1 МОСЕКУ НГАЧЕКЫ
2 Тюку лаханакоми пя вайхат намдвы нгэˮ нивˮ.
3 Сэвнаˮ тяхана Вай яхаʼ вархана няхарˮ Вай илевы.
4 Мятуʼ няхарˮ мятуʼ.
5 Тыдуʼ нгани нгулиˮ тянё нгэвы, нгобˮ юрман.
6 Няхарˮ Вай илебчиˮ мана ханесеты, хоркы хадабасьты, няваку, Понггарпатуʼ нгани нгока халямʼ хадабасьтавыˮ.
7 Нгарка Вайʼ сидя хасава нюда.
8 Нюдяюмʼ хасава нюда нгулиˮ салакоча.
9 Нгамгэмʼ пэрпата нгодˮ вэнчеревʼ пэрчеты.
10 Нисяда манчеты:
11 - Салако, ханеванчь ядерманʼ харвабат, Вай яхамт хунахарт нёр тандабюˮ.
12 Вай яхаʼ малʼ няна Ланггоче то таня.
13 Тоʼ вархана нгылика таня.
14 Нгыликахант ерембат сит хаданггу.
15 Нгадьбяни манчетыдмʼ, Вай яхаʼ нгылняриʼ хане ханасˮ.
16 Нгынкочар таня.
17 Хоркымʼ хадабт, нявакомʼ хадабат сава нгэнггу.
18 Нгахаˮ нён ханасˮ.
19 Нгарка Вайʼ нюдяюмʼ нюнта нюмча таня - Мосеку.
20 Нгобнггуна Мосекор нгынкомчамта, мынггкочида нгобкана нямыда, ханеванчь ядалийˮ.
21 Лаханакор пумнанта хая.
22 Ядерманта серʼ ихинянта манчеты:
23 "Вай яхаʼ нгылняна ханевами нгулиˮ тябибтав.
24 Яхаʼ малʼ някуʼ хэбˮ нани савараха.
25 Ланггоче тонʼ хэхэрчудмʼ, нгыликамʼ манэкарчув.
26 Нгыликар сими хадаванʼ харбилабта масиˮ сими салаконгэ сялилцу."
27 Сянат хунат ядбата нгодˮ сисяда пэдаранʼ пакалийˮ.
28 Нгарка пяхаˮ сырчь яхамта ёнгада, нгулиˮ юху.
29 Тамна тяхаʼ пяда.
30 Мэнʼ харбилэйˮ.
31 Ихинянта ма:
32 "Халякодами хадабˮ нани нгаябартадамчь."
33 Мингга, мингга, тад пэдараʼ поданʼ еремя.
34 Подʼ мюмня ядалийˮ.
35 Нерданта нгарка то нгадимя.
36 Хадриʼ Ланггоче то нгэдякы.
37 Тоʼ варанʼ тэвыˮ , надоʼ нид хамыˮ.
38 Таняна нгобˮ нганомʼ манэнга.
39 Хибярт юнггувы.
40 Чикы нганор халяхана панмы.
41 Моксекор нгобˮ халякомʼ нганоʼ мюд тюхулнга, нгобˮ идюрчамʼ.
42 Халякомта нгарка пэʼ ниʼ мэда, харамта тюхулнга, нгаябарчь пядп.
43 Нгаябарманта серʼ нумда нгулиˮ пэвсюме.
44 Мосекор ихинянта ма:
45 "Чедавʼ хуняʼ пябˮнани?
46 Хадриʼ тюкона сенггалтангкэвˮ."
47 Тадхавʼ мараʼ ниня, хасуй табʼ ниня тюмда наронгочь юсибтэйˮ , хонарэйˮ.
48 Хувʼ мервана сиды, сейкода хая:
49 хзвхананта ехэрана ненэчьʼ нувы.
50 Сермнянта лаханавонта:
51 - Тюковар хибяʼ нгачекы нгэбта?
52 Масиˮ ёховакы?
53 Ненчал нгачекымʼ сидюлангэ манзчь ма:
54 - Падар хибян?
55 Хачерʼ тюку янʼ еремзан?
56 Нюмл нгамгэ?
57 Мосекор юркыʼ, тад манчь ханада:
58 - Мань сими Мосеконгэ пэрчетыˮ.
59 Ёхова нидмʼ юхуˮ.
60 Нгарка Вай нисями сими таремʼ табидась:
61 Вай яхаʼ нгылняюʼ ханасˮ, тюняюʼ нён ядерчетуˮ.
62 Мань нгани таремʼ нидамчь харваˮ.
63 Нгадьбяни Ланггоче тонʼ тэвывˮ.
64 Мэнʼ харбилавани серʼ падар нганонт мюд нгобˮ халякомʼ тюхулнгадамчь, нгаябарчь нгамавась.
65 Ябтанʼ, сими вэвконгэ нён пэрˮ.
66 Падар нгани хибян?
67 Ехэранар ма:
68 - Сими Понггарта Хасавангэ пэрчетыˮ.
69 Падар нгани мань яхани ерембат сит вунидмʼ маяданггуˮ.
70 Харасяда ненчамʼ нидмʼ яебтамбасьтуˮ.
71 Тедахавʼ мэнʼ харвабат мякни ханьˮ.
72 Мями тайкуй ланггʼ ниня нга.
73 Мями ни черсюˮ, нябакоми таня.
74 Тедаʼ нгобˮ ехэнамʼ мякни ханаˮ.
75 Ехэнар маторт.
76 Пелямта нгаябаднггэ сертад, няби пелямта нгани нябакоми пиремда.
77 Мяни мюня сидя нярава сядэйми таня, сидя тосавэй ханавэйку.
78 Нгаябадад сидя сядэйни нгылʼ нгабтаид.
79 Едант пинванʼ мякана хумбачиˮ нён нгамдюˮ.
80 Няни туин, сит понггарчь нятадмʼ.
81 Тедахавʼ ханьˮ!
82 Мосекор ехэнамʼ няамба хая, оанггʼ ниʼ танэйˮ .
83 Ланггʼ ниня сиив пирча хады танявы.
84 Чикы сиив хадыʼ хэвхана нгобˮ нгарка мяˮ.
85 Мосекор ехэнамта маторнгада.
86 Понггарта Хасаваʼ нябаконʼ ма:
87 - Пелямта пиред!
88 Няби пелямта мятʼ тюледа, сиʼ, няюʼ хая.
89 Сиʼ няна ненэся нгоˮ сидя нярава сядэй танявы, сидя ханавэй иленядаревʼ нгамчувы.
90 Мосеку нгаябадмʼ нярава сядэйхаʼ нгылʼ мэда.
91 Пинʼ тарпыˮ, Понггарта Хасаванʼ хая.
92 Тэвыˮ, понгада мале икана пяды.
93 Понггарта Хасавар маˮ нивˮ:
94 - Мосеко, падар понггарчь ченеван?
95 Сидя яляʼ нгэсонггана Вай яхаʼ нгылняюʼ нганохона сидянгэ хантаниʼ.
96 Понггарчь ехэрабˮнант ир вэва ч223и нгаˮ , сит понггарманʼ тохоланггудмʼ.
97 Тад понггамчиʼ ватадиʼ, нгока халямʼ хадангахаʼ.
98 Тад мяканчиʼ хаяхаʼ.
99 Нябаконта ед мале пивы.
100 Нгорманчь нгамдыдˮ.
101 Нгорманта серʼ Понггарта Хасавар ма:
102 - Мосекоми понггарчь тамна тохолавдавэй.
103 Сидя яляʼ маниʼ мякнаниʼ илснггу.
104 Вавдамта миˮ.
105 Сидя яляʼ маниʼ мякнаниʼ иленггу.
106 Вавдамта миˮ.
107 Сидя яляʼ нгэсонггана хантаниʼ.
108 Тад тикахад хонэйдˮ.
109 Хуняна юркыдˮ.
110 Нгорманта серʼ Понггарта Хасава нябакохонта ма:
111 - Тюку яляхана Мосекони няʼ понггартадмʼ.
112 Падар нгани мальчакодамта сэдъин.
113 Чи, сидя яляʼ Понггарта Хасава Мосеконта няʼ ёрнгахаʼ.
114 Сидя яляʼ ваерамахад ёрчь ёльчейхаʼ, нганомчиʼ хамэдадиʼ, Вай яхаʼ нгылняʼ пядиʼ.
115 Ендлимʼ пянгахаʼ, сидя сиив яляʼ мингахаʼ.
116 Сидя сиив яляʼ нгэсонггана яхаʼ вархана нгобˮ нгарка мяˮ нгадимя.
117 Понггарта Хасава ма:
118 - Мосеко, тайкуй мятʼ ханьˮ!
119 Мятʼ тюбат мядʼ ерванʼ мандан:
120 "Понггарта Хасава то, сит ханга."
121 Нганомчиʼ янʼ нултадиʼ.
122 Мосекор нгулиˮ меречь мятʼ хая.
123 Мятʼ тюванта серʼ манэнгада:
124 вавʼ ниня нгармбэй хасава нгамчувы.
125 Сиʼ няна сидя нярава сядэй танявы, сидя тосавэй нгылика.
126 Тарчамʼ манэчь Мосеконт сейда хая.
127 Парумбари манчь ханада:
128 - Мядʼ ерв ирикэˮ, Понггарта Хасава то, сит ханга!
129 Вэсаку ма:
130 - Ювэй, ювэй, нгамгэда хадкэ?
131 Юдʼ поʼ ямбанʼ ни турчетуˮ, тедахавʼ мале то.
132 Хаднгоˮ хэвани ёльчангэ хэнякы.
133 Вэсакор сиʼ няд нгобˮ нярава сядэймʼ няма, пинʼ тарпыˮ, яхаʼ варанʼ хая.
134 Нганоʼ мюʼ тийˮ, тадхавʼ няхарнгэ нерняʼ хаяˮ.
135 Сянат хунат мимбатуʼ нгодˮ нерняна нганиʼ нгобˮ нгарка мяˮ нгадимя.
136 Тэри падлы яхаʼ вархана.
137 Понггарта Хасавар ма:
138 - Мосеко, нганиʼ мересˮ!
139 Мятʼ тюмахадант таремʼ мандан мядʼ ерванʼ:
140 "Понггарта Хасава то, сит ханга."
141 Мосеко сенейʼ тотревʼ мятʼ тю.
142 Вавʼ ниня нгобˮ хасава, нгобˮ не.
143 Сиʼ няна нгани сидя сядэй танявы, еся сядэйхаʼ нгэрхангаха.
144 Мосеку ма:
145 - Мядʼ ервэˮ, Понггарта Хасава то, сит ханга!
146 Мяд ерв маˮ нивˮ :
147 - Тангок поʼ ни турчетуˮ, тедахавʼ мале тувы.
148 Нгамгэда хадкэйˮ ?
149 Нгамгэдамта ханга?
150 Хасавар сиʼ няд нгобˮ еся сядэймʼ няма, пинʼ тарпыˮ, яхаʼ варанʼ хая.
151 Тад чикыʼ пуд нганоʼ мюʼ тийˮ, чстнгэ хаяˮ.
152 Сянат хунат мимбатуʼ нгодˮ яхаʼ варувна нганиʼ нгарка мяˮ нгадимя.
153 Макоданта сивня якэда путра.
154 Понггарта Хасавар нганиʼ вахалийˮ:
155 - Мосеко, падар нгулиˮ меречьтын.
156 Тедахавʼ нганиʼ мятʼ ханьˮ!
157 Мядʼ мюня нгобˮ хасава нгэнгу.
158 Нянта манъин:
159 "Понггарта Хасава то, сит хайˮ нивˮ."
160 Мосекор меречь хая.
161 Мятʼ тю.
162 Мякана сидя вав.
163 Няби вавʼ ниня вэсаку.
164 пухуча нгамчёвэхэʼ.
165 Няби вавʼ ниня илхы хасава, илхы не.
166 Хадриʼ несхаʼ нгэдакэхэʼ.
167 Сиʼ няна сидя сядэй танявы, сидя ненэй сядэй.
168 Мосеку нись ламгарюˮ манчь ханада, илхы хасаванʼ ма:
169 - Ервэˮ, Понггарта Хасава то, сит ханга!
170 Илхы хасавар Мосеконʼ сылыˮ, ма:
171 - Хаманчь сими ханга?
172 Сиекан нин нгэнггуˮ?
173 Понггарта Хасавар юдʼ поʼ ямбанʼ нись турˮ.
174 Тедахавʼ тобта мякни тоява.
175 Сита манэманʼ харвадмʼ.
176 Мосеку пинʼ сакада, яхаʼ варанʼ хая.
177 Понггарта Хасаванʼ ма:
178 - Мядʼ ерв тованʼ ни харваˮ.
179 Маˮ нив, пада юдʼ поʼ ямбанʼ нись турˮ, тедахавʼ сита манэманʼ харвадмʼ.
180 Мядʼ ерв мань вадахаˮни ни пынрюˮ.
181 Понггарта Хасава ма:
182 - Ненэся нгоˮ, нангэдя юдʼ поʼ ямбанʼ нидамчь турˮ.
183 Нгэя, чедаʼ мяканта хэрчудмʼ, лаханакурчь нятав.
184 Понггарта Хасава мядʼ тю, Мосекор нгани пихиня мэ, мядʼ нёʼ хэвхана ну, инчиле.
185 Мякана лаханавонтуʼ.
186 Понггарта Хасава маманонта:
187 - Меркуʼ хэванчь хамэдадˮ!
188 Идʼ нгылна нгэдя нярава нгановаˮ мале хамэды.
189 Хэсь тара.
190 Яноларабˮ нанаˮ вэва.
191 Илхы хасава мамононта:
192 - Нгэё, чиканта хэхэваˮ.
193 Нерʼ нгамгэ нисяр хадаˮ?
194 Понггарта Хасава мамононта:
195 - Хачерʼ хаданггув?
196 Харасяда ненчамʼ вунидмʼ хадабасьтуˮ.
197 Юхувы нгачекы нивˮ нгаˮ.
198 Нумдʼ танабˮнанаˮ хаюдˮ нивˮ, сяд падвыˮ мятʼ еремзу.
199 Тарча вади намда Мосекор сыхыбтэйˮ, яхаʼ варанʼ меречь хая.
200 Тад мядʼ няюʼ сылыˮ.
201 Понггарта Хасава мядʼ ервʼ няʼ мале тонгахаʼ.
202 Мядʼ ерв ненэй сядэймʼ няамби.
203 Чикахад нганоʼ мюʼ тиядˮ, самблянггнг Вай яхаʼ мюмня нгылняюʼ хаяˮ.
204 Сиив яляʼ мингаˮ яха ендадʼ нгылняʼ.
205 Нгавуˮ пиркана нганодуʼ харта нгэсонта мерелыˮ.
206 Ңгулиˮ меречь минга.
207 Тад хэндаревʼ сюралийˮ .
208 Понггарта Хасава ма:
209 - Нгамгэмʼ нгатедаˮ?
210 Нгаворидаˮ итʼ моюидаˮ!
211 Чикы вадита пуд нида сядэйдуʼ малнгэ итʼ моюядуʼ, нярава сядэй нгэя, еся, ненэй.
212 Сядэйдуʼ минхантуʼ итʼ сэяˮ.
213 Нгавуˮ пиркана идʼ нгылад сюдбяя нгано нгадимя.
214 Янамбоковна тюʼ илыˮ.
215 Малнгэ нярьяна няравахад сертавы нгэрха.
216 Хаерадʼ няʼ тэри ябире.
217 Нгыаданта нид еся иня тасиʼ хамыˮ.
218 Еся иня малхана нгобˮ нгарка юсна танявы.
219 Еся инянта нгадивомахад Понггарта Хасавар лабяхалийˮ, лянггабтёла юснанʼ тэвыˮ.
220 Тад чикахад нгано чер хасаваˮ минхантуʼ еся инявна нярава сюдбяʼ мюʼ тэри пакальядʼ.
221 Нгобтуʼ мамонон та:
222 - Понггарта Хасава, тайкуй нгачекымʼ хаманчь иле хаесар?
223 Тад пуна ненэй ненчанггˮ ерембата нямнанаˮ малʼ вадетˮ нивˮ.
224 Понггарта Хасава нянта мамононта:
225 - Та хадриʼ нгэя!
226 Мосекоми нгарка ненэчьʼ ни нгаˮ, нгамгэмʼ ченева, нгамгэмʼ хамидамби?
227 Нерʼ маˮ нясядамˮ, харасяда ненчамʼ нидмʼ хадабасьтуˮ.
228 Тад нярава нганоʼ мюʼ пакалманта нерчуʼ Мосеконʼ ма:
229 - Мосеко, ир нёи вовˮ!
230 Чедахавʼ яхаʼ ендадʼ нгылняʼ мийˮ!
231 Сяд падвыˮ мядо хонггун, таняна илеˮ!
232 Вэвку сертʼ ерембат сит пилиˮ нядабанггудмʼ.
233 Чикы вадита пуд пилибтˮ сэя.
234 Мосекор нгопойнгэ хаи.
235 Чедаʼ нгамгэнʼ нгаченанггу?
236 Хабыхынта лабяхалийˮ, Вай яхаʼ ендадʼ нгылняʼ пяда.
237 Яля писавэйʼ минга.
238 Хэвувнанта яда тум дув давэй хаюрнга.
239 Нгавуˮ пиркана пальˮ пэдара сита ёбта.
240 Мосеку тамна нерняʼ минга.
241 Тад маниебта яхаʼ вархана няхарˮ нгарка мяˮ нгадимя.
242 Мосекор нганомта янʼ нултада, яхаʼ варувна танэйˮ, мядоˮ няʼ ядалийˮ.
243 Тад вэнекудуʼ мадлавонтуʼ.
244 Вары мякад ненэчьʼ нгадимя, сяд падвы нгэвы.
245 Ма:
246 - Падар хибян, ханяд тон?
247 Мосеку манма:
248 Нгарка Вай нисями таня.
249 Нгарка Вайʼ сидя хасава нюда.
250 Мань нгани нюдяюмʼ хасава нюдмʼ.
251 Ёхоборнгадмʼ, понкуʼ минчь вынхалыдмʼ.
252 Чндавʼ епаде ткдами хорхадмʼ сава ненчантаˮ нгэхэвабˮ нантаˮ.
253 Сяд падвы ма:
254 - Епаде тудамт хоˮ нянувˮ.
255 Мятʼ тюˮ!
256 Мосеку вары мятʼ тю.
257 Тюванта серʼ манэнгада:
258 мякана сидя вав нгэвы.
259 Нгобˮ вавʼ ниня сяд падвы вэсаку, сяд падвы пухуча нгамчёвэхэʼ.
260 Няби вавʼ ниня сидя илхы сяд падвы нгэвы.
261 Няби несавэй нгэдякы, нюда ебцхана мэ.
262 Няби несьда нгэрха.
263 Несьда сяд падвы ма:
264 - Ёхорэй нгачекы то.
265 Мякнанаˮ илея, сита хабингэ мэтаваˮ.
266 Чи, Мосекор сяд падвыˮ мякана иле пяда.
267 Няхарˮ поʼиле.
268 Вавда сяд падвы вэсакуʼ, сяд падвы пухучаʼ вавхана нга.
269 Вэсакор, пухучар Мосекомчиʼ вэнчеревʼ вунихиʼ пэрˮ.
270 Сидя илхы сяд падвы тарчахаʼ нихиʼ нгаˮ, пилиˮ манчетыхиʼ:
271 - Ёхорэйнгэ, вавʼ ниня понкуʼ нён юсидасьтуˮ!
272 Итаваˮ хосˮ, пядваˮ хосˮ!
273 Мосекор тарча вадидиʼ тябибтэйда, нгобнггуна таремʼ ма:
274 - Сими хабингэ нёдиʼ пэрˮ!
275 Манзаями харни ченевав.
276 Сими нгулиˮ нгылпачиʼ, сими нгэвкупачиʼ мэбета нями тута, сими нгэдангу.
277 Тарча вади намда сидя сяд падвэр мунчалмахаʼ.
278 Сырида холкаˮ, тангы нувода пяйда.
279 Ненянгг ирыхана нюдя сяд падвы ма:
280 - Ябтунчь хэхэваˮ!
281 Ябтулабиˮ ёльчангэ хая.
282 Мосеку нгобчикы тутˮ нивˮ.
283 Та нгэя, ябтунчь хэсь нгани сава нгэˮ нивˮ.
284 Хуняна хантˮ нимˮ.
285 Сидя сяд падвы помнанчиʼ лаханавончиʼ, мамонончиʼ:
286 - Мосеку нгачекымʼ хадабˮ сава.
287 Хасрёхана хадаимиʼ.
288 Вадида намдорчь нгоцаниʼ.
289 Хуняна ябтуманчь хаяˮ.
290 Хасрёнʼ тэвыдˮ.
291 Мосеку нгобтаремʼ то.
292 Хасрёнʼ тэвмахаданта Мосеку манэнгада:
293 Понггар та Хасава мале тюкона мэвы, мале ябтумы.
294 Нгока ябтомʼ Нгока ябтомʼ хадавы.
295 Тарчамʼ манэлись Мосеконт сейда хая.
296 Ихинянта ма:
297 "Нями хачерʼ тюконʼ еремза?
298 Нгавна сюдбя нганохона хаясянёˮ.
299 Тамна нявы ханьˮ?"
300 Мосеку Понггарта Хасаванʼ ма:
301 - Няв, сава няв, хачерʼ хасрёнʼ тосан?
302 Тамна нгока ябтомʼ хадавэн.
303 Понггарта Хасава ма:
304 - Мосеко, нерʼ хэвани нерчуʼ мадамченюˮ:
305 маянтʼ ерембат сит нгэданггудмʼ.
306 Чедахавʼ сидя сяд падвы няр сит хадаванʼ нихиʼ харваˮ?
307 Ярме сит нёрвахаʼ хадаˮ!
308 Чикы вадита пуд Понггарта Хасавар сидя сяд пожвэн, ярэйˮ, маˮ нивˮ:
309 - Сидя сяд падвы, мань.сава нями нёриʼ яебтамбюˮ!
310 Вэва ириʼ юнггояʼ.
311 Чикы вадида мэсомахаданта Понггарта Хасавар хадавы ябтуда Мосеконʼ мияда, ма:
312 - Ябтуд мякант хананˮ!
313 Сяд падвы вэсаконʼ, сяд падвы пуъучанʼ мисанˮ, сит сававна пэрманчиʼ еэмня.
314 Мосекор майˮ.
315 Ябтуда хананта ниʼ мэйда.
316 Мяканта нгэдаланггучь, пуняʼ сылыˮ.
317 Маниебˮ нанта Понггарта Хасавада юнггувы, мале тэмзавыˮ.
318 Ихинянта ма:
319 "Нгэя, нганихиˮ на масиˮ нганиʼ тубсу."
320 Тад мяканта хая.
321 Нгэрёй нувода пяйда.
322 Нгобнггуна хувы нгавармʼ нгорчь сидя сяд падвы лаханаекрнгахаʼ:
323 - Мале хорˮ ирынгэ хая.
324 Ханеванчь хэбˮ нанаˮ сава нгэдякы?
325 - Ханя сава нгаˮ.
326 Чедавʼ илебчал нгоканюˮ.
327 - Тюку яляхана илебчиеманчь хэиваˮ!
328 Мосековаˮ нгобтаремʼ хантˮ нивˮ.
329 Чикы вадидиʼ мэсомахаданчиʼ пинʼ тарпъяхаʼ.
330 Мосеку нгобчикы пинʼ тарпыˮ.
331 Тад ты танаˮ.
332 Мосеку хананта сингэ чет хабтаркамʼ няма, подеръяда.
333 Нюдя сяд падвы ма:
334 - Мосеко, падар яваʼ ехэран.
335 Чедавʼ нгэдалёртаханаˮ мань нерденггудмʼ.
336 Падар нгани нён хаюрˮ!
337 Чи, нгэдалэйдˮ.
338 Сянат хунат мимбатуʼ нгодˮ нерняд нгарка лабта нгадимя.
339 Лабтаʼ ерня нгобˮ нгэдалёла нгади, нгобчикы ханена нгэрха.
340 Тюку нгэдалёданʼ тэвыдˮ.
341 Мосекор пысэйˮ:
342 неранта няна тэри нгэда лёда нявы нгаˮ, Понггарта Хасава нгэвы.
343 Сидя хорамʼ хадавы.
344 Манма:
345 - Мосеко, сидя хорамʼ мале хададамчь.
346 Июку сидя хора нянт мась нгэнгу.
347 Мякант ханахаюнˮ!
348 Чет хабтаркамт хумбачиˮ харебат вуни тараˮ.
349 Тарча вади намда Мосеку сидя хорамʼ хананта ниʼ мунчьпойˮ пэнгахаюда, хурангахаюда.
350 Мяканта нгэдалэйˮ.
351 Мяканта то, сяд падвы вэсаконʼ, сяд падвы пухучанʼма:
352 - Сидя хорамʼ тадмʼ.
353 Няхаюни тамна нгэдалёрнгахаʼ, масиˮ нгамгэхэвамʼ хадабсухуʼ.
354 Пэвсюмеʼ няна сидя сяд падвы то, ханодиʼ черсиˮ.
355 Нгопойкарт илебчамʼ нявэхэʼ хадаˮ, Нюдя сяд падвы пихиня мамононта:
356 - Мосековаˮ нганиʼ иле хаи, хачеркарт мэсь ямамиʼ.
357 Тад нгоˮ нгамгэрт нининчь хадаˮ, яляʼ ямбанʼ тыниʼ хумбачиˮ харебининчь.
358 Нгаркаюмʼ сяд падвы мамононта:
359 - Хадриʼ нгэя, нганихиˮ на хадабсакэмиʼ.
360 Нганиʼ нгобˮ по хая.
361 Нгобнггуна сидя падвы ханʼ ниня нгамчʼвэхэʼ хасвадёвэхэʼ.
362 Нгаркаюмʼ сяд падвы мамононта:
363 - Понггарманчь хэбˮнанаˮ сава нгэрха.
364 Халядаваˮ хадаиваˮ.
365 Падар нгани хуркан нгэбˮ нант?
366 Нюда сяд падвы мамононта:
367 - Манчьван маханиʼ нидмʼ нгаˮ.
368 Хэбˮ нанаˮ хэиваˮ.
369 Ненчамаˮ нгоканюˮ.
370 Тад нгоˮ Мосековаˮ ханаиваˮ.
371 Няни хасермʼ ни тамбюˮ.
372 Хадабˮ сава, итʼ сэйрабˮ сава.
373 Чи, таремʼ лаханавончиʼ.
374 Та мальнггана Мосеку мякана мэ, сидя сяд падвыʼ вади сававна намдэйда.
375 Тад нгарка сяд падвы мятʼ тю, ма:
376 - Тюку яляхана понггарчманчь хантаваˮ.
377 Падар нгани, Мосеконгэ, вавʼ ниня понʼ нён юсидасьтуˮ.
378 Понггар тамна хамэдавндавэй.
379 Мосеку ма:
380 - Понггами хамэдавахана сел вуни таняˮ.
381 Нён табекосьтˮ!
382 Манзаями харни ченевав.
383 Мосеку пинʼ тарпыˮ, яхаʼ варанʼ хамыˮ.
384 Понггамта хамэдада, нганонта мюʼ пэнгада.
385 Сяд падвыˮ нгобтаремʼ понггдуʼ нганонтуʼ мюʼ пэнгадуʼ.
386 Тад чикахад четнгэ яхаʼ ендадʼ нгылня пядуʼ.
387 Сянат хунат мимбатуʼ нгодˮ понггарчь яхатуʼ тэвыдˮ.
388 Тэвмахадантуʼ манэнгадуʼ:
389 нгобˮ ненэчьʼ мале понггармы.
390 Тад саваркавна манэчь нганиʼ Понггарта Хасава нгэвы.
391 Понггда икана пяды.
392 Понггарта Хасавар таремʼ манчь ханада:
393 - Сяд падвыеˮ, сававна инчеоедаˮ!
394 Вэва нганиʼ танявы.
395 Мосекоми хадаванʼ нясярамˮ харваˮ?
396 Нгамгэ тарчадаˮ?
397 Мосеку мань сава нями нивˮ нгаˮ.
398 Нерʼ нянта мадамченюˮ:
399 маянтʼ ерембат сит ханядмʼ нгэданггуˮ.
400 Чикы вадида мэсомпхпдпнтп Понггарта Хасавар нярава нгынамта нэкалнгада, няхарˮ мынггмʼ нгэдабта.
401 Няхарˮ тусавэй мынгг сяд падвыˮ лэмбарахатуʼ тебя.
402 Тэри лясё хамыдˮ.
403 Сэводуʼ тоʼ салабаʼ толхангэ хаяˮ.
404 Тад чикыʼ пуд Понггарта Хасавар ма:
405 - Мосеко, седахавʼ харни яхани пилибтˮ хантадмʼ.
406 Илевант ямбанʼ сими нин манэтˮ.
407 Тад нерняʼ сит маядамбадидуʼ юнггудаˮ.
408 Нгарка сяд падвыʼ немʼ недант мэин, сававна илеˮ!
409 Хэвани нерчуʼ нянт сидя нярава сядэйкочадамт татадмʼ.
410 Мяканант пилиˮ нгэяхаʼ.
411 Сит лэтрамбанггухуʼ.
412 Чи, вадини пирда.
413 Чедахавʼ мякант ханьˮ!
414 Чикы вадида мэсомахаданта Понггарта Хасавар тэри тэмзыˮ.
415 Мосеку нгани мяканта салийˮ.
416 Нянта вадиˮ серевʼ нгарка сяд падвыʼ немʼ неданта мэда.
417 Мята сиʼ няна сидя нярава сядэймʼ нгабтангахаюда.
418 Тад сэрˮ сулякомʼ хада, сидя нярава сядэймʼ сую вэякона нгавлангахаюда.
419 Нехэнта ма:
420 - Нгобˮ поʼ тюку яхана иленггуваˮ, тутна похона Вай нисяни янʼ ямданггунаˮ.
421 Чи, та валакада.