮцямда итʼ пыда яда.
193 Сиʼив яляˮ ямбан ханˮ хамбахаʼна мялырңаˮ.
194 Сиˮив ңэсоңгана, яляʼ ңэсоңгана Паңгдё-Недко янʼ танэйˮ.
195 Юрˮ-Сэрˮ-Варк пыядыдˮ, парыдˮ.
196 Ңаниʼ Юрˮ-Сэракоңэ хаяˮ.
197 Еся хадеңгата нексе-сэксе ңаниʼ таркавыдˮ.
198 Паңгдё-Недко нексе-сэксе хаˮаврэйда, хадеңада пэңа.
199 Паңгдё-Недко пуй нуʼумнанда мюсе.
200 Сянд мюсебта хойʼ маланʼ ңэсо пяда, мята мяра.
201 Мята мярˮмахаданда Наныкода-Нюда танева.
202 Паңгдё-Недко таня иле.
203 Сянд илебта ңоˮ.
204 Сяˮны ңэбтаʼ ңоˮ хой сюмбʼ нимна Сидя-Сюрбада, хойʼ няби хэван пыдиʼ мялкадаңахаʼ.
205 Тикы Сюрбадахаʼ пумна ңобʼ сюрбада, мядмʼ манэ манда сэрˮ мятʼ то.
206 Сяндё-Евалё ңэвы.
207 Сяндё-Евалё пыда таремʼ ма:
208 - Сидядиʼ ңэвэдинюˮ.
209 Тамна таремʼ ма:
210 - Сидя-Хибяримʼ нёракумʼ ханзеркарт тэва яˮамңаюн.
211 Сяндё-Евалё пыда таремʼ ма:
212 - Паңгдё-Недко, тюку яхана пыдариʼ нянандиʼ илебтар яңгу.
213 Сидндиʼ ямдалаңгумʼ.
214 Тикы яхад пыдуʼ ямдаядˮ.
215 Тикы сиˮив мюсе, яляˮ мюсе.
216 Сиˮив ңэсоңгана пэдарата ңонʼ ңэсыˮ.
217 Сяндё-Евалё пыда таремʼ ма:
218 - Таня иледиʼ, хуʼ нёдиʼ ханьˮ.
219 Мань парумбимʼ.
220 Нёракутаюн тэва яˮмамʼ.
221 Тиканда ядалйˮ Сяндё-Евалё.
222 Вада-Сюдбабц Сяндё-Евалёʼ пумна хая.
223 Сяндё-Евалё хойʼ ниʼ танэйˮ.
224 Сяндё-Евалё сидя ңэваʼ мал манэˮңада.
225 Сяндё-Евалё таняʼ хая.
226 Сидя-Сюрбада пиняʼ сюрбъяхаʼ, сэвʼ пубтаңахаюда.
227 Сяндё-Евалё сиˮив яляʼ ямб нёракуңахаюда.
228 Таремʼ мэнахандиʼ енаʼ монэˮ яхаʼ.
229 Сяндё-Евалё таʼ тэвыˮ.
230 Ңоподуʼ ңэвы Евалё-Сусой, няби ңэвы Сэрˮ-ңо-Ню.
231 Пыдиʼ таремʼ махаʼ:
232 - Маниʼ мэнинзь, Паңгдё-Ню сидниʼ нёракутакы, саць пэдэйниʼ.
233 Сандё-Евалё пыда таремʼ ма:
234 - Тедаʼ хантаваˮ Паңгдё янʼ, саюв тандая пяңгуваʼ.
235 Тикында ядальядˮ.
236 Сянд ядабатуʼ, тинд ядабатуʼ, нерандуʼ няна пэ ваˮ ңадимя.
237 Пэ ваяндуʼ лэттада сиˮив тибя, пирдада сиˮив тибя, ямбада тас юрˮ ңэдалава.
238 Саюв пэ вадʼ тяхад сикуцявна муңгу ңэдпиˮ.
239 Няхарˮ я ваˮвы тэвма минхандуʼ енерць пядуʼ.
240 Муңг тебабˮ ту есебарңа.
241 Няхаркава поˮ енерңаˮ, пэ вадмʼ малье ямадуʼ.
242 Пэ вадʼ нимня муңгˮ тасетыˮ.
243 Сяндё-Евалё пыда таремʼ ма:
244 - Пэ вая саць маё ңэвы.
245 Маняˮ ныхынанаˮ ниваˮ мальеңгуˮ.
246 Пыдариʼ сидяңэ енерңадиʼ.
247 Мань лакомбой ядэртамʼ.
248 Сяндё-Евалё я сидˮ янʼ пыда ядалйˮ.
249 Пэдаранʼ тэвыˮ.
250 Тэвʼмахаданада ңэванда нимня сиʼив халцемйˮ, Сэрʼ-Ханавэңэ хая.
251 Тиканда ямб пяʼ маланʼ ңамдыˮ.
252 Таремʼ ңамды, сэврида мэˮңа: сидя няда тамна енерңахаʼ.
253 Сяндё-Евалё пянда малхана сиˮив яля ңамды.
254 Сиˮив ңэсоңгана, яля ңэсоңгана Сэрˮ-Ханавэй тийˮ тюʼури миңа.
255 Таремʼ мэнаханда тирˮ саляʼ ниʼ пыда ңамдыˮ.
256 Сэрˮ-Ханавэй тирʼ саляʼ ниня сиʼив яля ңамдыˮ.
257 Сиˮив ңэсоңгана, яля ңэсоңгана Няръяна-Не-ңацекы сюрба то.
258 Ной панэцянда идари тядэбты.
259 Пыда таремʼ ма:
260 - Сяндё-Евалё, ңамгэʼ тюкона мэн?
261 Хибяри тюкона серта яңгу.
262 Ңаниʼ хаˮмадʼ!
263 Сяндё-Евалё пыда таремʼ ма:
264 - Пыдар хибян?
265 Няръяна-Не пыда таремʼ ма:
266 - Мань - Нувʼ-Пирибтямʼ.
267 Сяндё-Евалё пыда таремʼ ма:
268 - Мань симʼ нядабˮнанд, тикана хаˮмнгувˮ.
269 Нувʼ-Пирибтя пыда таремʼ ма:
270 - Ңамгэ ңарка сэхэн тэвын?
271 Сяндё-Евалё пыда таремʼ ма:
272 - Паңгдё-Ерв пэ ваʼямʼ малье яˮмаваˮ.
273 Сиднаˮ нядаʼ!
274 ПаңгдёЕрв мядонаˮ хадась.
275 Тикавана Нувʼ-Пирибтя пыда таремʼ ма:
276 - Нуву-Ервахад юндартамʼ.
277 Нувʼ-Пирибтяко пыда сюрбыˮ.
278 Пон нись ңаˮ Нувʼ-Пирибтяко сюрба то, сидя туцямʼ мине тавы: ңопой туцянда - няръяна туцяʼ, нябида париденя туцяʼ.
279 Нувʼ-Пирибтяко пыда таремʼ ма:
280 - Няръяна туцямʼ пэ вадʼ ниʼ тэвʼмахаданд нявда няхартан пархалъир, няби туцямд ңаниʼ пархалъир.
281 Валакада харасяда нён хадаˮ.
282 Нумʼ сава ни ңэңгуˮ.
283 Тикавахана Нувʼ-Пирибтя хая.
284 Сяндё-Евалё пэ вадʼ ниʼ тэвʼмахаданда няръяна туцямʼ няңгарңа, париденя туцямʼ няңгарңа.
285 Няръяна ту муңг хаˮмолыдˮ, париденя туцяңгад саць сата мерця ңэсь хая.
286 Пэ ваˮя пусуда тилыдˮ.
287 Сиˮив яляʼ ту есарңа.
288 Сиˮив ңэсоңгана, яляʼ ңэсоңгана туцяңаюта няˮав ңобняʼ ңыбкында, мерця хэˮна, ту хабты.
289 Сяндё-Евалё тасиʼ сырңа.
290 Тасий яхана пэ вая ңоˮмарида хаевы.
291 Сяндё-Евалё сеней ңамдёʼмаханда ңаниʼ ңамдыˮ.
292 Сиˮив ңамды, яляʼ ңамды.
293 Ңамгэ пиркана Нувʼ-Пирибтяко сюрба то.
294 Пыда таремʼ ма:
295 - Сяндё-Евалё, тедаʼ ңамгэмʼ ңатен?
296 Тедахаваʼ ханьˮ!
297 Сяндё-Евалё пыда таремʼ ма:
298 - Тамна таня тальбтё яхаʼ хэвхана сиʼив сохо.
299 Тикы сохона Сиˮив-Сюдбя иле, хибяри ңаворңа.
300 Тамна симʼ нядабцун.
301 Нувʼ-Пирибтяко ңаниʼ сюрбыˮ.
302 Понʼ нись мэˮ ңаниʼ няръяна туцямʼ тавы.
303 Пыда таремʼ ма:
304 - Тедахартʼ харасяди нен хадаˮ.
305 Сене харасяда хибя хадавэнась.
306 Тюку туцянд пеляримда пудабтаин.
307 Сяндё-Евалё тиканда хая тальбтё яхаʼ ниʼ.
308 Яхаʼ саляхана сиˮив сохоˮя ңарка ңэвы.
309 Сохоʼ мюд Сюдбяˮ, Парнэсь, Сесавэй тарпорңаˮ.
310 Ңока ңоˮ ңэвы.
311 Тикавана Сяндё-Евалё няръяна туцямда тасиʼ пархалңа.
312 Тасий яхана ңопой туңэ табцы.
313 Я малʼ пара.
314 Сяндё-Евалё неры ңамдёˮмаханда ңамды.
315 Ңавоʼ пиркаˮна НувуˮЕрв то.
316 Пыда таремʼ ма:
317 - Сяндё-Евалё, ненаʼ вэванюʼ.
318 Сене мамзеню:
319 "Харасяди хиби нён хадаˮ".
320 Пыда ңока харасяда хибяри хадерңан.
321 Тедахава ханьˮ!
322 Тюку яхана сямэйʼ яндерʼ ниˮ илеˮ.
323 Сяндё-Евалё пыда таремʼ ма:
324 - Таси сямэй яхана итя ңабтеня явʼ саляхана Явгы-Тэта танева.
325 Ты илебяда тяхаринда ңока.
326 Янаʼ пелямʼ талаби, тэсидако хибяриʼ тыˮ тикы тэхэʼ еремзетыˮ.
327 Вэво янаˮ терˮ малʼ тэсялмаˮ.
328 Явгы-Тэта пяхавабʼнан яˮамңгу вунивʼ.
329 Явгы-Тэта ңаʼ-Хадамда няңэ.
330 Ңаʼ-Хадада хибяри ңаворна, ты ңаворна.
331 Сиˮив янаʼ терˮ иленярахаˮ ниˮ ңаˮ, ярцаˮ, ңаворциʼ ханаˮ.
332 Тыдуʼ пумна тони ңа-Пухуця ңаворъяда.
333 Янаʼ тер пелямда Ңа-Пухуця ңамъяда.
334 Ңа-Пухуця яляхананда юд хибяримʼ ңаворңа, юд ты ңаворңа.
335 Индкатуʼ вэва хибя хаёдаˮ, ян танёмаˮ.
336 Сяндё-Евалё пыда тамна таремʼ ма:
337 - Нувуˮ-Ерв, сими нядабцун.
338 Харʼн ялин вунив пиратˮ ңа-Пухуцямʼ.
339 Нибаˮн хадаʼ янаˮ тер малʼ ңамдыда, хибяри ни хаедˮ, тыˮ ни хаедˮ, малʼ ңамдыдана пухуця.
340 Ңа-Пухуцямʼ ңамгэхэрт мирв яˮмада
341 Нувуˮ-Ерв еся ядабцьмʼ миˮңа.
342 Пыда таремʼ ма:
343 - Ңа-Пухуця пинʼ тарпаңгуˮ.
344 Пыдар тэванд серˮ, тарпбата мале сит ңаманзь нянда няңгарта, тикана тюку еся ядцеңгад няңгда мацидед.
345 Еся ядцянд тет тюндда ңэвы.
346 Тет тюндахана тар мадаңга, пус мадаңга.
347 Нувуˮ-Ерв хая.
348 Сяндё-Евалё Сэрˮ-Ханавэй миркнанда тасий янʼ хаˮмыˮ, невхы хибяри мирңэ хая.
349 Сяндё-Евалё я сидˮ янʼ ядалйˮ.
350 Сянд ядабта, неранда няна Итя-Ңабтеня ямʼ ңадимя.
351 Явʼ саляхана сиˮив юрˮ мяˮ.
352 Мядуʼ синяна ңаркаˮя мяˮ таневы.
353 Мяˮ ңэбта ңоʼ нойриʼ еесь мярвы ңэвы.
354 Тикы мядˮ синяна ңэта париʼ таневы.
355 Тикы париʼ ниня Хасава ңамдювы, мальцяда сиˮив тэнз нойхад сэдвы мальцямʼ мэˮмы.
356 Хабинаеда ңаврадамда таня тэвабиˮ, ңавораˮмахаданда Явгы.
357 Тэта маханякуʼ лясасеты.
358 Сяндё-Евалё мядʼ хэванʼ тэвыˮ.
359 Мякад тарпыˮ ңа-Пухуця, тарпʼма минханда Сяндё-Евалё нерад миңа, нянда симʼ няңгарңа.
360 Сяндё-Евалё еся ядцяңгананда Ңаʼ-Пухуцямʼ няңгда мацидеда ңаʼ-Пухуця тикы минаханда яʼ ңылʼ сэя.
361 Яʼ ңылна Ңаʼ-Пухуця таремʼ мамононда:
362 - Сяндё-Евалё, тяхари сата хибян ңэвэн.
363 Таремʼ ниманзь енˮ.
364 Еся ядцяр Нувуʼ няд тавы ңэвы.
365 Яʼ ниня хаювы ңэбаˮн яʼ ниня иленя хибяримʼ ниманзь хаеңгуˮ, ты ниманзь хаеңгуˮ.
366 Тамна таремʼ ма:
367 - Сяндё-Евалё, тедахава яʼ ңылʼ сиˮми питарңан.
368 Тедаʼ тюˮуʼ яʼ тирʼ ниʼ сян нимʼ тутˮ.
369 Тикаханда хэˮнакы, мунзялма.
370 Мядʼ сиңгана ңамдёда Хасава хаˮмыˮ.
371 Сяндё-Евалё хэванʼ то.
372 Пыда таремʼ ма:
373 - Сяндё-Евалё, янʼ яʼавлын.
374 Ңаʼ-Пухуцямʼ пирдалер, тедахаваʼ харˮн ервамʼ ңэңгумʼ.
375 Сяндё-Евалё ненханда паридесь то.
376 Явгы-Тэтамʼ няби марцяхад секадтада, пыда таремʼ ма:
377 - Явгы-Тэта, тедаʼ пыда ерван нин ңаˮ.
378 Мэсь ервыда ңэсь.
379 Тюку паныд екан.
380 Нибˮʼнанд харваˮ екаван, ңаʼ-Пухуцянд пумна сит ңэдараңгумʼ.
381 Явгы-Тэта нись ңод харваˮ ной паныда екайда.
382 Сяндё-Евалё хаби ңацекэхэˮ пыда таремʼ ма:
383 - Явгынʼ саць вэвакоця паныдада миˮңадаˮ.
384 Тедаʼ пыда ерв ни ңаˮ, хартаˮ ервдаˮ.
385 Пямда пэрңая, тыда пэрңая.
386 Ңаврадамда ян танёмбовна мипидаˮ.
387 Мэсь ңаворңа, мэсь ерводась.
388 Тикавана Сяндё-Евалё сэвда хуʼ яляʼ ядалкаявы.
389 Сянад ядабта, тинад ядабта, неранда няна тас юрˮ мяˮ ңадимяˮ.
390 Сяндё-Евалё таʼ тэвыˮ.
391 Харта мядуда ңэвыˮ.
392 Евалё-Сусой мядʼ сиңгана сиңгы ханда ниня хасавадевы Сэрˮ-ңоʼ-Ервʼ-Няʼ, Наныко ңацекы нясь.
393 Наныко мале ңармы.
394 Сяндё-Евалё пыда таремʼ ма:
395 - Тедаʼ вэвоʼ яңгу, малʼ хадаяв.
396 Мань хантамʼ ңарка-Нувуˮ няʼ.
397 Сяндё-Евалё ңэванда нимня пыда халцамйˮ, Сэрˮ-Ханавэңэ хая, пилиˮ хая ңарка-Нувуʼ няʼ.
398 Та валакада.