1 ПЭДАРА СЮДБЯ
2 Нгавхына маняˮ яхананаˮ нгыликаˮ нгокачь.
3 Ненэй ненчаˮ нгулиˮ тянёчь.
4 Нгобˮ хасава пухучанта няʼ пэдараʼ вархана илевэхэʼ.
5 Тыдиʼ юнггувыˮ.
6 Хасава яда ханесетавы, пухучада нгани вануй маламбсетавы.
7 Чи, таремʼ илевэхэʼ.
8 Нгобнгуна хасава манма:
9 - Пухуча, хуняна мерʼ бркадˮ, едар пия.
10 Нгахаˮ ханеванчьхантадмʼ, пэдаранʼ.
11 Масиˮ сидя- няхарˮ яляʼ ядертамдмʼ.
12 Пухучада ма:
13 - Пэдаранʼ нён ханьˮ!
14 Таняна нгылика нгоканюˮ.
15 Ненчаˮ манчетыˮ:
16 пэдаранʼ нгока ненэчьʼ хаясь, пырдаранʼ нгока ненэчьʼ хаясь, пырдариʼ хибярт нись турˮ.
17 Хойʼ няюʼ ханеванчь хэбˮ нант сава нгэнггусь.
18 Хойʼ няна ханедар нгока нгэсьты.
19 Тад нгоˮ пэдаранʼ хэбˮнант, пэдара сюдбямʼ ядабтабат нин маяндортˮ?
20 Хасава манма:
21 - Мунггад нидмʼ намдˮ.
22 Пэдараʼ понггана сюдбямʼ ядабтабˮ нани сейми ни хантˮ.
23 Харми таня, тыбками таня, нгынми мынггсавэй нгани таня.
24 Хуняна хасава юркыˮ, нгорнга.
25 Тад пинʼ тарпыˮ, ханкочамта нюдэрчь пэдараʼ няюʼ ядалийˮ.
26 Сянат хунат ядбата нгодˮ сисяда пэдара ситв ёбта.
27 Нгобˮ илебчамʼ манэнга.
28 Тюковамта нгынхана хадада.
29 Тад яхада, нгамчида ханкочанта ниʼ мэйда.
30 Ихинянта ма:
31 "Чедавʼ пуняʼ хэбˮ ни савараха?
32 Мякни пябсув."
33 Тад пырцариʼ пяда.
34 Минга, минга, нгарка пэ хойʼ нимня нгадимя.
35 Хойʼ тэохана нгобˮ еся мяˮ.
36 Мядʼ нёʼ хэвхана манябэ вэсаку, манябэ пухуча нгамчёвэхэʼ, нянгодиʼ нянггрвˮ.
37 Мядʼ нё пахабтэйˮ, пэдара сюдбя нгадимя.
38 Хасавамʼ манэчь ма:
39 - Падар хибян, ханяд тон?
40 Хасавар ма:
41 - Тэри хане ядернгадмʼ.
42 Ханедами тянё, нгобˮ илебчамʼ хададамчь.
43 Чикыʼ пуд пэдара сюдбя чёрмʼ нгэдара.
44 Пухучада мякад тарпыˮ.
45 Ненэй не нявы нгаˮ, нгулиˮ нгыликараха.
46 Сидя нгэвада тэри садула.
47 Панэда еся паныʼ толха.
48 Пэдара сюдбяр пухучаханта ма:
49 - Мядонда хасавамʼ сававна нгавлаир.
50 Пухучада нгамгэрт мунмʼ сояˮ манябэ вэсакуʼ няюʼ ядалийˮ.
51 Тад манябэ вэсакуʼ няʼ сивня пакалманта манябэ пухучаʼ няʼ сивня нгадимя.
52 Нгобˮ нгайта суюмʼ няамба нгадимя.
53 Тувы хасаваʼ хэвхана хаврада, яхада, ма:
54 - Хасава, чедавʼ нгорˮ!
55 Чи, няхарнгэ нгаябарманчь нгамдыдˮ.
56 Суюмтуʼ нгамгэ понʼ нгормнаˮ, мерʼ нгамадуʼ.
57 Пэдара сюдбя ма:
58 - Мядонда хасава, ханедант тянё нгэбˮ сит няданггудмʼ.
59 Чедаʼ манябэ вэсакуʼ няʼ сивня сит нгэдабтанггудмʼ.
60 Ненэй нгынми содаир.
61 Тад мимбат нгока нгэвасяда нгыликамʼ ядабтанггун.
62 Ябтанʼ нгынхана нён ядпюˮ, нюид хадабюˮ.
63 Хасава ханкочамта нюдэрчь манябэ вэсакуʼ няюʼ хая.
64 Тад чикад нянта сивня пакалийˮ.
65 Пакалманта серʼ нгыликаˮ нгобˮ сёвна тюрылыдˮ:
66 - Хумбачиˮ нён ядерˮ!
67 Пэдара сюдбяр сит нельченарханюˮ.
68 Нгамгэрт ханедамʼ нин хонггуˮ!
69 Хасаваʼ намдортада юнггу.
70 Нгобʼ нерняʼ минга.
71 Нгэвасяда нгыликаˮ нгулиˮ явлахамаˮ.
72 Тюрыртаˮ тюрырнгаˮ, яртаˮ ярнгаˮ, ханянгыдуʼ письнгаˮ.
73 Хасавамтуʼ табламбванʼ харванакыˮ.
74 Хасавар ихинянта ма:
75 "Нгыликаˮ тарсиˮ хурскабтыˮ.
76 Ханянгыдуʼ хадабˮ саваˮ."
77 Таʼ ёльчанггана нгыликаˮ хурскабтыˮ.
78 Ханянгыдуʼ хадабˮ саваˮˮ.
79 Таʼ ёльчанггана нгыликаˮ хасавамтуʼ ханячейʼ исялмдембюˮ нимˮ.
80 Хаванʼ харванаʼ толхаˮ.
81 Хасава нгани нгобʼ нерняʼ минга, нгопойкарт нгыликамʼ нгынхана ни хадабюˮ.
82 Сянат хунат лдбата нгодˮ нгасяда нгыликыта сётуʼ мунˮ ланумаˮ.
83 Нерняд яляда нгадимя.
84 Хасавар пинʼ тарпыˮ, сырнга:
85 харта мята нимня нгадимы.
86 Пухучада пихиня пэтавы.
87 Вэсакомта манэчь ма:
88 - Ювэй, ювэй!
89 Ханяна мэсан няхарˮ яляʼ ямбанʼ?
90 Сит нгаче нгулиˮ выдарадмʼ.
91 Сит пюванчь хэванʼ харвадамчь, тад ихиняни мадамчь, хаманчь ядертадмʼ?
92 Харта тобсакы, нявыˮ нгэбта хадараˮ.
93 Хасавар мятʼ тю, ваванʼ нгамтыˮ, нгорнга.
94 Ядеромида харакута серʼ вадеяда.
95 Хуняна юркыˮ, нгорнга, тад чикахад ханеванчь хая.
96 Чедавʼ пэдара сюдбяʼ тавы ненэй нгында таня.
97 Нгока илебчамʼ хада.
98 Илнта сума.
99 Та валакада.