1 МАНЬ САВА НИНИˮ
2 ңани ңопой помʼ мадаваˮ. Илеˮмяваˮ нянандаˮ хаёда. Поваˮ ңани похот тоенась. Ханяңэхэна мэтинаˮ ялэнаˮ сибяць, саңговоңаць. Хусувэваˮ харта яхананда инда ядмʼ мэць манзарась.
3 ңэрм терңэ округанаˮ илаңгана пуняна ниваць мийˮ. Депутатнаˮ еняˮ ңэда Законˮ нямарпиць, ненэциенаˮ нядабиць. ңани яхатˮ Ямалмʼ манэˮманзь хуркари хибяˮ турңаць.
4 Тад тованда 1999 поваˮ тамна тоенаңгу. Хуркавна ңодʼ Едэй похона манзаяваˮ нёховаˮ ңуямламбюˮ. Тидхалевндаваˮ ңока. Теда ассоциацияваˮ ңахакуд 2000 похона тованда тэраңгова яляʼ няювʼ хамекобта тара. Нерня ңопой мандалңэ миңгаваˮ!
5 Тамальңгана ңэрм тер нинаˮ едʼ сертабада таслирона яхатоʼ хаˮмортаˮ. ңопой иˮңудм мэтаʼ тоолхаваˮ ңэңгуваˮ. Вадинаˮ минаць тебертаˮ. Харнаˮ ненэциенаˮ поңгадʼ хынибэй хибяˮ ңадибертаˮ. Мэтаваˮ сехэрэнаˮ ңобʼ пудʼ тереңгаңгуˮ.
6 Мань сава ниниˮ! Няндаˮ Едэй похона сейхад миндя вадиˮ хэтыбидм. Нёдаˮ хаңгурˮ, нидаˮ нядабидаˮ, нюдяˮ тохоламбидаˮ. Варераˮ ңэя!
7 Л. Евай,
8 "Ямал - нюˮ наˮ я!"
9 ассоциациянаˮ президент
10 ----
11 1999 поʼ -
12 тэвасиʼ по
13 Теда мэта поваˮ Японияʼ терˮ Тэвасиʼ поңэ пэрңадоʼ. Тикы похона соявы ненэцяˮ харто пыхыдаридоʼ хамбилеˮ. Хибяхарт нянандоʼ ни тараʼ. Саць иˮңудота хибяˮ. Сиддоʼ таңыламдамбадиˮ, ңахакудʼ хамедамбидоʼ. Илаңганандоʼ ябдана ненэцяˮ. Хусувэй серкана хэвняʼ санарта ниʼ ңаˮ. ңопой нёдана сехэрэмдоʼ ёпа нидоʼ пэрˮ. Хэвханандоʼ мэна хибяˮ тикы няхатоʼ етре нысыңгаˮ. Ёльце нямбараˮ, ханяримна таняримна лаханабнандоʼ, нярмаңганаˮ ниʼ ңаˮ.
14 Лаханако нята нидоʼ, пирувнандоʼ хонрамбидоʼ, ңобкарт вададоʼ пай ниʼ хамаңгуˮ. Саць хамзана няханатоʼ ёльце поиˮ. Тарсиʼ нядандоʼ переня ненэциедоˮ ңахаку маниейдоʼ. Сяхарт вэбтыңэ ниʼ ханасˮ. Сава ненэцяˮ. Сянакова сермʼ саць харвобтадоʼ.
15 ----
16 Тецъда Ирыʼ ңацекэхэˮ то
17 - Ирикэй! Ирикэй! Сит ңатевов! Хадэцяваˮ табцда ямаваˮ!
18 Едэй помʼ ядабтамбада ңацекыˮ ңобкана тёресетыдˮ. ңамгэ пирхана тойрёˮ ңадимяˮ. Нэда нё сивня ңаркая падмʼ няˮамба Тецьда Ири ңадимя. Пумнанда не нюда - Сыране миңа. ңацекыˮ тэре сидиˮ няку лекэйдˮ. Иримдоʼ хадэцяко хэван ңэдарадоʼ, пэдюць хамедавы ңамдёрця ниʼ ңамды, манзь ханада:
19 - ңацекыей! Сиддаˮ ңаха намдадм. Етя тодамзь. Мядонзэй тэврадамзь.
20 Едэй помʼ ядабтамбада ңацекыˮ мирбидоʼ хуркариˮ. Тэва ямб тёнякоʼ, сэрʼ нохоко, тэвасикоʼ. ңани нувʼ, яʼ сармикэцяˮ хадэцякоʼ нямна сёмʼ ханаˮ. Нюдямбой ңацекэкоʼ сэвˮ вэсоʼ муноциета Иримдоʼ манэцетыдоʼ. Хацяʼ тосаркабтом, тарця ненэць манэˮмэдоʼ вуни таня. Тецьда Иримʼ нядаба сидя тэвасико тараңахаʼ. Лакри маха харёй Парнэ пухуця ңадимзеты. Хэвхэда ядаʼ ңамгэ пиратʼ терсяламсеты. Таддикахад ңаниʼ ехосеты.
21 Тецьда Ири ма:
22 - ңацекыей! Хадэцяваˮ табцдахаваˮ! Тарсиʼ тид ңэванода!
23 Нер ңавнанда Парнэ пухуцяʼ хуркари нямдотана ңылекыˮ тэвравы. Хадэцякомʼ талеребтевэдоʼ. Тидхана ңацекыˮ помна худрырңаˮ. Сидя тэвасико варемдиʼ мэңахаˮ. Нер ңацекыˮ трава мальңгана, Тецьда ириндоʼ еся ядцямʼ нямдотана ңылекаˮ талевыˮ. ңобанзерʼ талеймʼ ходоʼ. Ириндоʼ ңыл тэврадоʼ. Еся ядцянда ханада, яʼ ед ңопой ладхалңада.
24 - Ябткоенʼ, ңани тарцядм нидмʼ ңэңгу! - ңылека ма.
25 Тадхава малʼ ңобкана тёрейд:
26 - Хадэцяко, табцад!
27 Хадэцякоʼ хуркари тухунаˮ табцы. Лабэс мюй ңарханда ялэма. Тандая савовна ңацекыˮ тра пэядˮ. Сямянхатʼ выдабэйдоʼ Тецьда Ирихидандо хуркари мядонзэй няˮмарпиˮ.
28 Япония яʼ илаңгана Едэй 1999 поваˮ - Тэвасиʼ по. Тиканда хадэцякоʼ хэвхана хуркари тэвасиңэ ембдёда ңацекы ңокась. Ямбъя хаводоʼ ңылия лябтаць, паллыць, сюртяваць. Тодоʼ сава мядонзэй нямаць.
29 Тюку тадтёда сидяңгахана маниена ңацекыдаˮ Салехарад терˮ. Хадэцякомʼ сюрте траˮ.
30 Х. Нямбараʼ падвы
31 ----
32 Н. Некрасовʼ падвэвна
33 Тецьда
34 Пэдараʼ нимна вывнана
35 Мерця вуни ңаˮ,
36 Сядоˮ нид хурнана
37 Лохортако вуни ңаˮ,
38 Тецьдако мирна,
39 Харта ёда манэсарңа:
40 Танзерако хадконда
41 Пэдарыхы сарпякуда
42 Малʼ тохоравамʼ,
43 Малʼ салмаравамʼ
44 Тецьдар мирна,
45 Харваˮ нимна ядриңа,
46 Идеˮ нимна мирна.
47 Муноцяңгавахаˮната
48 Пыда вэдепюрңа -
49 Тохоравдавэʼ
50 Я нёя хаюˮ.
51 Харвʼ таркахаби
52 Сыра тондаяда,
53 ңанинзерˮ синдаяда.
54 ңарка, Нюдя есиˮ, тоˮ
55 Салабитоʼ мёё ңэвамʼ,
56 Сыраʼ ңаниʼ мэё ңэвамʼ
57 Пилиˮ ти хорпида.
58 Хаеркана ябереˮ,
59 Сыраʼ сэвʼ ябереʼ -
60 Пэсьдана хаерако
61 Сянакодарахакоко.
62 ----
63 Л. Лапцуй
64 Сянакуˮ
65 ңарка выʼ яваˮ
66 Харˮнаˮ вадёˮмаваˮ.
67 Тэсавэйʼ яваˮ
68 Маняˮ мэнеңаваˮ,
69 Тэваˮ харта ңока.
70 Харˮнаˮ тэхэˮтанаˮ
71 Маняˮ ненэцямаˮ.
72 Лаханакохоˮна,
73 Пыя ням синёʼ
74 Синдабабˮнанда
75 Тэда нида ётˮ.
76 Тедаʼ тюˮуʼ миндяˮ,
77 Инзелехзрңадаˮ -
78 Нерня мэтамд,
79 Пыдар харт тэмд
80 Хо тюрхана
81 Нёр яебтамбюˮ,
82 ңартиңы иняʼ
83 Нёр лабидембюˮ.
84 Ядрибˮнанда
85 Пыяʼ малханаё
86 Сехэрэнда мюймʼ.
87 ңылˮ сырахавамʼ
88 Сит маниеңгуˮ.
89 Выʼ яни тыˮ
90 Ситя пирхава
91 харта яңгориңа.
92 Янаˮ ңацекыˮ
93 Тыдоʼ мание
94 Мерʼ вадёдаңаˮ.
95 Хусувэй тэдоʼ
96 Харта нюбета.
97 Маняˮ Едэйковаˮ
98 Тыда ерамба,
99 Тыта поёʼмана
100 Ядэсумбасеты.
101 Янаˮ ңацекыˮ
102 Ебцкондоʼ мюд,
103 Ванотанаʼ мюд
104 Санаˮмахадандоʼ,
105 Тынзямʼ санопа
106 Тэхэˮ ядриңгуˮ,
107 Ти ңадьбятоʼ
108 Ян ңацекыˮ
109 Тэдэ сянаковамʼ,
110 Тыʼ сянакубцмʼ
111 Хартоʼ мэнеңадоʼ.
112 Маняˮ Едэйковаˮ
113 Сёˮнаˮ харахаˮна
114 Маняˮ ңаркаңаваˮ
115 Хупа сяхаринда
116 Хынабтамбадаваˮ.
117 ----
118 Харˮнаˮ янаˮ хибя
119 Хубта янда поймʼ
120 Мадабабˮнанда,
121 Сехэрэнда мюймʼ
122 Сирыбабˮнанда
123 Имдя ибеˮңая.
124 Хоʼ таркараха
125 Сидя ңарка нямдмʼ,
126 Сидя таркаляңгмʼ
127 Хойʼ сюмбараха
128 Махаконда ниʼ
129 Моёпюлаңгуда.
130 Пэвдя пихина
131 Тэнд ңэваʼ иня
132 Нюхулариңая,
133 Нёр харебариˮ,
134 Тохобэйʼ мюмня
135 Таремʼ миндяханда
136 Харта мята нимня
137 Нямдорэдаңгуда.
138 ңэрмʼ харпоˮ едʼ,
139 ңэрмʼ нумгыˮ ңылʼ
140 Тидˮ ядриңгу,
141 ңобʼ нявотаңгу.
142 Сидя мало сэв,
143 Сидя ңарка сэв
144 Тябихобˮнанда
145 Сита ңар нида
146 Пыда сянако
147 Пилиˮ няцеты.
148 Тыˮ нямдо мэта
149 Нида яркыба
150 Пыда худкорңа.
151 Тыˮ турована
152 Нида туротаˮ.
153 Нида яркаванзъ
154 Няби пенда ниʼ
155 Тынзяконда мярамʼ
156 Моёпюлариңгу.
157 Вэдандарка тымʼ
158 Яркыбададаремʼ
159 Пыда хоˮлертыˮ.
160 Нида Сюрбаядˮ
161 Тыˮ тотревʼ,
162 Нявоталаядˮ,
163 Пыдоʼ туросумбиˮ.
164 Малʼ ңобоˮлад
165 Тодоʼ мовахана
166 Нида яркыбида.
167 Тынзяʼ мяраʼ мюня
168 Сэвˮ ялкадарңаˮ.