1 ИРЫ НЯБИ ХАЕРˮ
2 Яʼ мидхана иры юнггувы, хаерˮ юнггувы.
3 Нггулиˮ пэввы, нггамгэрт нявы нгадюˮ.
4 Сидяри хасава, сидяри не илевы.
5 Нюдуʼ юнггувыˮ.
6 Сяны нгэбтуʼ нгодˮ нгаркаюмʼ хасава манма:
7 - Нумʼ нюдваˮ таванʼ ни харваˮ.
8 Тад нгобˮ поʼ нгэсонггана сидя нгачекыдуʼ нгадимия, хасава нгачекы, не нгачекы.
9 Нгаркаюмʼ хасава маˮ нивˮ:
10 - Тадебядаваˮ хокваˮ .
11 Нгачекэюнаˮ тад нерняʼ илебчёдиʼ хачерʼ нгэнггобтавˮ?
12 Тадебяваˮ хонраивачь.
13 Тадебямʼ тадуʼ.
14 Тадебя пиʼ ямбанʼ тадейбчурнга.
15 Хувы ялумт нгадимгава манма:
16 - Нгачекэхэʼ сававна иленггухуʼ.
17 Хасава нгачекы ирынгэ ханта, не нгачекы нгани хаернгэ ханта.
18 Нувʼ нися няни мась:
19 сиив яляʼ нгэсонггана нгобˮ ядна хасава тута.
20 Чикы хасава нгачекэюдаˮ нумтʼ нгэдаранггуда.
21 Чедаʼ сава панэкодамчиʼ серта тара.
22 Панэкочидиʼ илебчьʼ хобахат сэдвы нгэя.
23 Сиив яляʼ нгэсонггана вэнˮ мадлыдˮ.
24 Не мякад пинʼ тарпыˮ, вэнуˮ сангоʼ серʼ сангомта нгэдара.
25 Таня нгадьбата ядна хасава то.
26 Не мятʼ тю, ма:
27 - Ядна хасава нгадимя.
28 Чедаʼ масиˮ нгачекэнюнаˮ ханангухаюда.
29 Тюку серˮ мань сейханини вэва.
30 Нгачекэю наˮ такалпˮ савахаʼ.
31 Нгачекэхэʼ ейнгэ сиʼ няна сидя сядэймʼ нгабтаиваˮ.
32 Ядна хасава мятʼ тю, ваванʼ нгамтыˮ.
33 Хасавамʼ нгавладуʼ.
34 Нгормахаданта хасава манчь ханада:
35 - Егулиˮ понкуʼ ядернгадамчь, мятаˮ хось ямавась пэвдя нумгана.
36 Ненэся нгоʼ хаерта танявы нгэбˮ ханячейʼ сава нгэнггусь.
37 Пи, ирыʼялада танябˮ нганиʼ сава нгэнггусь.
38 Чикыʼ пуд ма:
39 - Такы сиʼ няна нгэдя нгамгэ нгэбра?
40 Нгаркаюмʼ хасава ма:
41 - Сиʼ няна маняˮ нэхуюнаˮ .
42 Ядна хасава ма:
43 - Нюхуюдаˮ ханаванʼ харвангахаюн.
44 Нувʼ нися таремʼ табидась; сидя нгачекы нумтʼ тэвравы нгэя.
45 Хасава нгачекы ирынгэ ханта, не нгачекы нгани хаернгэ ханта.
46 Ядна хасава сидя сядэймʼ няма, пинʼ тарпрангахаюда.
47 Тад яʼ сид янʼ хая.
48 Минга, минга, сиив ял яʼ минтакы.
49 Нувʼ нисян тэвыˮ.
50 Маˮ нивˮ:
51 - Нувʼ нисякэˮ, сидя нгачекымʼ тадмʼ.
52 Харет нясянувˮ манˮ, сидя нгачекы тэвравы нгэя.
53 Нувʼ нися манма:
54 - Чикаюд ненэй нгачекэхэʼ нихиʼ нгаˮ, сядэйкочахаʼ.
55 Сит ниˮ нельчеˮ?
56 Пуняʼ ханьˮ!
57 Таремʼ мандан:
58 хасава нгачекымʼ, не нгачекымʼ таванʼ нябтуʼ харваˮ чиканта я нгылы нга тута, сидя нгачекымʼ нгобчикы хананггу.
59 Ядна хасава пуняʼ хая.
60 Нганиʼ сиив яляʼ минга пэвдя нумгана.
61 Сеней мятʼ тю, ма:
62 - Пэвдяхана иле вэва.
63 Нувʼ нися нгачэкэхэюдаˮ ханга, маˮ нивˮ, хасава нгачекы хэбта нангэдя пи, ямбанʼ иры яля нгэнгу.
64 Не нгачекы хаернгэ хэбта нгани, нанэдя яляʼ ямбанʼ хаерʼ яля нгэнггу.
65 Нгачекэхэʼ пинʼ тарпъяхамтˮ!
66 Чи, сидя нгачекы тандаяʼ пинʼ тарпыхныˮ.
67 Хуриʼ сававна ембмэхэʼ.
68 Панэкочидиʼ илебчьʼ хобахат сэдвы нгэвы.
69 Ядна хасавар посхалнгаюда.
70 Нгачекэхэʼ лэморнгэ хаяхаʼ.
71 Тад чикахад нумтʼ тийхаʼ.
72 Нувʼ нисянʼ тэвъяхаʼ.
73 Нувʼ нисяр майˮ, манма, нгулиˮ понʼ сиддиʼ нгатедамчь.
74 Тад хасава нгачекэнʼ ма:
75 - Пыдар ирынгэ хантан.
76 Яляр ненэй ненэчанггана сава нгэнггу.
77 Ненэй ненэчьʼ пиʼ ебта, нгэдалёрпата нгодˮ ямʼ малʼ сававна манэта, ни ёхобортˮ.
78 Тад не нгачекэнʼ ма:
79 - Падар нгани хаернгэ хантан.
80 Ненэй ненчаˮ пэвдяхана иле тябибтадуʼ.
81 Падар хаернгэ нгадимбат ненчаˮ маямдыдˮ.
82 Хаерʼ яляхана иле нгулиˮ сава.
83 Чи, та ёльчанггад пиʼ иры нгадимзеты, яляʼ хаерˮ нгадимзеты.
84 Ненчаˮ пэвдяхана иле нгэвадэйдˮ.
85 Яʼ сярʼ ниня ненчаˮ нгокмаˮ, тыˮ нгокмаˮ, сармикˮ нгокмаˮ.
86 Малʼ сававна илеˮ.