1 НИСЯНИ ТАБЕКО
2 И ни томахад Енсяʼ явʼ вархана илевэваˮ.
3 Нисями таня, небями таня.
4 Тамна сидя , неками таня.
5 Тэваˮ сидя юрˮ.
6 Нисями вэсаку, сидя неками сыраʼ ханедамʼ пэрнгаˮ, таʼ халямʼ хадабасьтыˮ.
7 Сяˮ ны нгэбтуʼ нгодˮ хувы тумана нисями, небями понггананчиʼ лаханавонончиʼ.
8 Нисями мамононта:
9 - Пухуча, няхарˮ нюми мале нгарма.
10 Тад нгарвомахадантуʼ хусувэдуʼ хартуʼ сехэрымʼ мэтˮ нимˮ.
11 Чедаʼ нюхаˮ ни нгобˮ хобсокомʼ хэтванʼ харвадмʼ.
12 Манэтˮ нивамˮ, ханянгыдуʼ инта нгуˮ танянггу.
13 Небями мамонота:
14 - Таремʼ мамбат нгамгэда вэва.
15 Юркынаˮ, нгорнгаваˮ.
16 Тад нисями пинʼ тармыˮ, ма:
17 - Няхарˮ хасава нюми, тюку яляхана манзаидаˮ нгэвадалараˮ, таляʼ нгэхэрнгадаˮ!
18 Няхарˮ нюнгэ нгобт, нгамдынаˮ.
19 Нисями сябйрчемта няма, тад нобˮ пэвдюкомʼ няамхая манчь ханада:
20 - Няхарˮ хасава нюнгэ, нянтаˮ нгопой вадами таня.
21 Хобсокоми вадетав.
22 Ханянгэраˮ хобсокоми хонггуда, чиканта инта нгуˮ таня.
23 Тад чикы вадита пуд пэвдюкомʼ хархана сян янʼ ляднгада.
24 Манма:
25 - Пэвдюкомʼ ляднгав.
26 Чедаʼ мардэйдаˮ!
27 Нгарка неками пя таесмʼ нямада, ермнянта маляда.
28 Ёнэй неками нганиʼ таремʼ сертада.
29 Мань нгани няхаюни няʼ сырчь пя таесмʼ емрнянта маляв.
30 Нисяваˮ нянаˮ сырчь ма:
31 - Няхарˮ хасава нюми, - пыдараˮ иламʼ сабе манэмадавэраˮ.
32 Хобсокони хара сабе нгарка ни нгаˮ.
33 Тад нангэдя пэвдэмʼ нгарка хасава нюхунта миˮ нгада.
34 Нгарка хасава нюда маля ямада.
35 Ёнэй хасава ню нгобтаремʼ.
36 Мань нгани сян маляба пясетыдмʼ, сян малябˮ нани нгодˮ нгобтаремʼ выдарадмʼ.
37 Нисями пэвдэми нгудахатани ханада, тад ма:
38 - Няхарˮ хасава нюми, иланггана няʼ танябˮ сава.
39 Вэсакуˮ манчетыˮ:
40 лядмы пэвдюмʼ ненчал марданггуда, нангэдя пэвдэмʼ мардамба выдаранггу.
41 Вадмбойʼ илебатаˮ, хартаˮ помнантаˮ поемёбабˮ нантаˮ лядмыпэвдюʼ тьотревʼ харанʼ харвана ненчаˮ сиддаˮ марданггуˮ.
42 Нгопойрингэ нгамгэрт сермʼ нидаˮ сертанггуˮ.
43 Нгокахавангэ нидамˮ мэбетˮ.
44 Чи, иринанаˮ табеко тарча.
45 Тад чикы, пуд нгока по хая.
46 Сидя неками ханедамʼ пэрнгахаʼ, ёрнгахаʼ.
47 Мань нгани ты пэрнгадмʼ.
48 Нисянанаˮ табекомʼ сян ниваˮ мадабюˮ.