1 Ӈарка ялядо
2 Пилёˮ иры нюртей ныланава яляʼ ту хан мэта ненэциеˮ ӈарка яляӈэ толы. Тад таслаб, яʼ нимня вэӈгалёда еся сехэрэвна ӈока пэндая тэнзʼ ханяриʼ тэворӈаˮ. Маняˮ округаваˮ ӈани еся сехэрэсавэй. Лабытнанги харданʼ малда хаˮавры.
3 Юд поʼ тяхана газмʼ Бованенковахад тэвабаваˮ еˮэмня Москвахана манзаранаˮ ервˮ Ямалмʼ Ямбата еся сехэрымʼ сертавнзь таславэдоʼ. Ӈарка янаˮ тахарамахадʼ манзаядо ланомась. Еся сехэрымʼ маниенаˮ, тикахана манзарана ненэцяˮ ӈани нито тотревʼ, таӈгмʼ ни хомбюˮ. Пэртядоʼ ӈарка. Етёʼ округана ервˮ, Лабытнанги харад ервˮ сейхад миндя вадиˮ хэтыбиˮ. Едя сяяˮ, нюдоʼ вадабаяˮ!
4 Тюку тадтёда сидяӈгахана тюˮуна маниенараˮ ӈобкад вэтёда вагонˮ вадна тепловоз. Няби сядяӈгахана хэванда ненэцяˮ!
5 Н.Сергеевʼ падвы
6 ----
7 Ты пэрма
8 Хибяхарт нидаˮ нядабюʼ
9 Тюку нараʼ ты пэртяˮ маяндʼ еремяць. Выӈгана илена ненэциеˮ тыдоˮ ӈокавна хаць. Округхана ты серо нямна манзаранаˮ ервˮ программаˮ саирмана ненэциеˮ нядабиˮ.
10 Тедаʼ лаханакурць нятаваˮ В.П.Никитина. Пыда округанаˮ администрацияʼ есямʼ тярпада департаментʼ ерв марцьхы.
11 - Валентина Парфеновна, выӈгана илена ненэциеˮ ханзерʼ нядабидоˮ?
12 - Тыˮ серо минрена предприятияˮ, халямʼ пэртяˮ есяхана нядабинаˮ. Тикы еˮэмня яӈга фонд манзара. Таддикад факторияˮ нядабада программа таня. Яӈга тазу хаби тэнз ненэциеˮ ед, ӈани ӈопой программамʼ сертаваць. Ӈадимдевы есьнаˮ едэй предприятияˮ сертаба тараӈгуˮ. Халямʼ, тудакомʼ, ӈодямʼ манзаятахаˮ мипаӈгунаˮ. Совхозхаˮ, халя заводахаˮ мирциˮ бензинмʼ, салярамʼ тэврамбаӈгуваˮ.
13 - Сельской хозяйствахана манзаранахаˮ есьдоʼ ханзерʼ миӈаˮ?
14 - Округанаˮ Ӈэвахы Ерв тикы сермʼ савовна маниеда. Сельской хозяйствахана манзаранаˮ яӈга падаркана падыʼ. Ты пэртяˮ харто тэмдорма сермʼ минренаˮ есядоʼ ӈобʼ пирас ӈэӈгуˮ. Сяӈок еся пирувна манзарамадоʼ ӈобʼ ӈадяӈгу. Та пирувна нядаӈгода есьˮ нямарпаӈгуˮ. Совхозˮ хартаˮ илена ненэцяӈгататаˮ ты цамзамʼ тэмдабабта нядаӈгода есяда таняӈгу. Хараси садпададоʼ яӈгода. Ӈопой тонна ӈамза ед миндя толырта юкад вата няхарʼ ёнарʼ еся ӈэӈгу. Тикы есяˮ округхад ӈадибертаˮ. Тад ӈаниˮ нядаӈгодо есяˮ таняӈгуˮ. Ханенаˮ тэре ниˮ хаёдˮ. Ӈопой ласкаʼ хоба тет юрʼ кад вата сидя юˮ хасаваюʼ есямʼ мирета. Ӈохоʼ сидя юркад вата сидя матʼ еся ӈэӈгу. Идʼ пися хоба няхар юкад вата матʼ, тряха хоба матʼ еся пирмʼ мирета.
15 Едэйвана таремʼ сертаваць. Ты пэртяˮ тытоˮ ӈамзиˮ поʼ пуданахана тэврамбидоʼ. Падродоʼ ӈодʼ таремʼ тэворӈаˮ. Пыдоˮ нядаӈгода есь нерде няˮма пиръядоˮ. Ӈавармʼ, есямʼ, бензинмʼ, ӈани ӈамгэ таранамʼ та миннёˮ поʼ нерденя яляханаˮ нямарпаӈгудоʼ.
16 Нядаӈгова есь хуʼ пирʼ ӈэвамда хибя, ханзерʼ тасламбида?
17 - Тарця сермʼ тасламба яӈга манзаранаˮ таняˮ. Тыʼ толабадаˮ хусувэй ӈамгэмда ниʼ юрыбюˮ. Ненэциеˮ недбяˮ, машина мирʼ, хабартанаˮ, ты пэртяˮ манзарамаˮ ӈобтʼ толабадаˮ. Пуна ся ӈокувна ӈамзамʼ мирдапавамдоʼ тандая таслаӈгудоʼ. Теда ненэциеˮ манзарама ӈоб мирець пэрӈа. Ӈамза мирʼ есямʼ ненэциеʼ манзарамамʼ нидо толабасетуˮ. Тикы еʼэмня ненэцяˮ есяна нядабадаˮ.
18 - Ты ӈамзамʼ манзаятиˮ манзарамадоʼ ӈамгэ миреӈа?
19 - Ненасянда ӈодʼ тикаваˮ саць мирець пэрӈа, тюку поʼ тет юкад вата тет есяӈэ ханда. Манзаяда ӈока. Ты пэртяриʼ, хабартана тикы серкана ниʼ манзара. Тюку похоʼна машинаˮ миреӈаˮ. Табцамадоʼ ӈобтаремʼ ни мирцюʼ. Ты толаба мэта вадоʼ сулорпа есяˮ ханӈаˮ. Харадʼ, ӈамгэри лэтамбалаваˮ тараˮ. Ервоʼ контораʼ, по ямбанʼ недбидо ӈани миӈаˮ. Мэкад ӈавэˮ сертабюлваˮ, хусувэдоʼ токмʼ мэӈа, мядотоʼ, мюй ядемдамба тараˮ. Тад таслабʼ тымʼ манзаятахаˮна тарана саць ӈока. Тэри ӈабцаквата ты выӈгана харта пыхыдамда ӈавламби.
20 - Тиканда харта илена ненэцяˮ тэнда ӈамза ӈобʼ мирци?
21 - Таремʼ ӈа. Мирци.
22 - Ерво поӈгана ханяӈэдоʼ манзараниʼ манзаяйда?
23 - Округхы сельской хозяйства нямна ӈудондана управления манзара. Округанаˮ Ӈэвахы Ерв падвы падаркана таня, хусувэй тэмдорма сермʼ минрена, совхозˮ управлениянʼ падармʼ падбата сероˮӈа. Ӈамзамʼ нямарпадаˮ харто илена ненэця тытаˮ ӈамзиˮ мирдапавандоˮ ёльцяӈгана ӈобанзер мэбета падармʼ падыбабти тара. Тикамдиˮ управленияʼ бухгалтериянʼ митадиʼ. Таминдоʼ Салехардахана ӈэда сельской хозяйства нямна манзарана управленияхад есяцэ ненэцьʼ нямаӈгуда. Хардамнаˮ нядаӈго мэта еся ӈэдарамба тародоˮ яӈгу. Юхурӈаˮ. Тюку похоˮна налоговой инспекциянʼ ӈатебясавэй ӈока. Пыдоʼ таминдоˮ есьˮ хаˮаврамбидоˮ. Манзаранахаˮ, ты пэртяхаˮ есяˮ ниˮ тэворʼ.
24 - Нерʼ мансиˮ, нядаӈго мэта есямʼ совхозʼ нерде няˮма пирӈадоʼ. Таремʼ манэпʼ тикы саць сава.
25 - Ӈэсыхаˮна манзаранаˮ хусувэй ӈамгэдоˮ тикахана таняӈгу. Хартоˮ илена тэсавэй ненэцяˮ нядаӈгода есямʼ нерде няˮма пирӈадоˮ? Тамальӈгана таминдоʼ ӈаврадамдоʼ, едэй хордамдоʼ, брезентадамдоʼ тэмдаӈгу?
26 - Хартоˮ тэсавэй ненэцяˮ округ есятˮ ӈобкарт копейкамʼ ниʼ няˮмарпюˮ. Мирдамы тэнда ӈамза есяримʼ мэˮӈа. Нядаӈгода еся тэмдорма сермʼ минрена ненэцяˮ сеп мюʼ хаморӈаˮ. Таддикад совхозˮ няˮмарпидоʼ. Тикы нинаˮ ӈамгэхэртасиˮ хаюрӈаˮ.
27 Ти, тад таслаб харта тэсавэй ненэць хэвнядʼ сита нядавандада яцгу. Ханзер пирӈада таремʼ иле. Округхананаˮ нядаӈгода программа ӈока. Ӈобкартадоʼ ненэцямʼ тюку похоˮна, няда, яˮмада.
28 Василий Сэротэтто ненэй ваданʼ пададась
29 ----
30 Халямʼ пэрма
31 Ханелаваханатоʼ мэˮ
32 Маняʼ округхананаˮ Тазовской район сямянхат ӈарка район. Ненэй ненэциедоʼ хуркари манзаяханаˮ тэтнаˮ. Неноховавна халямʼ пэрма сермʼ саць мэнедоʼ. Тандая газетанʼ паднанаваˮ Юлия Талеева, Роман Хасовавич Яндомʼ мутраʼ вадавна хонрамбавэдась. Тикы ненэць ханена ненэциемана ӈобʼ ядэрӈа. Лаханакуромадиʼ ӈылнякуна ти ӈэда.
33 - Сиˮми савовна намдорӈан?
34 - Ӈа, мунод со.
35 - Пыдараˮ районханандаˮ халямʼ пэртидаˮ ханзер ёрӈа?
36 - Тэри ӈабцата ёртинаˮ няхар предприятияхана мэˮ. Нерде Тазовской халяʼ заводмʼ вадетадмʼ. Теда мал ӈокхандоʼ ёлава яханато илеˮ. Манзаяндоʼ паӈода. Ӈоб пирсавна ниʼ ханеˮ. Теда мэта пона июнь ирыхад сямян нитаˮ ни Василий Несович Салиндер дадиберӈа. Пыда муӈгананда мэна нидаˮ добтаремʼ малˮ хынибэйˮ. Пыдоˮ Находкаʼ харад терˮ. Гыданской халяʼ завод ӈобтаремʼ районхананаˮ ӈани ӈарка предприятияӈэ толы. Ненэциедаˮ Итя Ӈабтеня ямдʼ нявотана есиˮ нявхана ханеˮ. Нядандоʼ Ӈэдя харадʼ ӈахана ӈа. Халэдоʼ ёлаваханатоʼ сэротамбидо. Пуна ханесэйдоʼ хосая ту ӈано турӈа.
37 Ӈокханда тикы халяʼ заводʼ юˮ участокда. Едэй мастердоʼ Петр Петрович Прокопчук варемда мэˮӈа. Ӈамгэридоʼ та тасˮ. Участокхатˮ савовна манзаямда минренадоʼ - Еся яха. Етё таславы планамдоʼ тадри томдаванзь мэдо.
38 Няхаромдэй ханена ненэциенаˮ "Тазовской" совхозхана мэˮ. Небой поʼ 100 тонн халямʼ хадаць. Тюку яляхаˮна ӈани тарем манзараванʼ харваˮ.
39 Районнаˮ тиӈгывна халямʼ пэртя ненэциенаˮ тэре нинаи маниеˮ. Ервонаˮ ӈобкад няндоʼ тэворӈаˮ. Неняӈгˮ иры ерня ӈарка хэбидя ялядонзь. Тид манзаранидоʼ хуркари мядонзэй няˮ марӈаць. Тэре ӈабцата, ханяӈыдо недбяндо еˮэйӈэ мерета "Буран", ӈанидоʼ токмʼ ӈадимдембада электростанция нямсетыˮ.
40 Дмитрий Сэрьявич Няч яхананда тидпой манзараванда еˮэмня округанаˮ Ӈэвахы Ерв Почетной грамотамʼ няˮамась. Юнда округанаˮ тяхана ханӈа.
41 Хэбидя яляханандоʼ теда тюˮу миндя хасаваˮ сянакуць. Тароӈаць. Ӈопой яхад няхар санахана пирдырӈаць. Хуркари ненэциеˮ сянакубц тензебтембиць. Сырмы хибяˮ ӈудидоʼ ӈобт пейдемба нидоʼ ядабтамбидонзь.
42 Тазовской районнаˮ ӈарка ервада Николай Николаевич Харючи халямʼ пэртяхатаˮ етре тэворцеты. Манзарана ненэцяˮ серодо тикари яхана тасласетыдоʼ.
43 - Алло, сиˮми намдорӈан?! Вадидʼ ӈули савовна намдынʼ. Лакомбой, Роман Хасовавич.
44 Юлия Талеева хонарковы, паднавы
45 ----
46 Тюку В. Белокопытовʼ тадтавы сидяӈгахана маниенараˮ А.Баяров. Пыда Ноябрск хардахана ӈэда "Благовестмʼ" нюбета организацияхана манзара. Газмʼ тюˮу тарпрамба мэта мирвеˮ сулурпадаӈэ тара.
47 Н.Федоровʼ падвы
48 ----
49 Новой Уренгой хардахана харадˮ хэвдяроʼ сертабада заводʼ таня. Мале сян поʼ ямбан кирпич сертабадаӈэ Михаил Биллалов манзара. Манзаянда саирмʼ саць савовна теневада. Тандая тунʼ ниня пинна сэрʼ кирпич сертаба пясь. Тюку В.Башук тадтавы сидяӈгахана ти маниенараʼ.
50 Х.Нямбараʼ падвы
51 ----
52 Илмаˮ нёховаˮ юрыбюˮ
53 Тандаяʼ Салехарданʼ Москвахана манзарана Елена Тимофеевна Пушкарёва тэвордась. Ӈавнанда маняˮ округанаˮ тер. Теда таняна манзараванда хавна, научной сероʼ минре. Мале ӈахакуй похоˮна исторической наукˮ кандидатӈэ хаясь.
54 Газетанʼ паднанаваˮ Г.О.Тохолиʼ лаханако няˮмэдась. Лаханакуромадиʼ ӈылнякуна тиʼ падада. Толараˮ.
55 - Ӈэрм тер ненэциеˮ иламʼ тюку похоˮна хибя падыбида?
56 - Ӈабцата ӈэрм терӈэ илмаˮ падаркана тянёвпа пады. Невхы похоˮна ямʼ манэсарць ядэрта хибяˮ ӈамгэмʼ манэсомамдоʼ серокуто серʼ падыбавэдоʼ. Тарця ненэцяˮ ӈопойриˮ - сидяриˮ.
57 Теда хусувэй ненэцяˮ тэнзхат таремʼ паднанаˮ таняˮ. Маняˮ илаӈгад хэмяхаданаˮ нюнаˮ нюˮ падаркад илемяваˮ толабаӈгудоʼ. Тиканда техэ паӈгамдоʼ теневаӈгудоʼ. Маняˮ ярабцанаˮ, сюдвабцанаˮ, хынабцанаˮ, лаханакунаˮ таняˮ. Тикахатˮ невхы иламʼ намдорӈаваˮ.
58 - Маняˮ ненэй ненэцяӈэˮ поӈгаданаˮ ӈулиˮ ямб невхы ярабцмʼ падвэваˮ яӈгу. Тикымʼ ханзер тасламбир?
59 - Невхы похоˮна выӈгана илена нинаˮ няхатоʼ ярабцˮ сидя, няхар яляʼ мэць пэрмыдоʼ. Тамальӈгана ӈамгэхэрт толабада книгаˮ, журналˮ, газетаˮ яӈгуць. Тедаˮ илмаˮ несэйма. Ненэциенаˮ хуркари манзаиˮ пэрӈаˮ. Маняˮ ӈод невхы иламʼ маламбадаӈэ ӈоякари ярабцˮ мэта няханаˮ тэворӈаваˮ.
60 Ибʼ ярабцмʼ теневана таняӈгу, тикамда сидя, няхар часˮ мэтнакэда, таддикад малханда лакриʼ тэвраӈгуда. Ненэй ненэцяˮ илаӈгана сюдвабц, лаханако, ярабц, вэта мэмдавэй хаеба ниʼ серос. Ӈадьбятоʼ ярабцанаˮ хэбиворӈаˮ.
61 Тэри ӈабцата есяʼ таняб, ялэˮ таняб, ямб ярабц падда пирры. Ненэцьʼ недвалемахад, теневанамда ӈобтаремʼ сиˮив яля мэць пиртада. Тад таслаб тикар сидя, няхарʼ книгаӈэ ханда.
62 Выӈгана, хусувэй мякна ӈацекы ненэцяˮ магнитофонсавэй. Сарё, хад яляхана тадгавандоʼ сер, иринатоʼ мэта ярабцˮ падыбабто сава. Харта падарт пада нибнандоʼ пирасʼ нянаˮ тэвраӈгудоʼ. Тикахана ямб лаханакомʼ серта пиртаваˮ.
63 Нерде ярабцˮ маламба пяванаʼ мальӈгана паднабцьлимʼ мэцетываˮ. Сёмʼ мэта ненэцямʼ табламбир. Тад мэманда вадидаˮ юраӈгуда, хэвнямна хэтыбаӈгуда.
64 - Сян книгамʼ падванʼ харван?
65 - Илниʼ тид мимб, хахаяда похоˮна няхар сян книгамʼ ӈадимдеванʼ харвадмʼ. Маˮлавы лаханакуниˮ мале таняˮ. Сиˮми нядабавы ниниˮ нюбедо ӈани тикахана падаӈгуˮ. Сяхариндаʼ книгамиʼ нэбто, нюбедо хартоʼ толаӈгудоʼ. Майяӈгудˮ. Невхы похоˮна Лехтисало ненэциеˮна нямна падвы книгахаˮнатаˮ сита нядабавыта нювˮ тикахана ӈаˮ. Маръик, Худя, Тохо, Ламдо еркарˮ таняˮ.
66 Мань ӈадьбяни манзетыдмʼ: "Теда тюˮу миндяӈэ тайку ӈадаˮ. Иринанаˮ - хадананаˮ илеванʼ нядандоʼ ярабцˮ, сюдвабцˮ, лаханаку падыбахаваˮ."
67 Ӈабцата тикы сермʼ нёданаӈэ ӈули тянёваˮ. Тохолковэӈэ пудана юˮ похона ӈоляридмʼ.
68 - Малавы ярабцадˮ, сюдвабцадˮ ханзер, сяʼ хунат манзаяцетыд?
69 - Ӈопой сюдвабцмʼ, ирыʼ пират тидхалембасетыв. Хусувэй вадада тасла тара. Сян яляʼ хэмяхад ӈани манэтар, тамна савовна техэ нянд вадиˮ тензебтеӈгудˮ. Ӈобтаремʼ хэли ненэць тикы манзаямʼ сертаба нидя пирас.
70 - Ярабцˮ маламбада ненэцяˮ ханяна тохолко пэрӈа?
71 - Етя ненэциеˮ тохоламбада институтхана вадамʼ минрена факультетˮ таняˮ. Вадаˮ хэтырмʼ тохоламахад, аспирантурамʼ ненэць ёльцеӈгу. Таремʼ манзарава няюв няхар поʼ тохолко сероˮ ӈа. Тикы поʼ ямбахаˮ 100, 300 поʼ техэ ненэциеˮ манзарамиˮ тохола тара.
72 P.S.
73 Тандая школамʼ ёльцвыˮ, теда тюˮу миндя хибяˮ индё таня ярёдаˮ Елена Тимофеевнаʼ тотрев тохолкобто сава. Ханзер миндя сехерэмда теда ӈарка няваʼ харта вадеˮ ӈада. Илмаˮ неховаˮ юрибюˮ.
74 ----
75 Тюку Б.Жилинʼ тадтавы сидяӈгахана маниенараʼ Худи Нембой. Пыда Ямальской районхы Панаевскʼ хардахана иле. Ӈавнанда сеӈг носиˮ вадабадаӈэ манзарась.
76 С.Вануйтоʼ падвы
77 ----
78 Савоʼ иʼ хамувдавэй
79 Тандаярка халямʼ пэртя ненэциеˮ нямна ядэрӈаваць. Есяʼ ӈанонʼ ӈамдамахаданаʼ яхаʼ ӈыльняюна иленаˮ ненэцяӈгˮ пяваць. "Хэмяваʼ яля нумдаʼ вэвась. Миндаханаˮ нумда сарюмясь, хамбаˮ ӈармаць."
80 Пилиʼ нерде яхаʼ лаӈгʼ ниня нюдя хардакомʼ манэӈаваць, нултаваць. Тикана хардакоʼ мюня хор таняʼ, ваˮ ав лехэбты. Таремʼ таславаˮ, ненэцяˮ тиканаʼ ныланаˮ, сяйʼӈаˮ, мэтаʼ паныдоʼ тырабтамбиˮ. Нероʼ поӈгана ӈодяˮ ӈулиˮ ӈокаˮ. Лакри хэнёӈэ хаясь. Неняӈгʼ сиднаˮ ӈатевэдревʼ тэриʼ нянаˮ лабцэйдаць.
81 Ӈули мер нерня ӈэдалэйнацьˮ. Малеʼ понʼ миӈаваць. Яʼ поӈгана халядана ховэваˮ тянёсьТэриʼ ӈобладʼ ӈанэрта ненэциеˮ манэˮ цетываˮ. Яхаʼ маханяӈы лаӈг ниня Горнокнязевскʼ таӈоцьʼ хаись. Хэвхананда поӈгамʼ "хуламбадам" ӈаниʼ ниваць манэсˮ.
82 Яхаʼ сятаняӈы лаӈгмʼ нёда есяʼ ӈановаˮ нерняриʼ пэрӈадась. Ӈамгэ пиркана яха ерканаʼ халэˮ нямарпада ӈаномʼ ховаць.
83 Тикана Александр Михайлович Анисимовмʼ ядабтавацьʼ, таремʼ мась.
84 - Тедаʼ халяданиˮ сабе халя тэврамбададо яӈгу. Манзара пэмахадани нямвэмиʼ сидямбой тонн. Сава похона яланда сидямбой яляʼ манзая.
85 Ненэсянда ӈаноʼ ниня ӈэда ларасˮ малˮ терсявыˮ. Ӈаноʼ хуӈгʼ мюня салабари ӈоны. Лаханако нята нява ӈани мась:
86 - Халя ни сусаʼ. Манзарана ненэць, недбямда нямарпабта тара. Тикана манзая нерня минда. Тедаʼ халэдоʼ луцахаˮ тэмдарамбидоʼ. Ӈопой кылам- няхарʼ юˮ самляӈг есявна тэмдабидо. Ӈока нибтаʼ ӈод ӈа ӈаврадамдоʼ тэмдаӈгуˮ.
87 А.М.Анисимов халямʼ нямарпадаӈэ юкадʼ вата самляӈг по манзара.
88 Пыда нямарптада есядаʼ таславы. Сяри ӈок халямʼ яляʼ ямбанʼ няˮамбата ӈодʼ есяда ӈоб пирсавна миӈа.
89 Мерця ланомзеты, лакриʼ поӈгэйӈэ тебсеты. Идʼсяр ний ханяӈэхэна ӈулиˮ салмуйӈэ хэсеты. Ненэйраха ӈэсеты.
90 Таремʼ миндяханаˮ Вылпосяˮ таӈоцяндʼ тэвынаˮ. Хардадоʼ малˮ иˮканяʼ ӈамдыˮ. Савохона хаёмядоʼ хубта, нарэй идеˮ хэӈгадама. Тамальӈгана тикыʼ вэва сертоʼ ервахатоʼ вадеˮмэдонзь. Харто ядэрмыць. Тикымʼ вадемы Прокопий Опоевич Ендырев, халямʼ хадабада. Пыда таремʼ мась;
91 Икана хаэваваˮ ервахаˮ вадеˮӈавась. Хибяхарт нись туˮ. Таӈоцяӈгананаˮ телефонваˮ яӈгу. Рациянаˮ тарода яӈгу. Иб тёрытанʼ, сиднаˮ няби няна ниʼ намдорˮ. Ӈацекыˮ, ӈармы ненэцьˮ. Харобта хаӈгулаӈгу.
92 Таʼ ёльця ӈгана лахана тарасеты. Тикана телефон тара.
93 Маняˮ Ӈэрмʼ терӈэ ненэциеˮ сероʼ тасламбада "Ямалнюˮнаˮ яˮ!" ассоциацияваˮ таня. Округханаʼ харнаʼ департаментсавэваˮ. Приуральской районхана ӈобтикыˮ ненэциеˮ сероˮ пэртя отделадоʼ манзараˮ. Таӈок ервоʼ таняˮ, ханзерˮ хибяхарт ненэциеˮ илаʼ нямна ниʼ няркомбюˮ?! Тюку поʼ савоʼ ӈарка ӈэвахад ӈарка ервˮ ӈобтикыˮ теневаць. Тикыʼ нямна ибмдорпатоʼ савась.
94 Идʼ поӈгана хаёвы ненэциеˮ помна етриʼ ядэрпато тарась. Ӈариʼ тедахавʼ хибяртʼ ӈадибермы яӈгу. Ненэцяˮ хартоʼ илеˮ, серодоʼ харотоʼ тасламбидоʼ Ӈаврадамдоʼ тэмдаванзь Харсаимʼ таӈоцяндʼ ӈанута ханӈаˮ. Хаӈгуртидоʼ ӈобтикыʼ хартоʼ тэволэйдоʼ.
95 Харадʼ поӈгы ӈархандоʼ идʼ ӈэва нид, яланда ӈопой мятʼ тэворӈаваць. Прокопий Опоевич Ендырев пухуцянда ня мат нюдиˮ. Сидя хасава, тет не цацекыˮ. Малˮ мале янамбовна нядаӈгода ненэцяˮ. Ӈарка хасава нюдиʼ харта халяда ханӈа, не ӈацекыˮ малʼ небямдоʼ нядабиˮ. Тедаʼ пыдоʼ едэй мивы мякна илеˮ. Ӈахатʼ илеʼ мэмы мятоʼ ӈулиˮ нюдя. Ӈамгаритоʼ ӈэсяӈэ мэӈадо.
96 Тюку поʼ савоʼ ханярина ӈарка ӈэвы. Юдʼ по тяхана тарця савоʼ торхавы.
97 А.Ламдоʼ падвы