1 СИДЯ ВАЙ
2 Нгвнанта хунананта сидя Вай танявэхэʼ.
3 Сидя Вай яхаʼ вархана илевэхэʼ.
4 Ича нгабченя ямдʼ хаˮ морта яхаʼ лата юрˮ чибя, тарча яхаʼ хэвхана илевэхэʼ, яхаʼ малхана.
5 Яхадиʼ сидя таркавна хэвы, мячиʼ тарка саляна нгэвы.
6 Чики сидя Ваянт нгока тыдиʼ юнггуˮ, тыдиʼ няхарʼ юрˮ.
7 Няхарˮ юрˮ тэкочамчиʼ малламбада нгарка Вайʼ самблянгг нгачекы таня.
8 Нгарка Ваяр несавэй, нюдя Ваянт неда тамна юнггу.
9 Нянта мякана иле.
10 Сяны нгэбтуʼ нгоˮ нгарка, Ваяр нивˮ манˮ:
11 - Нюдя Ваеˮ, нумта чедавʼ нгэрёйма.
12 Тэмиʼ няхарˮ юрˮ.
13 Илебчамʼ хадаванчь хэхэваˮ.
14 Тэсавэй хантаниʼ.
15 Нюкчини мякана хаёяˮ мядмʼ лэтрамба.
16 Нюдя Ваяр Манома:
17 - Нгэява.
18 Таремʼ мамбат нгамгэда вэва?
19 Хуняна юркыдˮ, нгорнга.ˮ.
20 Там мядикодамтуʼ сертаˮ.
21 Нгамгэриʼ толаха мядикоча нгэбта нгоˮ, нгамгэ нгарка мяˮ нгэвна, мяпой мядикоча.
22 Нгарка Ваяр самблянгг юдмян хан нгэрха.
23 Ханянгы черсавэй нгэдякыˮ, ханянгыдуʼ черсяда нгэдякыˮ.
24 Нгарка Вайʼ не юˮ ханмʼ сода.
25 Хуняна ямдэйдˮ.
26 Нгэрёʼ ёльчанггана, марˮ ирыхана, ямдавантуʼ нгарка пэвдё ирымʼ няхарнгэ мэнгаˮ.
27 Нгарка пэвдяʼ ёльчемахад хача хаерта нгадимя.
28 Чедавʼ ильчаˮ нгоканюˮ.
29 Нгарка Вай манома:
30 - Тюконʼ нгэсохаваˮ!
31 Мятуʼ таʼ мэдуʼ.
32 Тэкочидуʼ матˮ ю ˮ нгэдакы.
33 Нюдя Вай сырнга:
34 нерняна неро варта яха нгэвы.
35 Тяханянгы хэвхад илебчаˮ нгадиˮ.
36 Нгарка Вай мякад нгадимя, ма:
37 - Ебтовˮ, нгамгэмʼ манэнганэйˮ?
38 - Тайна ханъеда нгэрха.
39 Чикы яхана тад ханелманчиʼ сямян ханамчиʼ малнгэ пандэйдиʼ.
40 Нгарка Ваяр манома:
41 - Чебтаʼ ямданггуначь, нгобˮ сябуни чер юнггу.
42 Нюдя Вай ма:
43 - Сябур черсяява.
44 Тад ямдаванйʼ ёльчанггана масиˮ нгобʼ - сидя ильчамʼ тамна хадангуниʼ.
45 - Юнгговˮ, сябуни чер юнггунюˮ.
46 Таремʼ вэва.
47 Нгарка Вай чет парисемʼ подернга, нгэдалэйˮ.
48 Нюдя Ваяр мякана хаи, ханода хуняна ямдаванчь хамидамбдакы, сода паклембадакы.
49 Яляʼ ямбанʼ нгарка Ваянт сынгрёда юнггу.
50 Хурканʼ нумта пэвсюмя, Нгарка Вай юнггу.
51 Нгамгэда хадкэйˮ?
52 Нганиʼ яля то, нумта ялэма.
53 Нгарка Вай тамна юнггу.
54 Пухучада манма:
55 - Нгарейˮ, вэсакоми тованʼ ни харваˮ, масиˮ нгока илебчамʼ хадавакы.
56 Ёходакы?
57 Падар ханьˮ, пюлсур.
58 Нюдя Вай ма:
59 - Пюванчь хэбˮ нани нгодˮ чедавʼ мял хавраˮ!
60 Мюдми!
61 подеркамиʼ.
62 Сеней недаʼ мюмня пырдариʼ ямдадˮ.
63 Мань нгани нями пюванчь хантадмʼ.
64 Нюдя Вай нябанта мюдмʼ подернгада.
65 Мята хавра, ханода хура.
66 Нябада пырдариʼ ямдэйˮ.
67 Нгани ханда сиˮ нгахат мэтада нгэдакыˮ, сидя нямд пай.
68 Чикаюда подернга.
69 Нгамдюрта нгылʼ, ханʼ вэняʼ хэвувна сидя еся нгын пакле.
70 Нюдя Вай нянта хэˮ мяʼ мюмня хая.
71 Нгэдалёвада сававна нгади.
72 Хуркари илебча хадабасьтавы, яхасьтавы, тамна нерняʼ хэсьтавы.
73 Нгамгэʼ ёльчанггана нерняна нгобˮ яхаку нгадимя.
74 Нюдя Ваяр тяханяʼ тэвыˮ.
75 Ов, такэми нгамгэ?
76 Тад манэнгада:
77 нгарка Вай хабэйнгэ лясы ханта ниня.
78 Нгэвада мынггхана ядаравы.
79 Нюдя Вай ихинянта ма:
80 "Ов, некаеми мале хадаравыˮ.
81 Хумбачиˮ сябумта черсядангэ пэрмэда, тамна сян илебчамʼ хадаванʼ харвавакы.
82 Хаваримта ховэдаˮ."
83 Нюдя Ваяр нерняʼ нгэдалэйˮ неро яхакуʼ варувна.
84 Яхакуʼ няавхана сидя сырасавэй лангг танявы.
85 Тэвмахаданта манэнгада:
86 сидя сяд падвы ядермэхэʼ.
87 Екарˮ, хаманчь ядермы нгэбˮ нанчиʼ, масиˮ ханевакэхэʼ?
88 Тадхавʼ сидя сяд падвы нюдя Ваямʼ манэчь нгынчиʼ нярхаладиʼ.
89 Нюдя Вай чикавахана нгамгэнʼ нгаченанггу?
90 Нгынамта нгобчикы нэкалнгада, сидя еся мынггмʼ нэкалнга.
91 Сидя еся мынгг малдиʼ халэв нялха.
92 Сидя мынггмʼ нгэдтангаюда.
93 Сюдсавэй хаяхаʼ.
94 Сяд падвэхэʼ ханяʼ хантнгахаʼ?
95 Хась лясэйхаʼ.
96 Нюдя Ваяр тяхаʼ нгэдалэйˮ.
97 Сянат хунат мимбата нгодˮ пэдараʼёрканʼ тэвыˮ.
98 Пэдараʼ ёркахана юˮ нгарка мяˮ.
99 Еръи мядʼ сингганя нгобˮ нгамчёда.
100 Сяд падвы ерв нгэдакы, сята малнгэ падарцавэй.
101 Нюдя Ваяр сырчь ихинянта ма:
102 "Чедахавʼ хачерʼ мэсь сава?
103 Сяд падвы ервмʼ нгынхана пябˮ нани пирдаленггув?"
104 Тад нгынамта нярхалада.
105 Мынггда матпой.
106 Нгобˮ мынггхана сяд падвы ерв хадабада ни нгаˮ.
107 Матˮ мынггхана енерпата масиˮ хадабсуда.
108 Чедахав нюдя Вай тыда сяра, тад нгынамта, мынггда нгобкана нямыда, мядоˮ няʼ лынггара хая.
109 Нгулиˮ янамбоковна минга, сесарёмтв ниичь намдˮ.
110 Таʼ ёльчанггана сяд падвы ерв ханʼ ниня нгамты, яндавна сысумби.
111 Нгамгэрт манэтада юнггорха.
112 Тад сокамта екада, мятʼ тю.
113 Пихиня адертадуʼ нгулиˮ юнггу, нгобкарт вэнеку, нгавэй нгачекы ядерчь.
114 Нюдя Ваяр ханоˮ помна лынггара еръи мятʼ тэвыˮ.
115 Чёрейˮ:
116 - Сяд падвы нрвэˮ, мяканант хась пянггур, пинʼ тарпнггун?
117 Мядʼ мюня чёр совононта:
118 - Хибя то?
119 Нетʼ пихиня хибярт юнггусь!
120 - Хибя тута?
121 Нюдя Ваяр то!
122 Неками Хадавахана падар, сяд падвы нрвнгэ, нгамгэрханась.
123 Чедавʼ манэтˮ нявамˮ хуркан нгэнггобат.
124 Сяд падвы пинʼ тарада.
125 Сюдобя нгынамта нэкалнгада енерманта еэмня.
126 Мале нгобˮ мынгмʼ нгэдтанггусь, нгынта ен ныклы.
127 Таʼ ёльчанггана нюдя Ваяр нись ламгарюˮ еся мынггахана ядада.
128 Мынггда нганиʼ сюдсавэй хая.
129 Сяд падвы ервъя тари лясэйˮ маханта ниʼ.
130 Хаванта нерня ма:
131 - Хумбачиˮ сит нгэдарадамчь.
132 Некамт хадавани мальнггана сит нгобтаремʼ хада тарась.
133 Чедахавʼ хавнтархадмʼ.
134 Чикы вадида мэсомаданта сяд падвы ерв ха.
135 Нюдя Вай чёр нгэдара:
136 - Юˮ мядʼ черˮ, пинʼ тарпыдаˮ!
137 Чедахавʼ ервраˮ мале юнггума.
138 Тюку яхад мерʼ ямдаидаˮ!
139 Тюку я нгахат вай я нгахат вай я нгэдакы.
140 Нябтаˮ ямдаˮ малʼ нгысыʼ чер хаданггун.
141 Тадхавʼ нюдя Вай вары мятʼ хая.
142 Вары мякана пухучаку мю, сята падарчи.
143 Едмʼ пиревы.
144 Вавхана нгобˮ хонёда юсида, илхы хасава нгэрханюˮ.
145 Нюдя Вай мятʼ тюмахад пухучакор хонёдамта юркабта пяда:
146 - Юркадˮ, ехэрана ненэчьʼ то!
147 Хонювы хасавар нгамчё хамыˮ.
148 Сяд падвы нгобтаремʼ нявы нгаˮ.
149 Нюдя Ваяр ваванʼ нгамтыˮ.
150 Илхы хасавар ма:
151 - Нгамгэ ненэчант?
152 - Мань нюдя Ваядмʼ нгэˮ нидамˮ.
153 Падар нгани нгамгэ неннэчант?
154 - Чехэ панггами вай нгэдякы.
155 Нюми Лобэку.
156 - Вай нгэбˮ нант хачерʼ Еремян тюку нгысынʼ, сяд падвыʼ нгысынʼ?
157 - Нгавнанта сидя Вай неками танявась.
158 Илебчиˮ нямна ханеванчь хаяханчь.
159 Тад хэбˮ нанчиʼ пырдариʼ нихинчь туˮ.
160 Ханявахана юнггумэхэʼ.
161 Тад чикахад сяд падвы ерв тось, сидниʼ ханась.
162 Нгадьбяни чедаʼ небяни няʼ тюку нгысына иледмʼ.
163 Нюдя Вай манма:
164 - Чедахавʼ сяд падвыни малʼ хадэнась.
165 Падар нгани мял хаврад, ямдахаваˮ!
166 Пухучаку едамта нгамдакы, нянякы, тад мята хавра.
167 Нюдя Вай табедада:
168 - Лобэку, сава тыˮ табябˮ мюдваˮ савари тэхэˮ на подермы нгэя.
169 Тайкуй сава ханˮ таняˮ.
170 Чикы ханхат хандар содаˮ!
171 Лобэку юˮ ханмʼ сода, юˮ тунггусʼ ханмʼ.
172 Тыда подеръяда.
173 Нюдя Вай ма:
174 - Сяд падвыни тыˮ сянгок нгэса, тангок мюднаˮ пумна танавы нгэяˮ.
175 Сяд падвыˮ тыдуʼ нгока нгэсьтыˮ.
176 Тюку тыˮ малнгэ талевы нгэдакыˮ.
177 Нгадьбяни мадмʼ, малʼ ханабˮ сава.
178 Тад ямдэйдˮ.
179 Нюдя Вай хадавы некаханта тэвыˮ.
180 Тыда нгэда, хальмерамта ханʼ ниʼ пэнгада.
181 Тад чикахад нгамгэʼ ёльчанггана нгарка Вайʼ нгысынʼ тэвыдˮ.
182 Хальмерамтуʼ сидя хобаʼ ниʼ пэнгадуʼ.
183 Лобэкуʼ небя манма:
184 - Нгамчида тамна саваˮ.
185 Хадриʼ илебче хортанакэв.
186 Чедавʼ нгарка тураˮ пятадаˮ!
187 Нгарка тумтуʼ пятаˮ.
188 Чикавахана Лобэкуʼ Небя хальмерта ниʼ пындерийˮ, тад хэвхэда нямна сухубтада.
189 Хавы ненэчьʼ нгудида, нгэда мансабтэйда, сэвда нянггарнга.
190 Лобэкуʼ небя ма:
191 - Тамнарка.
192 Нгарка туʼ ядёхона юсидая.
193 Пуна харта нгамчё хамсуˮ.
194 Нгамгэʼ ёльчанггана нгарка Вай нгамчё хамыˮ.
195 Илена ненэчьʼ толхангэ хая.
196 Лобэкуʼ небя ма:
197 - Нгарка Ваями илебчевась.
198 Нготангоˮ харни понкуʼ илевндадмʼ вунидмʼ нгаˮ.
199 Хадриʼ хавнтархадмʼ.
200 Хабˮ нани тайкуй мями мярондани мэцакэв.
201 Мань хаˮ махадни мяни нёхона нгобˮ сулякомʼ хадаидаˮ, сиʼ няна нгобˮ хорамʼ хадаидаˮ.
202 Чиканта мась нгэнггу.
203 Мань нгани яминя пухучангэ хантадмʼ.
204 Чи, таремʼ сертадуʼ.
205 Таремʼ сертамахадантуʼ нгарка Вай ма:
206 - Хардиʼ ямданггунаˮ.
207 Чедавʼ тынаˮ нгоканюˮ, несяй янʼ ямдабˮ сава.
208 Тад ямдэйдˮ.
209 Нгарка лабтаʼ ерня мятуʼ мяраʼ.
210 Сидя Вай нганиʼ ханеванчь хэсетыниʼ, Лобэку нгобтаремʼ.
211 Ёрпатуʼ ёрчетыˮ.
212 Вэнуй нувода пяйда.
213 Нгавуˮ пиркана Лобэку хасава сидя Вайхаюта няʼ ма:
214 - Юдэми таня.
215 Юдэрпанни сеней сяд падвымʼ хадаˮ махад тальняʼ нгэдалёда минга, миндярха.
216 Сеней хадавы сяд падвы ерв иленарха, тальняʼ миндярха, торха.
217 Нярхавы хаˮ.
218 Сянри яля хэнякы.
219 Нгвмгэʼ ёльчанггана чи нгэˮ нивˮ, нгобˮ нэдалёда ненэсяри нгоˮ нгадимя.
220 Сиив хабтаркамʼ мэнга.Н гарка Вай Лобэку хасаванʼ ма:
221 - Юдэна манэмэр чии?
222 - Нгаа, чикар нгэрханюˮ.
223 Сиеками юнггу.
224 - Та нгэя, нгэя, тоява!
225 Ненэся нгоˮ сяд падвы ерв минга, сиив хабтаркамʼ мэчь нгэдалы.
226 Мале тальняʼ то.
227 Неро яхамʼ маданггудась, сиив хабтаркада лэркабтʼ варчадтедуʼ.
228 Пада нгани ханхад лясё хамыˮ, итʼ сэя.
229 Сян ни нгадивˮ.
230 Итʼ сэянакы.
231 Чи, тарча серʼ нгэсь Лобэку хасава тынчамта нямада, тэмгамʼ яркада хабтаркыда яхаʼ варувна тандананʼ.
232 Тад тыда нгэдэйда.
233 Нарка Вай манма:
234 - Таремʼ нгэя.
235 Сиив хабтаркамта маняˮ мэтнакэваˮ.
236 Чедахавʼ сяд падвы ерв итʼ сэяˮ махад пилиˮ ханггу, сян ни тутˮ.
237 Хуркасиˮ харасиˮ иленггоданакэваˮ.
238 Чи, лаханакони та валакада.
239 Сидя Вай, Лобэку хасава нгобˮ нгысына иле пядуʼ.
240 Лобэку хасава нгарка Вайʼ не нюмʼ неданта мэда.
241 Сававна илелийˮ.
242 Сидя Вай нганиʼ илебчьʼ нямна ханесетыхиʼ, халямʼ хадабасетыхиʼ.
243 Лаханакони пирда.