1 НУВʼ МЯДОНЧЕЙ
2 Яʼ мидахана ича ңапченя!
3 вархана ңобˮ ңарка мяˮ танявы.
4 Мякана вэсаку, пухуча илевэхэʼ, хасава нюдиʼ танявы.
5 Хасава нюдиʼ мале несавэй.
6 Неда сидя не.
7 Ңопой мякана самбляңг ненэчьʼ илевы.
8 Тыдуʼ юңувыˮ , вэнекудуʼ ңани ңока, сидя юдмян.
9 Ханеванчь хэбтуʼ вэнекудуʼ подерчетыˮ.
10 Ңобңгуна хасава нюдиʼ самбляңг вэнекомʼ подеркава някуманчь хая.
11 Наңэля яляʼ ямбанʼ сыңгрюда юңгу.
12 Пэвсюмеʼ няна мяканта то, сидя някмʼ хадавы.
13 Мятʼ тю, ваванʼ ңамтыˮ, ңорңа.
14 Манма:
15 - Тюку яляхана ханедами сидяри ник.
16 Тамна ңобˮ някмʼ хадаванʼ харвадамчь.
17 Мале ңынхана ядаңгувась, лакриʼ ехэрана неңэчьʼ ңадимя.
18 Паныда ңулиˮ сэрˮ, едэй хамвы сыраʼ толхачь.
19 Сидя сэвда ябересь.
20 Няни сырчь ненэчьʼ мась:
21 "Някмʼ ядпа ңэвалалад!
22 Сававна инчеле!"
23 Тюку яхад мякант хантан.
24 Хуняна сидя яндомт нувʼ няюʼ ханңэ хадаңгун.
25 Сямбат сава илндамт нин хоңгуˮ.
26 Ханондамадант сидя яляʼ ңэсоңгана нувʼ няд еся иня хамңгуˮ.
27 Чикы инявна нумтʼ танаидˮ.
28 Нувʼ нися сит ханаˮ.
29 Чикы вадида мэсомаданта ехэрана ненчал тэри тэмзыˮ.
30 Нисяда вэсаку ма:
31 - Чикар нувʼ хэхэ ңэвакы.
32 Масиˮ падар нувʼ сава сэванʼ хамвы ңэңгун.
33 Тарча вадаʼ танябˮ хуняна сидя яндомʼ ханңэ хадаиниʼ.
34 Ича напченяʼ вархана ңарка сиив таб надо таня.
35 Таняʼ ханон даванчь хантанакэниʼ.
36 Сидя яндомʼ сямбˮ вэва ңэˮ нивˮ.
37 Хуняна юркадˮ, ңорңаˮ.
38 Тад чикахад ханмʼ хадаңахаʼ.
39 Ёльчемаданчиʼ мяканчиʼ хаяхаʼ.
40 Сидя яляʼ ңэсоңгана хасава нюда ма:
41 - Тюку пиʼ сэрˮ панымʼ мэта хэхэмʼ юдэдамчь.
42 Пада мась:
43 "Нувʼ нися сит хаңа.
44 Хуняна нувʼ няд еся иня хамңгуˮ.
45 Инявна нумтʼ танадˮ.
46 Нехэюд ңобтаремʼ танаихимдˮ."
47 Вэсаку, пухуча маңахаʼ:
48 - Нумтʼ танабат маниʼ хачерʼ хаюданиʼ, хачерʼ илеңгуниʼ?
49 Нер сидя не.
50 Ңобˮ немʼ хаебат ханя сава ңаˮ.
51 Сидниʼ нядабадаңэ тараңгусь.
52 Вэсакуʼ хасава ню нехэюта няʼ ма:
53 - Чедавʼ сэрˮ паны серыдиʼ!
54 Сямэй пивидиʼ, пимдиʼ хаейдиʼ!
55 Ңаркаюм недя ма:
56 - Манчьван нидмʼ хантˮ.
57 Едэй панэми юңгу, едэй пибини юңгуˮ.
58 Сямэй панэна нумтʼ танабˮ нани тайна хамандадмʼ?
59 Тад ненэся ңо нув няд еся иняда хамы.
60 Вэсакуʼ хасава ню нюдяюмʼ ненча няʼ еся инявна тюняʼ пядиʼ.
61 Еся иняʼ ерта пирувна танэйхаʼ еся иняда ледрелийˮ.
62 Вэсакуʼ хасава ню чёрейˮ:
63 - Неңэ, сямэй паныд хаесед?
64 Нисядамˮ манˮ, сямэй панэна нумтʼ ниниʼ тэвңгуˮ!
65 Недяёревонта:
66 - Сямэй пибини нинась хаеˮ!
67 Тад неʼ ңудита нерчуʼ еся иня ныклы.
68 Нер тасиʼ мантырчь хая, ича ңапченяʼ итʼ сэя, сян ни ңадивˮ.
69 Вэсакуʼ хасава ню нумтʼ тэвыˮ.
70 Тад сэрˮ панымʼ мэта нувʼ хэхэмаˮ нивˮ:
71 - Нувʼ нисяʼ харданʼ ңобкана хантаниʼ.
72 Хаяхаʼ.
73 Сянат хунат ядбачиʼ ңодˮ нувʼ нисяʼ мятʼ тэвъяхаʼ.
74 Вэсакуʼ хасава ню мятʼ тю.
75 Мядʼ мюня нувʼ нися ңамчувы.
76 Нувʼ нисянта сыръета юңгу.
77 Ңарханта туңэ лэйна.
78 Хэвхананта сиив хэхэ.
79 Малңэ ту лэюрахаˮ.Нувʼ нися манчь ханада:
80 - Падар сеняʼ сидя яндомт хаданась.
81 Малʼ таромана сертавэн.
82 Сидя нер хачанахаʼ туˮ.
83 Сямэй панэна минханчиʼ параңгухунчь.
84 Чедавʼ сит илевамʼ пэрчаңэ сертаванʼ харвадмʼ.
85 Ндэй недамт татадмʼ.
86 Чедаʼ пуняʼ ханьˮ!
87 Вэсакуʼ хасава ню пинʼ тарпыˮ, сырңа:
88 мядʼ хэвхана еся ңано танявы.
89 Еся ңаноʼ мюня сеней сэрˮ панымʼ мэта хэхэ ңамчувы.
90 Недя ңани тюкона мэвы.
91 Вэсакуʼ хасава ню ңаноʼ мюʼ тийˮ, тасиʼ пяда.
92 Сянат хунат мимбата ңодˮ янʼ тэвыˮ.
93 Едэй мэвы ненча няʼ мяканта хая.
94 Тэвмахаданта манэңада:
95 мята хэвхана ёнармян ты.
96 Чикыд нувʼ мядончей.
97 Вэсакуʼ хасава ню таʼ малвңгад илевамʼ пэрчаңэ хая.