1 Яхана малейдˮ
2 Ямальской районхы Сабетта яхаʼ хардахана ОАО "Ямалагроинвестˮ тер" хартоʼ илена ненэциеˮ тыˮ тюку поʼ хабарпиць. Яханидоʼ иба харадʼ мюня манзараць. Тыдоʼ ненэй ненэцяˮ мэсыдʼ серˮ яхабидонзь. Тодоʼ яхаˮ ӈэсоӈотоʼ сер сабцемахадандоʼ нер ӈэся мюʼ ханибтембидонзь.
3 Тиканда тэмдорта ненэць намгэ тоˮолха ӈамзанʼ харвабта, мале няндо хамэдё митадоʼ. Тарця сермʼ тюку поʼ пядоʼ.
4 ОАО "Ямалагроинвестˮ тер" ӈокханда 1800 тымʼ яхаць. Сидя юрʼ тэдо поʼ тяха хаиˮ. Етя таславы тыˮ мэртя лэтамбаӈгуда.
5 Н. Окотэтто
6 ----
7 Депутат лахана
8 Таславандаваˮ ӈока
9 Маняˮ округанаˮ ӈопой депутатӈэ тарана Нипа Николаевна Ядне ассоциациянаˮ Координационной Советахана мэвысь. Теда хурка тоˮолаха сероʼ тасламбамидоʼ газетанʼ паднапаханаˮ Х. Сэръяламдиканʼ серокута сер вадеˮядась.
10 Ӈэрм пепэцяӈэ "Ямал - нюˮ наˮ я!" ассоциациянаˮ Коордииациопной Советада ӈась. Тад тованда похона оргапизациянаˮ юʼ поданда ханда. Тикымʼ хэбидя яляӈэ сертаӈгуваˮ. Ненэциенаˮ маˮлаӈгуваˮ, фестивальмʼ, таддикад съездаваˮ мэтаваˮ.
11 Поʼ тяхана Россия янаˮ едэй депутатдамда тэрабава пэӈгуʼ. Хуркари районхатˮ, маркатˮ, хардахатˮ тэввы ненэцяˮ таремʼ маˮ, луцамʼ тэраба тасламбаˮ пябтоʼ, маняˮ поӈгаданаˮ ӈоб, сидя ӈэрм тердаваˮ тикан хамедамба пябна сава. Ӈокаӈэ таня ладарпанаʼ ниʼ серосʼ. Ӈахакуд таславэваˮ, поʼ пеля хэмяхад радиовна, телевидениявана газетахаˮна иланда вадеˮтаваˮ. Ӈамгэ тоˮолаха серо ненземдавы, хибямʼ нядавы. Маняˮ ненэцямаˮ ӈани депутатӈэ пыхыдадоʼ тэраванʼ харваниˮ ирманя нерняʼ мимбата тара.
12 - Тикы ненэцямаʼ хибя?
13 - Тедариʼ еркарада, нюмда хэгувдавэй. Ӈэрм янаˮ тиӈгывна ӈэда хардахаˮна иленинаˮ тарцямʼ пюрпата сава. Тикаваˮ юнета, манзаямʼ тидхалемба пиртя ӈэбта сероӈа. Лаханабта таборципой техэ саирканда вадидаˮ тэланава тара. Тарцямʼ хобнанаˮ тэраӈгодаӈэ ныхыˮна маланʼ няваˮ нерняʼ минреӈгуваˮ.
14 Мань ихинаниʼ ненэй ненэць есясипой, ӈамгэмʼ пирта? Ӈобкарт еӈгамʼ ни сертаӈгу. Хахаяда хардамна ӈэдалёрць нида пират. Тарана падродаˮ серта, газетахана падна, радиохавна лахана, ӈока еся тараӈгу. Тикы сер ханзерʼ тасла сава ӈэдакы? Тедаʼ им ӈэдараб, Виктор Степанович Черномырдинʼ тоˮолаха луцамʼ депутатӈэ тэраба пябтоʼ, маняˮ ненэцямаˮ хомбасиʼ тикахана лабторта. Луцинаˮ толыртоʼ ӈока. лахананадоʼ ӈаниʼ ӈока ӈэӈгу, ненэциенаˮ ӈэвˮ тэре сюртеӈгудоʼ.
15 - Нина Николаевна, Россия янаˮ Законахаˮна, маняˮ округанаˮ Уставхана Ӈэрм тер ненэциеˮ поӈгад, тэизувнанда, харта яхаданда депутатʼ тэраба сероӈа? Луца тэнзмʼ мэта вуни ӈэӈгу?
16 - Россия янаˮ Законахана вадеˮтяр яӈгу. тарця танябта тара. Маняˮ округанаˮ самбляӈг депутатӈэ тикы сермʼ нерня нива пэрˮ.
17 Гад малевахананаˮ мале вадець хорпа тара. Ӈопой поваˮ минханда ханда. Депутатданаˮ ӈэрм тер ненэцяӈэ илмаˮ ехэрана луцаʼ хэсь пиртада. Есянда ӈока ӈэбʼ, есяридаˮ сита минеӈгу.
18 - Коордпнационной Советахана ӈани ӈамгэ сермʼ тасласадаˮ?
19 - Законˮ ӈылняд ӈадиберпатоʼ тараˮ. Ассоциациянаˮ районхаˮна, маркаˮна ӈэда отделенияда ӈулиʼ вэнзерʼ манзараˮ, хонёда тоˮолахаˮ. Ӈамгэхэрт падроʼ ниʼ ӈадимдембюˮ. Ӈабцаквата тикы нинаˮ иламʼ теневадоʼ, ненэциедоʼ хэвханандоʼ сюраˮ. Пыдоʼ илаʼ пяныдм депутатӈэ нянаˮ вадеˮпатоʼ, тамна тяхаʼ сехэрэдамда ераӈгуваˮ.
20 Ти таʼ пирувна манзараваць. Етʼ тасламбавэваˮ, вадеˮмэваˮ ӈокась.
21 ----
22 Тэмдабираˮ, толабираˮ!
23 Ямалʼ хуркари сероʼ падыбада газетада "Красной Север" 1999 похона едэйвана ӈадибелаӈгуʼ. Юнʼ ненэцяӈгˮ ӈобкад пере мерʼ тэвормандоʼ еˮэмня, сиˮив яляхана няхарʼ ӈадиберта. Тикы нябимдей, тетюмдей, матдомдэй яляˮ ӈеӈгуˮ. "Красной Север" сидя толыркананда, хусувэй тет лабсахана округанаˮ, Россия янаˮ юнˮ ненэцяˮ мерˮ толабаӈгудоʼ. Тикы еˮэмня марканаˮ, районхаˮна ӈэда типографияхаˮна сертабаӈгудоʼ.
24 Сиˮив яляхана ӈопой, 20 страницахана париденя, хуркари ӈопяхана ӈадиберта. Таняна толаӈгода ненэць минхалёдаˮ статьиˮ хомбаванда хавна, теневана хибиˮ иˮ ядэробцоʼ ӈани таняӈгуˮ. Таддикад мядо терˮ, мэненаˮ, мэкад илемяˮ ӈобтаремʼ падаӈгуˮ.
25 Тарць харахана "Красной Север" сиˮив яляхана миневы терамда 8 страницаʼ пирувпа ӈарамдаӈгуда. "Красной Север" газетаʼ едэйваиа ӈадибелбата ӈодʼ, невхы похотˮ мэта сехэрэмда нидя ётʼ. Ӈобʼ мальӈгана юнˮ ненэцяӈгʼ мерʼ тэволаӈгуда.
26 Тад тованда поʼ пеляʼ ямбанʼ миртя 65 еся ӈэӈгу. Похона - 130 еся. Ниня манзарана пенсияхана мэна вэсакоʼ, пухуцяˮ, таддикад сайнормы ненэцяˮ "Красной Севермʼ" поʼ пеляхана 50, похона 100 есявна тэмдабаӈгудоʼ. Почтахад тамна мирцяӈгу. Газетамʼ тэмдаваʼ, нямарпаваʼ тид мима еˮэмня маркаˮна, районхаˮна етё
27 манзарана ненэцяˮ таняӈгуˮ. Газетамʼ толаӈгодахаˮ тэврамбадаˮ ядэртаˮ.
28 Тикы хавна "Красной Севермʼ" хусувэй почтахана хибяри тэмда пиртада. Индексада - 54390. Тамна ӈамгэмʼ намдаванʼ харвабатаˮ Салехардахана телефонда таня - код (291) 4-14-79, 4-07-72.
29 1999 похона толаӈгода ненэцяˮ юˮ каналавна телепрограммамʼ манэсартаˮ. Нюбедоʼ тиˮ: ОРТ, РТР, НТВ-4, НТВ-плюс, ТВ-6, СТС, ТНТ, ТВ-центр, АСТ, REN TV.
30 Ямалхана ӈадиберта "Красной Север" газета тэмдабираˮ, толабираˮ.
31 ----
32 Сава серʼ
33 Юдимдей яляхана санаторно-лесной школахана мэнаˮ ӈацекыˮ ӈобтʼ маˮлюрӈаць.
34 Иˮлика сермʼ мэˮӈаць. Хунилаваʼ мяˮканандоʼ ӈарка лабэтоʼ таняʼ, нюмдя дискозал.
35 Ӈарка ӈацекыˮ лптературной вечермʼ мэˮӈаць, тикадоʼ
36 луциˮ паднана Сергей Алексапдрович Есенинʼ нямна ӈась. Сиддоʼ лэтамбада Елена Юрьевна Рудык паднана нямна ӈокавна лаханась. Ханяна илевы, ханяна соявы, нидаˮ хибя ӈевыˮ, ӈамгэ яхана илевы. Илевандаʼ ямбанʼ ӈока сава сермʼ, падармʼ сертавы, ӈока сава стихˮ падвы. Ӈацекыˮ стихда толабидонзь. Ханяӈыда сёӈэ сертавыˮ. Е.Ю. Рудык сёё харта мэˮэйдась. Тикы серˮ ӈулиˮ сававна хаясь, ӈацекыˮ ӈока сава ӈамгэмʼ намдаць.
37 Литературной вечер пуданахана тамна сава серˮ ӈась. Санаторно-лесной школахана тохолкода ӈацекыˮ стихˮ падыбиˮ. Тиканда, хартоʼ падвыдоʼ стихдоʼ толабиць. Пыдоʼ хавнандоʼ стихдаʼ толабавы Галииа Николаевна Наумова. Стихдоʼ малˮ илаʼ нямна ӈаˮ. Тикана мэвы ненэцяˮ ӈацекы толабавы стихˮ малˮ савуядонзь.
38 Ӈацекыˮ ӈулиˮ сававна инзелець. Мятоʼ мюй падтавы, падаркана сертавысь. Толь ниня серекабтʼ танясь. Харадʼ хэвдяркана Сергей Есенин тадма ӈыдысь.
39 А. Ламдо
40 ----
41 Тыˮ пэрма
42 Хартоˮ илеванʼ харваˮ
43 Ямальской районхана мале няхарʼ поʼ СОХ "Ямал" манзара. Тикы хартоʼ тыдоʼ мэта ненэциеˮ организация. Ервотадандоʼ Леонид Сомдерович Вануйто тара. Тандая газетанʼ паднанаваˮ Федор Карский хомбавэдась. Няданда тыʼ пэрмандоʼ ханзерʼ мимамʼ серокута серʼ хонравэдась. Лаханакуромадиˮ ӈылнякуна ти паддаʼ.
44 - Маняˮ тэре ӈабцата няхарʼ сермʼ нёдаваˮ. Серо нюртей выӈгана иленя иенэць ӈопой яляʼ пирувна илебата ниʼ тараʼ. Пыда мэманда подаˮ, таддикад нютаˮ, нютаˮ ню мэманда ялэˮ мале теда маниебтоʼ сава. Ӈэта ӈылы янда ервӈэ хэбнянда ненэць тамальӈгана таремʼ иле пиртада.
45 Маӈгабада хибя ямдаʼ ӈэда ныхымасяӈгу. Маняˮ манзаяваˮ янамбовна индя ӈутʼ мита. Тамальӈгана харта хамедаӈгуда: "Ӈа. мань яниʼ ервадмʼ ӈэвэдамнё. Теда таӈок тымʼ мэпниʼ
46 таравы. Ӈобʼ хасава нюмиʼ тохолкомахаданда тандая сиˮми нядабаӈгу. Нябимиʼ сехэрэми нёдая, выӈгана тыˮ пэртяӈэ тарая."
47 Выӈгана илена ненэциенаˮ таремʼ илелпатоʼ, хусувэй ӈамгэдоʼ таняӈгу. Маняˮ ӈани саць нядаӈгодаваˮ. Пудана похоˮна ӈэрм тер ненэциеˮ нюˮ институтахаˮна сабе ни тохолкуˮ. Силдоʼ хибяхарт нерняʼ ни пэрˮ. Ӈацекы тамальӈгана тохолкода. сяхаʼ харта нисяда ма: "Тохолкованзь хань. Пунацей ныхырʼ ӈарка ӈэӈгу!" Маняˮ есьнаˮ ӈоквомахад, ненэциеˮ нюʼ тохоламбаӈгунаˮ.
48 Ӈопой ӈацекэваˮ Владимир Окотэтто Тобольскʼ хардахана сёбар ненэциеˮ институтахана тохолку. Таняд томахаданда Сё-яхаʼ хардахана нитаˮ ню тохоламбаӈгу. Пыда сехэрэвнанда, ӈани ӈацекыˮ ханлаӈгудˮ.
49 Теда тад имʼ ӈэдараб, хусувэй ӈаркамбой хардахана сиˮивмʼ
50 пота ӈацекыˮ юрмян ӈэсетыˮ. Юкад вата ӈопой класс ёльцяндʼ сидяриˮ, - тетриˮ тэвсетыдˮ. Таӈок ӈацекыˮ ханяна ханӈаˮ. Тикы сермʼ пирувпанаˮ етре ненземдамбаӈгуваˮ.
51 - Неновна пэртя манзаяраˮ ханзерʼ миӈа? Хибя сидда нядаби?
52 - Маняˮ мале няхарʼ поʼ манзараваˮ. Ӈокханда хартоʼ иленя ненэцяӈгатˮ тэмдавэваˮ 16 ёнар ты. Ӈавнанда есясипой манзаяваˮ пяваць. Хибяхарт сиднаˮ нись пядабю. Нюртей поʼ няхарʼ ёнар тымʼ едэйвана сертабада сехэрэнʼ тэврэйнаць. Нябимдей похона мале сиˮив ёнар тымʼ танаба таваць. Тикынаˮ ӈани хабаръянаць. Лакамбой таремʼ яебтываць.
53 Хусувэй поʼ 150-200 тонн ӈамзамʼ мирдаць пирӈаваˮ. Янамбовна хабарта мэтаваˮ серма несэймдаӈгуваˮ. Ядембада мядʼ мюня ненэциенаˮ яханаӈгуˮ. Тэнаˮ ӈамзахадʼ ӈобкарт ӈамгэ янʼ ни хаюрт. Тикы еˮэмня Сё-яха хардахана етя хабарта мэта заводмʼ ӈабтаӈгуваˮ. Тедаˮ тет тинваˮ, няхарʼ тракторваˮ, тет ӈаркая машинаваˮ.
54 Округахананаˮ манзарана организацияˮ ӈоб толас ниʼ ӈаˮ. Ханяӈыдоʼ тэре сиднаˮ маниеˮ, ӈамидоʼ сиднаˮ нядабаван харваˮ. Ӈобтоʼ ОА "Ямалтранс-строй", тикы еся сехэрымʼ сертабадиˮ организация. Ервотадоʼ Игорь Владимирович Нак. Ӈамзаваˮ, халяваˮ, носинаˮ хобˮ ӈавравна, ӈани нянанаˮ тарана ӈамгэмана тадабинаˮ.
55 - Сиддаˮ нядабаванда ерводаˮ нядаӈгу?
56 - Сиднаˮ нядабаванда ерваваˮ округанаˮ Ӈэвахы Ервʼ марцьхы Виктор Григорьевич Толстов. Нянда вэбаʼ ирыхана ханӈадамзь. Есядамиʼ пюрӈадамзь. Няхарʼ поʼ ямбан нямвэваˮ матʼ юр ёнар есяримʼ таць. Теда тикунаˮ пуня митунаˮ.
57 Совхозʼ юр процент пирувна пядабидоʼ. Маняˮ сидна иябири пеляʼ пирувна иядабиˮ. Тарси хабарпада тэнаˮ ӈокад ӈока. Небой поʼ 240 тонн ӈамзамʼ мирдаӈавацʼ. Совхоз тамалʼӈгана 150 тоннримʼ хамедацʼ.
58 Ты пэрма сермʼ минрена управления нерняӈы ялэˮ няʼ ни сыр. Ӈэсыхана 1400 ёнар тыˮ таняˮ. Мась, ӈани манзаямʼ ехэраˮ. Ӈадʼбята тюку похоˮна ханяӈы ӈэсыˮ тер хабарманзь 200 ты тамбиˮ. Няхарʼ поʼ тяхана маняˮ ервханаˮ манзетываˮ, совхозˮ тыˮ хараси ямʼ ӈаворӈаˮ. Янаˮ нина тынаˮ ӈокмаˮ. Хартоʼ илена ненэциенаˮ тэри мэсʼ.
59 - Собраниханаˮ 800 тымʼ ерводаˮ вадеˮцетынё. Ханзерʼ ӈэда тыˮ?
60 Виктор Григорьевич Толстов распоряжениемʼ падась. Тикы падаркана тэсьда райопхаˮ ты мицʼ сероˮӈась. Маняˮ еняʼ 800 тымʼ. Надымской районан миць таслаць. Пилюˮ ирыхана Надымʼ мартʼ ядэрӈадамзʼ. Ты таняˮ тэвравамʼ ӈулиʼ савовна таславаць. Ӈамгэ пирхана яваˮ есясялма. Тикы тыˮ ӈани хаиˮ. Теда етё таславы тыˮ пэртяˮ маниейдоʼ.
61 Маняˮ няднаˮ вэтёда серʼ ни ӈаʼ. Ӈодʼ таняд вадаʼ тоб, таминанаˮ явʼ тяхаʼ танаӈгунаˮ.
62 ----
63 Тохолкованʼ харваˮ
64 Салехардахананаˮ ГПТУ-12 таня. Таняна хуркари теда тюˮ миндя илебей ӈацекыˮ тохолкуˮ. Тэнзодоʼ хуркариˮ. Округанаˮ тиӈгывна ӈэда хардахат товыˮ. Сиддоʼ тохоламбда, ервандоʼ няʼ лаханакурӈанинзь. Пыда ӈавнанда НовоЙ Портхана манзравысь, ӈацекыˮ ӈобтаремʼ тохоламбавысь. Теда училищехана нябимдей поʼ манзара. Нюмда Запольских Михаил Петрович.
65 Пыда тикапа тохолкода ӈацекыда ёльце савовна вадеядась. Училисчехана ӈацекыдоʼ ембапидоʼ, ӈавламбидоʼ, халтамбидоʼ. Тохолковандоʼ еˮэмня юркад вата тет есямʼ нямарпиˮ. Ӈавар пирембадаӈэ, сэдорапаӈэ, секретарь референтаӈэ, ту ӈано мэтаӈэ тохоламбидоʼ.
66 Няндоʼ тэворпаниˮ халтагурма ялядоʼ ӈэвысь. Тиканда ӈока ӈацекы хомамиʼ яӈгу. Нюртей не ӈацекыˮ няʼ лаханакурӈаваць. Пыдоʼ ӈавар пирембава пяюв тохолкуˮ. Еркарадиʼ Вануйто, Яр-Сале хардахад товэхэʼ. Нябихиʼ Антипаюта харад няд ӈахаʼ Ядне Э., Вануйто Э.
67 Пэвсюма няна, нибтоʼ тохолкуʼ, хартоʼ вадавнандоʼ лаханакуртархаˮ. "Няръяна Ӈэрм" газетахана падвы лаханакуˮ толабиˮ.
68 Хасаваʼ ӈацекыˮ мятʼ хаядамзь. Мань товани няювʼ ӈобтаремʼ, сертоʼ яӈгусь.
69 Хартоʼ серодоʼ пэрӈаць. Хонёдидоʼ хуныˮ, нылананидоʼ ныланаць. Няхарˮ илебей ӈацекыˮ няʼ лаханакурӈадамзь. Ӈопойдоʼ Тазовской районхы Ӈэдя няд товы, нябимдей поʼ тохолку. Нюмнда Тэсида Г. Лаптандер А. Белоярск харад тер. Няхаромдэдоʼ Ер яха тер, Неркаги Александр. Сидяӈэ пыдиʼ пюртей поʼ тохолкухуʼ. Пыдоʼ ту ӈано мэмаˮ няюв тохолкуˮ. Хасаваʼ вадавна ёльце савовна лаханакурӈаваць. Пыдоʼ тохолкован сацьри харваˮ. Училищемдоʼ малеˮмахандоʼ солдатӈэ хандаˮ. Тикы пуд тампа тяхаʼ тохолкованзь хандаˮ.
70 Ф. Худиʼ падвы
71 ----
72 Хынёсиʼ илеˮ
73 Харсаимхана школандоʼ хавна нюдякоця ӈацекыˮ садик таня. Тикана ервдандоʼ илебей не Корюгина Наталья Гениадьевна тара. Пыда вэба ирыхадʼ манзара пэвы ӈэбта ӈодʼ садик ӈацекыˮ пяювʼ сертавэда ӈока. Наталья Геннадьевпа Курганской областьхад товы. Институтмʼ ёльцемяхаданда мале няхарʼ по манзара. Харсаим ӈэсынʼ тэри таремʼ тэввыць. Пыда садикхана мэнаˮ ӈацекыта нямна лаханакурӈась:
74 - Маняˮ садикхананаˮ сиˮив юˮ ӈацекыˮ турӈаˮ. Малӈэ Харсаим тер нюˮ. Ханяхэна ӈацекынаˮ небянадоʼ, нисянадоʼ нидоʼ тамбйуˮ. Садикваˮ ӈарка. Таминда ясля ӈаниʼ тюкона ӈа. Подготовительной классва таня. Тюку поʼ ӈацекынаˮ хартоʼ вадидоʼ тохоламбаˮ пяць. Ӈысма вадамʼ пэртя школахад турӈа. Ӈани ненэциеˮ вадиˮ нидоʼ тохоламбюˮ, сиддоʼ тохоламбувнда яӈгу.
75 Тиканаʼ хавна ӈацекынаˮ санарцетыˮ, пирдырцетыˮ. Ханяцэхэна артистаӈэ хэсетыˮ. Теда едэй помʼ ядабтамбувнзь хамекурӈаваˮ. Тикы няюв маняˮ садикхананаˮ кпигаваˮ, газетаваˮ
76 ӈока. Ӈаркамбой ӈацекуˮ
77 толаӈгосетыˮ. Ясляхана мэна ӈацекуˮ программадоʼ
78 яӈга. Пыдоʼ пыхындоʼ ӈар манзаиʼ пэрӈаˮ.
79 Нюртей тода ӈацекыˮ ӈулиʼ маяндорцетыˮ. Сидя сиˮив яляʼ хэмяхад харто ӈаворць тухурӈаˮ. Сянакодваˮ книгадваˮ Аксаркахадʼ ӈэдарамбиˮ.
80 Ӈацекынаˮ нйудя ӈэбто ӈодʼ, вадёдаˮ варемдоʼ мэӈаˮ.
81 М. ЯРʼ падвы.
82 Б. Жилин тадтавы сидяӈгахана маниеиараˮ садикʼ ерв Наталья Геннадьевна Корюгина. Ӈани ӈопой сидяӈгахана нацекыˮ юркотаˮ. Хасава ӈацекы толаӈгу.
83 ----
84 Культураʼ илʼ
85 Хабиˮ паднана
86 Тад товнда, едэй 1999 похонаʼ, лимбя иры пудана яляˮхана хабиˮ паднана, Р.П. Ругин сояˮма яляда ӈэӈгу. Маня округахананаˮ тикы сертʼ мале хамекуˮ.
87 Матʼ юˮ поданда ханда. Пыда Салехард маркна иле. Хуркари илемя, стих падыби. Москов маркна ӈопой стихмпдаʼ сём мэта сёӈэ сертавэдась. Юнда яˮ серˮ нимня ядэрӈа. Падвы книгыда, ӈани ёˮ параӈодиˮ ненэцяˮ хартоʼ вадавнандоʼ падвыдонзь. Р.П. Ругип хабиˮ культурамˮ саць нерняʼ минреда. Тедаˮ пыда Россияʼ янаˮ ӈоб ненэцяӈэ толы. Пудана похонаˮ "Ямальской меридианмʼ" нюбета журнал ӈарка ервӈэ тара. Хэвыˮ сиˮив яляхана, Салехардаханаʼ ӈэда ГПТУ-12 тохолкода ӈацекыˮ маˮлыць. Хабиˮ паднанамʼ ӈатець. Мань ӈацекы хонрамба пядамзь:
88 - Р.П. Ругин мядоманзь тута?
89 - Ӈааˮ. Теда паднанаˮ хабимˮ манэтаваˮ.
90 - Пыдараˮ, сяхариˮ падвы книгыда толабасетыда?
91 - Яӈгу. Сяхарт ниняць толабюˮ. Тюку тенд тарця поэтʼ танявахад ехэраваць. Маняˮ нянаˮ, сиднаˮ тохоламбда луца вадеˮӈадась. Стихда тась.
92 - Поӈганандаˮ хаби тэнзмʼ мэтидаˮ таняˮ?
93 - Хабинаˮ тэнэхандоʼ сядоларыˮ, малˮ пин хуныдаць.
94 Таремʼ сырпани, маˮлёвы поӈгана теда тюˮу миндя луца ӈацекы манэӈадм. Някундоʼ хаядм, хонрэйян:
95 - Луца ӈацекэда ӈэдарахаданё? Сиддаˮ ныхыриʼ тюконʼ тэвраса?
96 - Яӈгу! Маняˮ харнаˮ товаць. Пэрмандаваˮ яӈгу. Тадре ӈэсьӈо инзелеван харваваˮ.
97 - Р.П. Ругинʼ падвы илемя толавэраˮ таня?
98 - Ӈамгэнд хабиʼ падвы, маняˮ харнаˮ луцинаˮ падвы книгахартʼ тола ниваˮ пирасʼ!
99 Та ёльцяӈганаʼ ӈатенаваˮ то. Тикы яляʼ пэвсюма няна Р.П. Ругин иланда, ханзерʼ манзаравамда вадеˮӈась. Падвы падрода, стихдаˮ хабиʼ, луцаʼ вадавна толабись. Тохолкода ӈацекыˮ тад товнда сояˮма ялянда няюв сейвана, сёнзяʼ мюмня ханта вадиˮ, стихотворений вадеˮӈаць. Лахарёмда малемяхаданда ӈацекэхэˮ падвы книгыда митерӈась. Тюку тадтёда сидяӈгахана маниенараˮ хабиˮ паднана Р.П. Ругин. Няби сидяӈгахана сояма хардада Питляр.
100 Ф. Худиʼ падвы