1 СИДЯ НЕКАС ХАСАВА
2 Яʼ мидхана ненчаˮ тянё ңэвыˮ.
3 Сидя некас хасава илевы.
4 Недиʼ юңгувыˮ, нюдиʼ юңгувыˮ.
5 Понʼ илебачиʼ, хэвʼ илебачиʼ ңобңгуна ңаркаюмʼ хасава манма:
6 - Нисямиʼ илеванта мальңгана масьнюˮ :
7 сиив яʼ вэкана хэбидя то таня.
8 Мась, ңулиˮ ябсялмбачиʼ тоʼ варанʼ ямдаидиʼ.
9 Хэбидя тохона халяда ңока.
10 Нюдяюмʼ хасава ма:
11 - Ибˮ ямдаининчь, ненчаˮ манчетыˮ ңани, хэбидя тоʼ вархана понʼ илебˮ вэва.
12 Манчетыˮ:
13 хэбидя тоʼ икана еся паныта ңыликаˮ илеˮ.
14 Икад ңадимбатуʼ ненэй ненчаи хадабасьтыˮ.
15 Ңадьбяни хэбидя тоʼ варанʼ ямдаванʼ нидмʼ харваˮ.
16 Ңаркаюмʼ ма:
17 - Ненэся ңоˮ хэбидя тоʼ икана ңыликаˮ илеˮ.
18 Валакада хачерʼ илеңгуниʼ?
19 Тюку яхана илебˮнаниʼ ңамгэ сава ңэвна?
20 Ңулиˮ ябсялманиʼ.
21 Нениʼ юңгуˮ, нюниʼ юңгуˮ.
22 Хусавэй яляхана ханеванчь хэсьтыниʼ, черсиˮ тосьтыниʼ.
23 Таремʼ иле вэва.
24 Нюдяюмʼ ма:
25 - Хадриʼ ңэя.
26 Падар мамбат хэбидя тоʼ варанʼ ямдаханиʼ.
27 Чи, сидя некас хасава ямдэйхаʼ.
28 Понʼ мюсебачиʼ ңодˮ, хэвʼ мюсебачиʼ ңодˮ наңэдя трыʼ ямбанʼ мюсеңахаʼ.
29 Ирыʼ ңэсоңгана ңаркаʼ варанʼ тэвъяхаʼ.
30 Тад подʼ мюмня мюсеңахаʼ сидя сиив яляʼ.
31 Мюсеванта серʼ ңаркаюмʼ манма:
32 - Еся паныта ңыликаʼ ңалимбˮ ңамгэ мирвхана пяңгумиʼ?
33 Тыбкана пяңгумиʼ, ңынхана пяңгумиʼ?
34 Нибˮнаниʼ пирдалеˮ хаңгоданакэниʼ.
35 Манчьван мадмʼ, хумбачиˮ хэбидя тонʼ мюсе пямиʼ.
36 Пэдараʼ вархана ңэсобˮни тарась.
37 Масиˮ илебча хадаңговакэниʼ.
38 Чедахавʼ хаваʼ еэмня мюсенарханиʼ.
39 Хэбидя тоʼ варанʼ тэвъяхаʼ.
40 Мятамчиʼ мярңгахаʼ, ңорңахаʼ, хонэйхаʼ.
41 Хуняна юркъяхаʼ.
42 Ңаркаюмʼ ңаномта хамэда поңгарманчь хая.
43 Нюдяюмʼ мякна хаи, мята лэтрамббюˮ нивˮ.
44 Яляʼ сава еркана вэнˮ мадлыдˮ.
45 Нюдяюмʼ пин тарпыˮ, манэңада:
46 няхарˮ хасава тувы, маоңэ сэв сэрˮ.
47 ңгаркадуʼ манма:
48 - Хаманчь хэбидя то варанʼ ңысыдиʼ?
49 Тюкона маняˮ яваˮ.
50 Пэдараʼ вархана илебˮ сава.
51 Чедаʼ манэт:
52 тоʼ тяханяңы хэвхана ненэй ненчаиˮ лыˮ ңоканюˮ.
53 Хэбидя тоʼ вархана ңока ненэй ненэчьʼ юңума.
54 Пыдариʼ ңобтаремʼ хаңгудиʼ.
55 Чикы вадидуʼ мэсомаданту сэв сэрˮ хасаваˮ тари тэмзыˮ.
56 Пэвсюмеʼ няна некада то.
57 Ңока халямʼ хадавы.
58 Ңорманчь ңамдыхиʼ.
59 Ңорманчиʼ серʼ нюдяюмʼ манма:
60 - Нерʼ няхарˮ сэв сэрˮ хасава турңась.
61 Сэв сэрˮ маңачь:
62 хаванʼ нибчиʼ харваˮ меркуʼ ямдаидиʼ.
63 Ңаркаюмʼ ма:
64 - Яляʼ ёрпанани ңамгэрт еся паныта ңыликамʼ нидамчь манэсˮ .
65 Екарˮ, ненчаˮ ңамгэмʼ вадепатуʼ?
66 Вадидуʼ сияк ңэдякыˮ?
67 Ңэява, тамна ңобˮ яляʼ ёртадмʼ, тад чикахад ямдаңгуниʼ.
68 Хуняна юркъяхаʼ.
69 Ңаркаюмʼ ңаниʼ поңгарманчь хая.
70 Нюдяюмʼ мята лэтрамби.
71 Яляʼ ямбанʼ хара вуни таняˮ.
72 Хибярт ни турˮ.
73 Пэвсюмеʼ няна ңаркаюмʼ то, ңаниʼ халямʼ ңокавна хадавы.
74 Маˮ нивˮ:
75 - Чебтаʼ ямдаңгуниʼ.
76 Хуняна мятиʼ хаврадиʼ.
77 Нюдяюмʼ ма:
78 - Ямдаваниʼ нерня ңобˮ вэнекомʼ ханңэ хадаиниʼ.
79 Тоʼ ңыликаʼ нёи нензювˮ.
80 Тад ямдэйхаʼ.
81 Пэдараʼ варанʼ тэвмахаданчиʼ ңысыхыʼ.
82 Таняна иле пядиʼ.