1 ЛАМДИК ТЭТАʼ ХАСАВА НЮДА
2 Сэвни тяхад мадорота яхаʼ вархана илевэваˮ.
3 Тэваˮ няхарˮ ёнарˮ.
4 Нисями таня - Ламдик тэта.
5 Небями таня - не Ламдойʼ.
6 Няхарˮ неками таня.
7 Сидя неками мале несавэй.
8 Нюдя неками неси.
9 Сидя неками пилиˮ манчеты:
10 - Нюдя няваˮ тарсиˮ саˮ ла.
11 Ңагэмʼ пэрпата ңодˮ пилиˮ вэнчерʼ пэрчетыда.
12 Инча ңылривна илена ненэчьʼ.
13 Ламдик тэта нисями нюдя хасава нюмта ңулиˮ мэнеда саˮ ла ңэбта ңодˮ.
14 Ңарка хасава нюхуюта ңяʼ манчеты:
15 - Саˮлаку нямдиʼ нёри яебтамбюˮ.
16 Сяхаңгавʼ тарода ңадьсу.
17 Тарчь лахарёвахана серми юңгу.
18 Сэври мэңадмʼ.
19 Сяныˮ ны ңэбта ңодˮ Ламдик тэта нисями ңэвамта идилңа.
20 Сиив яляʼ ямбанʼ еся тюмюмта тароаванʼ харва.
21 Сибимчей ялахана еся тюмюмта пилиˮ тархалңада.
22 Хальмерамтуʼ сюрңадуʼ.
23 Нисяни хаˮ махад сидя ңарка неками нюдя нямчиʼ ңобкад ладорпидиʼ.
24 Пилиˮ манчетыхиʼ:
25 - Саˮлан ңэвэн, хибяртана нин тараˮ.
26 Мань ңани тарчамбойхана хаˮ мандадмʼ?
27 Не ңачекэдмʼ нидамˮ ңаˮ.
28 Ңобңгуна ңарка неками манма:
29 - Няхарˮ ёнарˮ тымʼ тярканаˮ!
30 Чи, тарча вадаʼ танябˮ ты яркыба пядуʼ, хавомба пяйдуʼ.
31 Маниебˮ нани сидяри хавна хавомбюˮ нидимˮ.
32 Нюдя некани нямна вада юңгоя.
33 Небями манма:
34 - Нюдя хасава нюми еˮэйсядаңэ нёи хаюˮ.
35 Саʼлаку ңэбта ңодˮ тэсипойˮ хачерʼ илеңгу?
36 Нямчиʼ ярдавчиʼ нувʼ вэва сэванʼ хаˮ амңгудиʼ.
37 Маянтʼ еремдадиʼ.
38 Сидя ңарка некани намдортадиʼ юңгу.
39 Хуняна ңарка неками манма:
40 - Ватаңгованчь хандаваˮ.
41 Саˮ лакоңэ, падар ңобтаремʼ ядертан, сидниʼ нядаңгун.
42 Тарчамʼ намда мань мадмʼ:
43 - Мань ңоˮ туидмʼ.
44 Чи, четңэ хаяваˮ.
45 Нюдя нями ңарка неканта ханʼ вэняʼ ңамдыˮ.
46 Мань ңани ёнэй некани ханʼ вэняʼ ңамдывˮ.
47 Понʼ миндякэваˮ, нинякэваˮ, ңарка тоʼ варанʼ тэвынаˮ.
48 Сидя ңарка неками помнанчиʼ лаханавонончиʼ, ңарка неками мамононта:
49 - Тоʼ ертʼ яңга симʼ сиканиʼ.
50 Чиканʼ хаехамиʼ, идʼ ңылʼ сэйрахамиʼ.
51 Идʼ ңылна харта хабсакы.
52 Ёнэй неками мамононта:
53 - Яңга симʼ сертаба понʼ ңэңгу.
54 Пуна тад пэвсюмда, нумда чеченюˮ.
55 Тоʼ итʼ нёхомаʼ, лабта ертʼ хасхамиʼ.
56 Ңарка исками мамононта:
57 - Хадриʼ ңэя!
58 Падар таремʼ мамбат ңамгэда вэва?
59 Сидя неками инямʼ вэрда, пуняʼ ңэдалэйхаʼ.
60 Маниʼ сидяңэ нусь хаиниʼ тоʼ вархана.
61 Нумда пэвсюмя, хадңэ хая.
62 Ңамгэрт ни ңадюˮ.
63 Хоркы мятʼ хонэйниʼ.
64 Хад сидниʼ тохора.
65 Хуняна немамиʼ хая.
66 Сыраʼ ңылад ңодьриʼ юркыниʼ.
67 Тад тоʼ варувна ядалъяниʼ.
68 Сянат хунат ядбаниʼ ңодˮ сярда ханмʼ манэңамиʼ.
69 Ңобˮ пухуча поёрмы.
70 Сидниʼ манэчь хонрамба пя:
71 - Хибядиʼ пыдариʼ?
72 Ңамгэ маянтʼ тэвыдиʼ?
73 Нюдя неками манма:
74 - Маянтʼ еремяниʼ.
75 Сидя неками саˮ ла ңэвани еˮ эмня сими маяндорчь хаеңахаʼ.
76 Не нями ңобтаремʼ.
77 Пухучар ма:
78 - Маянт ерембачиʼ ңодˮ ириʼ вэва нёи ңаˮ.
79 Мань нянани туидиʼ.
80 Вэсакоми мале вэсэймы, тыни пэртамиʼ юңгу, мядʼ мансаямʼ пэртамиʼ юңгу.
81 Падар саˮлан ңэбˮ нант ңожˮ сяхаңгавʼ нувʼ сава сэванʼ масиˮ хамсун.
82 Чи, пухучаʼ мятʼ тэвыниʼ.
83 Мядʼ хэвхана сидя юрмян ты хадырңа.
84 Ханʼ ниня вэсаку ңамчувы.
85 Пухуча манма:
86 - Вэсаков, тыниʼ пэртадамиʼ тэврадмʼ.
87 Вэсаку ма:
88 - Чикар ңулиˮ сава.
89 Манчьван ты пэрчь ныхыми юңгу.
90 Сэвни вомаˮ.
91 Сими ехэрабˮнант Пясяˮ тэтаңэ Сими пэрчетыˮ.
92 Чи, Пясаˮ тэтаʼ мякана хуркасиˮ харасиˮ сидя поʼ илениʼ.
93 Нюдя неками ты пэрңа, ватаңгованчь ңоˮ хэсьты.
94 Сидя поʼ ңэсоңгана манма:
95 - Ханявахана небя пухучами танясь.
96 Манэманчь хан- дадмʼ тюконʼ тэвраңгув.
97 Сеня ңавнанта сими сянзеты некаюни сими ладорпачиʼ.
98 Тарчамʼ намдхава мадмʼ:
99 - Мань ңоˮ туидмʼ.
100 Сидяңэ хаяниʼ.
101 Сидя сиис яляʼ вымна ңэдалыниʼ.
102 Таремʼ миндяханиʼ нераниʼ няна мадорота яхаʼ вархана сидя ңарка мяˮ ңадимя.
103 Ханмиʼ яхаʼ вархана хаемиʼ.
104 Вары мядʼ няʼ яда хаяниʼ.
105 Мятʼ тюниʼ.
106 Ңарка неками мякана мэвы.
107 Нюдя нями манма:
108 - Мань саˮлакоңэ чедахавʼ тодмʼ.
109 Небя пухучами ханаңгув.
110 Няхарˮ ёнарˮ ты вуни тараˮ.
111 Тэми ңоканюˮ.
112 Харни вадавыни.
113 Нянтаˮ таремʼ мандадмʼ:
114 салаˮлакомʼ, маңгбадамʼ сяхаңгартʼ нёдаˮ писядˮ, нёдаˮ ладорюˮ.
115 Тюку вадахаˮна нибта намдорˮ сяхариʼ ңэбта ңодˮ маянтʼ еремдадаˮ.
116 Тамна масиˮ нувʼ выва сэванʼ хамсудаˮ.
117 Чикы вадида мэсемахаданта пинʼ тарпыˮ.
118 Мань ңоˮ тарпывˮ.
119 Небяни ханʼ сңэ чет падвы хабчемʼ подерна.
120 Тад ңэдаллэйнаˮ.
121 Пясяˮ тэтаʼ ңысынʼ тэвынаˮ.
122 Таʼ ёльчаңгад сававна илеваˮ.