1 СИДЯ СЭВ СЭРˮ НГАЧЕКЫʼ
2 Ича ңабченя явʼ вархана сидя мяˮ.
3 Сидя хасава, сидя не мякʼ черхаʼ.
4 Малңэ ңачекэсавэйˮ.
5 Ңысынтуʼ ерв Сэв Сэрˮ вэсаку.
6 Тыдуʼ юңгуʼ, явʼ халяхад илеˮ.
7 Сэв Сэрˮ вэсаку хасава ңачекэюта няʼ манчеты:
8 - Мядʼ хэвхана сянакосьтыдиʼ, хоянʼ нёдиʼ ханасˮ!
9 Сидя Сэв Сэрˮ ңачекы мале хоркымʼ хадаваʼ пирувна ядерчетыхи, ңыноторчетыхиʼ.
10 Ңобңгуна ңаркаюмʼ манма:
11 - Мядʼ хэвхана сянакурчь тябибтав.
12 Такы ңадьда седакуʼ няюʼ ядалканиʼ!
13 Седакуʼ няюʼ хаяхаʼ.
14 Понʼ мимикэхэʼ, нивакэхэʼ, юхухуʼ.
15 Няхачиʼ манчетыхиʼ:
16 - Мямиʼ ханяна ңа?
17 Тюку явна хюхэниʼ, масиˮ мямиʼ тайна ңэңгу.
18 Ничиʼ вадахаˮ инчеленаханчиʼ ңахаˮ на хаяхаʼ.
19 Тад нумда вома, хадума, ңамгэрт ни ңадюˮ.
20 Егудамʼ вэңгала хад нумгана ңуда ни ңадюˮ.
21 Сидя Сэв Сэрˮ ңачекы мятиʼ ханяхартана хось ямадиʼ.
22 Сидя- няхарˮ яляʼ пунсяда явна миңахаʼ.
23 Няхаромтэй ялахана ярэй седакуʼ нимня ңадимяхаʼ.
24 Ярэй седакуʼ тэлхана я хоркадё ңэвы.
25 Ңаркаюмʼ манма:
26 - Понʼ минчь ңулиˮ вынхалыниʼ, мэнʼ харбилыниʼ.
27 Такы я хоркадёʼ мю тюханиʼ, хасуй яхана хонаиничь.
28 Я хоркадё мюʼ тюванчиʼ серʼ манэңадиʼ:
29 я хоркадёʼ мюня тодабсьʼ танявы.
30 Тодабчьʼ хэвхана сихирча вэсаку, сихирча пухуча ңамчёвэхэʼ.
31 Сихирча вэсакор туʼ хэвхана ңамчёванта серʼ ңобˮ хоркымʼ пяʼ малхад парадамби.
32 Сидя Сэв Сэрˮ ңачекы мэнʼ харваңахаʼ.
33 Ңаркаюмʼ хонрамба пяда:
34 - Хибядиʼ пыдариʼ?
35 Манчьваниʼ юхуниʼ, екарˮ, мямиʼ ханяна нэдакы.
36 Мэнʼ харваниʼ.
37 Сихарча вэсакуʼ мунта юңгу.
38 Сихарча пухуча ңобтаремʼ мунчи.
39 Сян хонрамба пябчиʼ вэсакуʼ мунта юңгосеты.
40 Тад хонрамба ңэвадалариʼ.
41 Я хоркадёʼ нё хэвхана вэнекодаревʼ мандалчь хонэяхаʼ.
42 Хуняня ңормадавэй пинʼ тарпъяхаʼ, ңаниʼ харасяда явна ядалъяхаʼ.
43 Тад ңыхы мядымʼ хоңахаʼ.
44 Мядыʼ помня ядерманчиʼ серʼ ңобˮ хавы ты ңэвамʼ хоңахаʼ.
45 Ңаркаюмʼ майˮ , манма:
46 - Чедаʼ сававна ңортаниʼ.
47 Нюдяюмʼ ма:
48 - Ңамгэнʼ таремʼ маин?
49 Хавы тыʼ ңэва ңэрханюˮ!
50 Ңаркаюмʼ ты ңэвамʼ нямада, вэнекодарвʼ медпа пяда.
51 Нюдяюмʼ хэвханта ну, сырңа.
52 Ихинянта ма:
53 "Сэвми хачерʼ ңа?
54 Няби сэвханани ты ңэва наңэдя, няби сэвханани пелярида ңэрханю."
55 Няда намгэхэвамʼ ңорңа, ңортара ха.
56 Ңавуˮ пиркана сидя Сэв Сэрˮ ңачекы ңаниʼ ядалъяхаʼ.
57 Няхарˮ яляʼ ңэсоңгана неранчиʼ няна няхарˮ мядмʼ манэңахаʼ.
58 Ңаркаюмʼ ңаниʼ майˮ, манма:
59 - Чедахавʼ сававна ңортаниʼ.
60 Мякˮ тэвъяхаʼ.
61 Еръи мятʼ тюңахаʼ.
62 Мядʼ ервʼ не едмʼ пиревы.
63 Едда ханебчё ңамсана панңа.
64 Тарсиˮ ңабче, тодкабты.
65 Сидя Сэв Сэрˮ ңачекы маңахаʼ:
66 - Ёхобортаханиʼ вынхалыниʼ.
67 Сидниʼ ңавлаидаˮ!
68 Ңачекэхэʼ лаханаваханчиʼ тудуʼ муноңа.
69 Мядʼ черʼ лаханана ңачекэхэʼ нямна вададуʼ юңгу.
70 Туʼ муномаʼ серʼ манчетыˮ:
71 - Тунаˮ ңамгэда хадкэйˮ?
72 Ңанихина тарча мунода юңгосетыˮ.
73 Сидя Сэв Сэрˮ ңачекы ңормадавэй хонё юсибтэйхаʼ.
74 Хуняна хаерта ңадимчь нюдяюмʼ сиды, Ңэвамта тюʼ илада.
75 Маниебта няда хабэйнңэ юсида.
76 Сэвхаюда то сэлхахаʼ.
77 Тарчамʼ манэлись сейда хая.
78 Ңэта ни санэйˮ.
79 Я сид янʼ варилибтеда.
80 Няхарˮ яляʼ пунсяда явна ядванта серʼ неро яхакуʼ неро яхакуʼ нимня ңадимя.
81 Неро яхакуʼ ңылняюʼ пяда.
82 Ңавуˮ пиркана явʼ вар ңадимя.
83 Харта мята тандаяʼ сававна манэңада.
84 Мяканта тэвыˮ.
85 Нисяхаюда небяхаюда маяхаʼ.
86 Сэв Сэрˮ вэсаку манма:
87 - Нерʼ мадамчь, мядʼ хэвхана сянакосьтуˮ.
88 Ңамгэ нисян намдорˮ?
89 Намдормы ңэбˮ нант маянтʼ нинась еремтˮ.
90 Тад чикыʼ пуд нюдя Сэв Сэрˮ ңачекы мята хэвняʼ ни ханчетуˮ.
91 Нисянта вадахаˮ намдорчеты.