1 СУСУЙ нгачекы
2 Сусуй нгачекы нисяюта небяюта няʼ неро яхакуʼ ланггʼ ниня илевы.
3 Не няда нгопой.
4 Сусуй нгачекы мале хоркымʼ хадаваʼ пирувна харта ядерчеты.
5 Нероʼ понггана хоркыта есье пярыбасьты.
6 Неро яхакона халямʼ хадабабтуʼ нисянта понггаʼ хамʼ пэрчеты.
7 Халядуʼ нговакна хадавы нгэсьты.
8 Нисяды манчеты:
9 - Хоркымʼ хадабат неро яхакунаˮ нгылняюʼ ядерчетуˮ, тюняюʼ нён ядерчетуˮ.
10 Таняна парнэ вэсаку не нюнта няʼ иле.
11 Сяˮ ны нгэбтуʼ нгодˮ неро яхакона хал яда суса.
12 Сусуй нгачекы индата пирта ненчангэ хэбта нгодˮ хамида яма, нгамгэ тарча?
13 Нисяда ма:
14 - Неро яхакохона халяда нгадьбята суса:
15 неро яхакуʼ тюняна илена парнэ вэсаку яхаковаˮ нярхалавакэда.
16 Сусуй нгачекы ихинянта ма:
17 "Неро яхакуʼ тюняюʼ хадриʼ пябсув.
18 Парнэ вэсакомʼ масиˮ пирдаленггув."
19 Чиканта пибида сера, мальчамта сера.
20 Мынга, нгынамта нгобтʼ нямыда, неро яхакуʼ тюняюʼ ядалийˮ.
21 Сяны ядбата нгодˮ сисяда наро сита ёбта.
22 Нангэдя сиив яляʼ минга.
23 Таремʼ миндяханта пэдараʼ понггана нгарка тоʼ нимня нгадимя.
24 Маниебта чикы тоʼ сёда нгулиˮ тора нгэвы.
25 Неро понггахана нярхалавы.
26 Халяда малʼ чиканʼ малёвы.
27 Тоʼ вархана нгарка мядмʼ манэнга.
28 Лакриʼ мяд нё пахабтэйˮ, парнэ вэсаку пинʼ нгадимя.
29 Сусуй нгачекы мынггахана енерчь пяда.
30 Парнэ вэсакомʼ хачеркарт пирдале ямада.
31 Парнэ вэсаку ма:
32 - Хумбачиˮ нён енерчетуˮ!
33 Сими нин хаданггуˮ.
34 Панэми еся паны.
35 Чедаʼ мякни туин.
36 Не нюни сянако нянгэ таранггун.
37 Сусуй нгачекы мятʼ тю.
38 Парнэ вэсаку нгани ваванʼ нгамтыˮ, ма:
39 - Пучуха, не нюнт сянако нянгэ нгачекымʼ тацмʼ.
40 Тюку нгачекы Сусуй вэсакуʼ хасава нюда.
41 Нерʼ нгамчанэ хадаванʼ харвавась.
42 Тад саваркавна манэчь хэвда вэва нгэвы.
43 Нгоюˮ поʼ мякнанаˮ идея.
44 Поʼ нгэсонгага нгамсанэ хадабсакэваˮ.
45 Сусуй нгачекы поʼ ямбанʼ парнэ сэвакуʼ мякана иле.
46 Нгонггуна парнэ вэсаку мамононта:
47 - Чедаʼ Сусуй нгачекыʼ хэвда сума.
48 Хадабˮ сава.
49 Пэвсюмняна нгоромахандантуʼ хонэйдˮ.
50 Сусуй нгачекы парнэ не нюʼ няʼ нгобкана хонёсетыхиʼ.
51 Чедаʼ немада юнггу, инчиле.
52 Пиʼ сава ерня вэсаку юркыʼ, тыбкамта нэкалнга.
53 Тад пэвдяхана харта не нюмта хада.
54 Хувʼ мервана манэпата Сусуй нгачекыʼ еэйнгэ харта не нюмта хадавы.
55 Манма:
56 Сит нгамсангэ хадаван харвадамченюˮ нгани, пэвдяхана не нюми хадавэв.
57 Чедаʼ не нючи чинад сертаванчь хэхэни!
58 Хаяхаʼ.
59 Сисада пэдараʼ помна яднгахаʼ, сава хармʼ хось ямахаʼ.
60 Тад ходиʼ.
61 Харвмʼ хаврадиʼ, сидя ян ʼ мададиʼ.
62 Парнэ вэсаку манма:
63 - Екарˮ, не нюни чиннгэ сава нгэбта, вэва нэбта/ Не нюми ся ямб нгэбта?
64 Сусуй нгачекы ма:
65 - Мань ёльченггув.
66 Чедаʼ пяʼ ниʼ пындерадˮ!
67 Ся ямб нгэвамт ёльченггув.
68 Парнэ вэсаку пындерийˮ.
69 Сусуй нгачекы тыбкамта илада, тад вэсакуʼ нгэвамʼ сапада.
70 Ихинянта ма:
71 "Сими хадаванʼ харванасьнюˮ.
72 Нидант неро яхокна халя суса."
73 Тад Сусуй нгачекы тоʼ сёʼ няюʼ хая.
74 Парнэ вэсакуʼ нярхалавы понггамʼ нэкалнгада, хэвнякуʼ мода.
75 Чикыʼ пуд нангэдя сиив яляʼ неро яхаʼ варувна нгулняюʼ минга.
76 Сиив яляʼ нгэсонггана мяканта тэвыˮ.
77 Нисяханта ма:
78 - Нисякэˮ, чедаʼ неро яхакохона халяда нгокамсу.
79 Парнэ сюдбямʼ пирдалев.
80 Сян маямʼ вуниваˮ мэтˮ.
81 Тад чикахад сававна илелъядˮ.