1 Хэбидя Хоˮ
2 Ңавна Тасуʼ явʼ вархана хэбидя я танявы.
3 Чикы хэбидя яхана сиив хо вадювы.
4 Ңобңуна ңобˮ хасава ханеванчь хая.
5 Яляʼ ямбанʼ ядарңа, ңамгэрт хось яма, ханеда юңу.
6 Ихинянта ма:
7 "Хаманчь хумбачиˮ ядерңадмʼ?
8 Мякни хэхэдмʼ.
9 Ханедами юңгунюˮ."
10 Тад мяканта хая.
11 Миңа, миңа, харта мята хось яма, юхудакы.
12 Харта ңоˮ нись харваˮ хэбидя янʼ тэвыˮ.
13 Сиив хомʼ манэңа, ихинянта ма:
14 "Чикы хоˮ хэвхана сеңгалтывˮ.
15 Хуняна масиˮ мякни тэвңгувˮ."
16 Хасавар тюмда нароңочь манчилабтада.
17 Пиʼ сава ерня сиды.
18 Ңачекы ярмонта.
19 Тад сылыˮ ңани, ненэся ңоˮ тандаяʼ соявы ңачекы ярмы.
20 Ты хобахана юйдавэңэ чикана юсида.
21 Хасаваʼ сейда хая.
22 Ңачекэр тари етʼ ңачекы нявы ңаˮ.
23 Ңачекыʼ пэяхананта нярьяна нумгы танявы, павэхэнанта сэрˮ нумгы танявы.
24 Сэвхаюда ңани нумгыдаревʼ ялкадарңахаʼ.
25 Хасавар ңачекэнʼ сырчь ма:
26 - Тюку хибяʼ ңачекы?
27 Хэбидя хоˮ поңгана ңобˮ лаханана лаханавонта:
28 - Тюку ңачекэр мякант ханад!
29 Хасавар ңачекымʼ нямада, мяканта хая.
30 Сянат хунат ядбата ңодˮ мятʼ тэвыˮ.
31 Ңачекымʼ мятʼ тюледа, пухучаханта ма:
32 - Нюдант вадад тюку ңачекы!
33 Пухучада ңачекымʼ манэманта серʼ сейда хая, маˮ нивˮ:
34 - Ненэй ңачекы нявы ңаˮ.
35 Масиˮ ңвлика ңэдякы.
36 Хадабˮ сава.
37 Ңарвомаданта нензелмʼ вуниваˮ мэтˮ .
38 Хуняна нермяʼ сивня итʼ ңэдебтаимиʼ.
39 Хуняна юрькъяхаʼ.
40 Хасава ңачекымʼ няма, нермянʼ хая.
41 Тад итʼ ңэдабтада, ма:
42 - Иˮ нисяр, иˮ небяр.
43 Нянаниʼ нин тараˮ.
44 Чи, ңачекы икана ха.
45 Тад чикыʼ пуд няхарˮ по хая.
46 Няхарˮ поʼ ямбанʼ хасава пухучанта няʼ сававна илеңахаʼ.
47 Хане ядерчеты, илебча хадабасьты.
48 Няхарˮ поʼ ңэсоңгана хасавар ханеванта серʼ ңаниʼ сиив хэбидя хонʼ тэвыˮ.
49 Тэвмахаданта манэңада:
50 сиив хоʼ хэвхана ңобˮ ңачекы пэмбˮ ңэвы.
51 Лаханана ңаниʼ лаханавонта:
52 - Нерʼ ңачекэми вадавы ңэбˮ нант чедаʼ сит нядабадаңгэ хантадамчь.
53 Ңачекэми хадавэн.
54 Тад нерняʼ хабчаˮ ңадимтаˮ, ңа ңадимта.
55 Яʼ сярʼ ниня илена ненчаˮ хаңгурчь пяңгудуʼ.
56 Падар ңани пухучант няʼ хонё наңгун.
57 Тад хасава мяканта то.
58 Намдвыда малʼ вадеяда.
59 Пухучада ма:
60 - Вадидуʼ сияк ниˮ ңэңгуˮ?
61 Чедаʼ ңули сававна илениʼ.
62 Чикыʼ пуд вэнˮ мадлыдˮ.
63 Пухуча пинʼ санэйˮ, сирңа.
64 Ңобˮ ядна хасава тувы.
65 Мятʼ тю, ваванʼ ңамтыˮ, ма:
66 - Яляʼ ямбанʼ хане ядерңадамчь.
67 Ханедами ңулиˮ юңгу, ңгулиˮ пэдэювˮ.
68 Тад ңорңа, хонэйдˮ.
69 Хувы ялумт ңадимгава ядна хасавар юркыˮ.
70 Мятсавэй хасава ңани пухучанта няʼ макодаʼ синʼ сырчь ванебчёрхаңахаʼ, чибяридиʼ хаерыˮ.
71 Токою:
72 хавэхэʼ.
73 Ядна хасава пинʼ тарпыˮ, хэбидя янʼ, сиив хэбидя хонʼ хая.
74 Та валакада.