1 НЯХАРˮ МАНТО
2 Ңарка тоʼ вархана няхарˮ манто иле.
3 Няхарˮ манто таңодуʼ сыридуʼ халямʼ пэрңаˮ, хорамʼ пэрңаˮ.
4 Не надуʼ таня.
5 Чедаʼ не нядуʼ лаханакомʼ минре.
6 Манма, няхарˮ манто неками малңэ несавэй.
7 Тыдуʼ юңгˮ.
8 Таңы мальңгана халямʼ пябˮ нантуʼ илебчал ңока.
9 Таңы хадавы халякудуʼ няби таʼ ёльчанд тэвсетыдˮ.
10 Сырэй хадавы илебча ңамчидуʼ няби сырахатуʼ тэвсетыдˮ.
11 Сян по ваерахава таремʼ илебˮ нанаˮ яваˮ марома.
12 Няхарˮ манто неками ёрманчь хэбтуʼ ңодˮ ңамгэрт ниˮ хадесетуˮ.
13 Илебчамʼ хадаванчь хэбтуʼ мякантуʼ ңулиˮ черсипойˮ тосьтыˮ.
14 Нарка неками манчеты:
15 - Я ваˮ ңулиˮ марома.
16 Екарˮ, ңамгэ тарча?
17 Нумʼ сиднаˮ ни мэтабюˮ?
18 Чи, янаˮ маромчь халякунаˮ сусаʼ.
19 Нерʼ валавы ңамчинаˮ малңэ ңамъянаˮ.
20 Сяны ңебтуʼ ңодˮ няхарˮ манто неками хувʼ мервана ңаниʼ ёрманчь хаяˮ.
21 Пэвсюмняна малңэ черсипойˮ тоˮ.
22 Ңарка неками мятʼ тю, ваванʼ сидя тюсипойˮ ңамтыˮ, манма:
23 - Ябми юңгу.
24 Яляʼ ямбанʼ ёрпананм ңодˮ ңопойкарт халякомʼ нидамчь хадаˮ.
25 Екарˮ, ңамгэ таремʼ хая?
26 Нерʼ ңарка то халяна панңась.
27 Чедаʼ ңамгэрт юңгу.
28 Ңорчипойˮ илебˮ нанаˮ хавнтархаваˮ.
29 Тад ңормаваˮ ёльчемаданаˮ хонэйпаˮ.
30 Хонавахана хара вуни таняˮ.
31 Хувы ялумт ңадимкава юркывˮ.
32 Тад манэчь ңамгэда ңэса?
33 Малʼ мятчер ңокхантуʼ макодаʼ синʼ письнтархаˮ.
34 Чибяридуʼ хаерыˮ.
35 Няхарˮ манто неками хавы.
36 Тарчамʼ манэкава ярсавэй пинʼ тарпывˮ , харясяда йнʼ сюрвывˮ.
37 Наңэдя сыраʼ ямбанʼ паняриʼ миңадмʼ.
38 Няхарˮ манто некани ядуʼ ңулиˮ черсявы.
39 Пунсяда явна ядадмʼ, хибяртмʼ хось ямадмʼ.
40 Сыраʼ ямбанʼ писяку хобˮ нани ңамчетын.
41 Таремʼ яднахани ңулиˮ вынхалыдмʼ.
42 Ярэй седаʼ ниʼ юсибитэювˮ.
43 Ихиняни мадмʼ:
44 "Тад хабˮ нани лэкучини хасуй яхана юсидаичь."
45 Екарˮ, понʼ хонёвэдмʼ.
46 Немами хая, мэтами ңэвами тю илав.
47 Маниебˮнани нарэйңэ хэрхавы.
48 Седани хэвувна мадорота яха и лида тялабтыˮ.
49 Мадорота яхаʼ тяханаңы хэвхана няхарˮ ңарка мяˮ ңади.
50 Мяду манэчь ңэни ниʼ варени юркывˮ.
51 Тад янамбовна ядальювˮ.
52 Мадарота яхаʼ варанʼ тэврихива маниебˮ нани сидя хасава ёрмэхэʼ.
53 Ңамгэʼ пиркана няби хасава сими манэтакы, няханта момононта:
54 - Маяндрота не ңэрханюˮ.
55 Тад ңаномчиʼ итʼ чирчидедиʼ, няңэни хэванʼ мададиʼ.
56 Мань ңани ңамгэмʼ ңачевнадмʼ, ңаноʼ мюʼ паклэювˮ .
57 Мадорота яхаʼ тяханяңы хэванʼ тэвмаданаˮ янамбовна мядуˮ няюʼ табелабтав.
58 Тад вэвамʼ лыдасяда, савамʼ лыдасяда вэнˮ мадлыдˮ.
59 Еркы мядʼ нё пахабтэйˮ, не ңадимя.
60 Мядʼ ервʼ не ңэдякы.
61 Мятʼ сими вадалңа.
62 Тюмадани евэйкодами та.
63 Ңулиˮ тянёвна та.
64 Малехэрта нивˮ малеˮ.
65 Тамна харвадмʼ.
66 Мядʼ ервʼ не манма:
67 - Мась ңэя, пуна мыңгад хась пиртар.
68 Чедаʼ хонадˮ!
69 Тад нема сими талевы.
70 Немами хая.
71 Мэтами ңэвами тюʼ илав.
72 Маниебˮ нани хубтыхы ңэвы.
73 Мядʼ неңэ, пыдар хибян?
74 Ңаʼ маядярт, ңудаʼ маядярт ңэдакэн?
75 Мань ңани таремʼ мадмʼ:
76 - Ңудаʼ маядяртмʼ нидмʼ ңаˮ.
77 Тэри маяндортадмʼ.
78 Няхарˮ манто неками танясь.
79 Малңэ хачь.
80 Чи, лихарюниʼ ёльчемаданиʼ хара вуни таняˮ.
81 Мядʼ ервʼ неʼ хэвхана иле пяв.
82 Таремʼ илебˮ нани ниры вомы мирбями невхэнта толхаңэ хая.
83 Ңобˮ илевами нивакы ңаˮ, сяны ңэбтуʼ ңодˮ хубтыхы ңэвы.
84 Хувы тумана мядʼ ервʼ не манма:
85 - Маяндорта неңэ, сававна инчилеˮ!
86 Хуниня ңэвтанаˮ тутаˮ.
87 Сидя Сэв Сэрˮ сит ханаванʼ харва.
88 Падар хаˮмамбат?
89 Мань таремʼ мадмʼ:
90 - Чедаʼ хаˮ мандадмʼ?
91 Сими мэванʼ харвабтуʼ хаюпа хэидмʼ.
92 Хунина яляʼ ертʼ тэврихива пихий пихиня вэнˮ мадлыдˮ.
93 Вэнуˮ мад намдй пинʼ тарпывˮ.
94 Таня ңадьбата нэдалёдаˮ тоˮ.
95 Вадʼ ёрканʼ нултадуʼ.
96 Ңэдалёдиˮ нерняна мимы хасава вэсаку ңэвы.
97 Хадриʼ Сэв Сэрˮ вэсаку ңэдякы.
98 Вэсакуʼ пумна мимы хасава хадриʼ Сэв Сэрˮ нюдя ню ңэдякы.
99 Сядмʼ сядомы, чет парисе хабтмʼ мэмы.
100 Мятʼ тюдмʼ.
101 Ңамгэʼ Пиркана пихйй пихид Сэв Сэрˮ вэсаку мятʼ тю, манма:
102 - Пудаюˮ нани, нибˮ нани няхарˮ мантоʼ не нямʼ ханаванʼ харвадмʼ хасава нюни неңэ.
103 Мядʼ ерв, мядʼ ервʼ не маңахаʼ:
104 - Сэв Сэрˮ вэсаку, ңулиˮ нин пудаˮ.
105 Валакада няхарˮ мантоʼ не ня хаˮ мамбата?
106 Хаюпа хэван харвабта, хаюпа хэява.
107 Мань таремʼ мадмʼ:
108 - Маханяʼ нидмʼ ңаˮ.
109 Сими ханаванʼ харвабтуʼ хантанакэдмʼ.
110 Чи, тарчь вадахаˮ на ңусыʼ ңачекыˮ ты танаˮ.
111 Мядʼ ерв, мядʼ ервʼ не мань мюдхани юрˮ хатбʼ подерңахаʼ.
112 Сэв Сэрˮ вэсаку манма:
113 - Хандриʼ неваˮ ханаңгодакэваˮ.
114 Яваˮ хубта, ңадьбянаˮ парумбиваˮ.
115 Хаюпа хэмядани сававна илелъювˮ.