1 СИДЯ ХАСАВА
2 Яʼ мидхана хибярт юнггувы.
3 Нггобˮ нго танявы.
4 Чики нгоʼ ниня сидяри хасава илевы.
5 Недиʼ юнггувыˮ.
6 Сидя хасава ханесетавэхэʼ.
7 Хусавэй яляхана хане ханнгахаʼ.
8 Няби хасава хане ханта, няби мякна хаюрнга.
9 Сяны нгэбтуʼ нгодˮ нгаркаюмʼ хасава манма:
10 - Маньчьван сисяда пэдаранʼ ханеванчь хантадмʼ, падар нгани мякнант хаюˮнант поёрманчь хэбˮнант поёртанакэн.
11 Хуняна юркъяхаʼ, нгорнгахаʼ.
12 Нгаркаюмʼ хасава сисяда пэдаранʼ ханеванчь хая.
13 Нангэдя яляʼ ямбанʼ свнгтрюда юнггу.
14 Нябиюмʼ нгани тыбкамта няма, поёрманта серʼ ихи нянта манчеты:
15 "Нями хаманчь пэдаранʼ хая?
16 Ни ёходˮ?
17 Ёхобатаханггу."
18 Пэвсюмеʼ нянгэнгэ хая.
19 Нгаркаюмʼ хасава то, ханкочананта нгобˮ илебчамʼ пэмби.
20 Мятʼ тю, маˮ нивˮ:
21 - Тур пятаˮ!
22 Меркуʼ ед пиреханиʼ!
23 Манчьван нгулиˮ никададмʼ.
24 Нангэдя яляʼ ямбанʼ ядернгадамчь.
25 Сисяда пэдараʼ помна ядерпани хачадмʼ юхуˮ.
26 Яʼ сиʼ нимня нгадимядамчь.
27 Чикы сиʼ мюʼ пакалманʼ харвадамчь.
28 Сейми хаясь, мадамчь:
29 "Хадриʼ нгэя!
30 Нганихина яʼ сивня тюбсакэдмʼ".
31 Хуняна нганиʼ ханеванчь хантадмʼ.
32 Нгорнгахаʼ, хонэйхаʼ.
33 Хуняна нгаркаюмʼ хасава сисяда пэдаранʼ нганиʼ хая.
34 Нюдяюмʼ хасава мякнанта хаи, мята лэтрамбюˮ нивˮ.
35 Нгобˮ яляʼ нгачена, сидя яляʼ нгачена.
36 Нгаркаюмʼ хасава тованʼ ни харваˮ.
37 Тад нюдяюмʼ пинʼ тарпыˮ, ханʼ мюд я нямд пенчерта нэкалнга.
38 Пиʼ ямбанʼ сёда вымда.
39 Пиʼ сава ерня нгобˮ лаханана мамононта:
40 - Няр яʼ сивня тювы, яʼ вэсакуʼ мякана иле.
41 Хуняна нюдяюмʼ хасавар юркыˮ, пинʼ тарпыˮ.
42 Нянта хэˮмяʼ мюмня сидяда пэдаранʼ хая.
43 Минга, минга, нгобˮ яляʼ минтакы, сидяʼ минтакты.
44 Нгарка тоʼ нимня нгадимя.
45 Тад тоʼ маравна хая.
46 Сянат хунат ядбата нгодˮ яʼ симʼ манэнга.
47 Сейда хая.
48 Ихинянта ма:
49 "Чедаʼ нгэбˮни сава?
50 Яʼ сиʼ мюʼ тюбˮ нани сава?
51 Нгэя, тюбсудмʼ.
52 Хабˮ нани хахадмʼ".
53 Сидя яляʼ сяʼ мюмня минга.
54 Пэби, нгамнэрт ни нгадюˮ.
55 Няхаромтэй яляхана нярава мяˮ нгадимя.
56 Хадриʼ яʼ вэсаку мята нгэдякы.
57 Хасавар мятʼ тю.
58 Мята пелейкутвы.
59 Няби вавʼ ниня яʼ вэсаку нгамты.
60 Нярава мальчамʼ мэнга, нярава пиби мэнга.
61 Няби вавʼ ниня нгарка няда нгамчувы.
62 Яʼ вэсаку ма:
63 - Сит понʼ нгатедамчь.
64 Нярава мякни тэвбат чедаʼ сававна инчелеˮ!
65 Тюку яхад мякант саладˮ.
66 Недамт татадмʼ.
67 Чедаʼ яʼ сярʼ ниня хибярт юнггу.
68 Тад чикахад ненэчьʼ нгока нгэнггу.
69 Падар нгани и левамʼ пэрчангэ хантан.
70 Нгарка няхавар мякнани хаюда, нгангэ хантˮ нивˮ.
71 Тад хуркари ненчал ханггулабата нга чикана тута, епаде индамта хананггу.
72 Чи, нюдяюмʼ хасавар мяканта хая.
73 Ненча няʼ нганиʼ няхарˮ яляʼ мингахаʼ.
74 Пинʼ тарпъяхаʼ.
75 Хасава сангомта я сид янʼ нгэдара.
76 Сэвʼ хункана лабта я нгэвы.
77 Нерʼманэмы сисяда пэдара юнггувы.
78 Хасавар манма:
79 - Чедавʼ хуняʼ хантаниʼ?
80 Яда нгулиˮ чсрсявы.
81 Екарˮ, мями ханяна нгэбта?
82 Недя ма:
83 - Яʼ ирир масьнюˮ:
84 илевамʼ пэртянгэ хантан.
85 Таремʼ мамбата масиˮ едэй мятамт табсу.
86 Нумда пэасюме.
87 Хасава ненчаʼ няʼ хонэйхаʼ.
88 Пиʼ сава ерня нгэванта нид нгобˮ лаханана мамононта:
89 - Хасавангэ, нерняʼ мийˮ, яʼпонтʼ нён нусьтуˮ.
90 Сидя яляʼ нггэсоггана лабта яʼ еркана едэй мятамт хоггун.
91 Хуняна юркъяхаʼ.
92 Сидя яляʼ нганиʼ мингахаʼ.
93 Сидя яляʼ нгэсонггана хаерта пакалчь мяканчиʼ тандаяʼ иэвъяхаʼ.
94 Мятиʼ едэй нгэвы.
95 Хэвхананта ханода нгока, тыда нгока.
96 Хасавар ненча няʼ едэй мякана иле пяда.
97 Илевамʼ пэрчангэ хая.