1 МАРИНЧА ХАСАВА
2 Ңавхана ямгад танана яхаʼ вархана сидя мяˮ ңэвы.
3 Няби мякана Маринча пухучанта няʼ илевы, няби мякана нахарˮ хасава нюда илевы.
4 Маринча хасаваʼ тыда юңгувыˮ.
5 Нюта няʼ ханесетавы.
6 Ханедад яʼ хора.
7 Нумʼ Маринчанʼ пилиˮ манчьтуˮ нивˮ :
8 Хаманчь яʼ хорамʼ хадабин?
9 Яʼ ниня сармикˮ ңоканю.
10 Няни нябат намдорˮ маянтʼ нянавˮ еремдˮ.
11 Маринча хасава маˮ нивˮ:
12 - Хадавы яʼ хорами ңопойри.
13 Ңамгэмʼ сяңан?
14 Ңобңгуна Маринча хасава мякна мэвы, вавʼ ниня лясювы.
15 Макоданта синʼ сылыˮ.
16 Ов, макодаʼ сарваʼ ниня на чёклавы.
17 Харта сермнянта лаханавонта:
18 - Маринча хасавамʼ хачерʼ мэбˮ сава?
19 Нумʼ масьнюˮ:
20 ңамбˮ сава.
21 Тад ңар ненчаʼ вадавна вахалийˮ:
22 - Мядинчь тодмʼ.
23 Сими нин ңавлаңуˮ?
24 Маринча хасава ма:
25 - Хаманчь таняна чёклын?
26 Мятʼ тюˮ!
27 Ед мале пивы.
28 Ңа мятʼ тю, ңорчь ңамтыˮ.
29 Ненэй мымʼ ңамгэ понʼ ңормана?
30 Ңа ха.
31 Маринча хасава сита таб ваңганʼ сюрңа.
32 Ңаниʼ яляда то.
33 Маринчар юркыˮ, ңормахаданта ңаниʼ яʼ хасава нюта няʼ ханеванчь хая.
34 Тамна ңобˮ яʼ хорамʼ хада.
35 Нумʼ мамононта:
36 - Ов, Маринча хасава иле хаювы, тамна яʼ хорамʼ хадавы.
37 Чика серˮ сейханани вэва.
38 Хавы ңамʼ илебчебсув.
39 Тад ңамʼ пюлада, таб ваңгхад хода, тарпрада.
40 Илена итʼ сэйрада.
41 Тад чикахад ңа намчё хамыˮ , ма:
42 - Ханяна мэсадиʼ?
43 Хонаравакэвʼ.
44 Нумʼ маˮ нивˮ:
45 - Маринча хасава сит хадавынюˮ .
46 Чедаʼ сит илебчедамчь.
47 Масиˮ тарор ңадимзу.
48 Нерʼ мадамченюˮ :
49 Маринча хасава ңамчь сава.
50 Яʼ сярʼ ниня таросиˮ иле.
51 Пилиˮ манчетыдмʼ нянта:
52 яʼ сармик ңока, явʼ сармик ңока, нувʼ сармик ңока.
53 Пада ңани яʼ хоравна ханесеты валакада.
54 Чикы серˮ ини вато ни ңаˮ.
55 Ңа манма:
56 - Чедавʼ Маринча хасаванʼ тобˮ нани нинякэв лыдабтаңгуˮ.
57 Пэвсюмняңы ёльчьңэ хая.
58 Маринча хасава мяканта то.
59 Яʼ хорамʼ нява хадаˮ, ңобˮ илебчамʼ хадавы.
60 Хасава нюхунта манма:
61 - Хуняна ңаниʼ ханеванчь хантаваˮ.
62 Масиˮ яʼ хорамʼ хадаңгуваˮ .
63 Тад ңормахадантуʼ хонэйдˮ.
64 Хуняна юркыдˮ.
65 Маринча хасава ңорңа.
66 Ңорманта серʼ макода синʼ сылыˮ.
67 Сенейʼ тотревʼ макодаʼ сарваʼ ниня ңа ңамчювы.
68 Ңа мамононта:
69 - Маринча хасава, падар нерʼ сими хаданась.
70 Чедавʼ сит нидмʼ савадаштуˮ.
71 Тарча вади намда Маринча хасавант сейда хая.
72 Пинʼ санэйʼ, тад мыхымийˮ, нябэңэ хая.
73 Нябэңэ тирчь хая.
74 Ңобˮ ңарка томʼ хо, тоʼ итʼ ңамтыˮ.
75 Тад идʼ ңылʼ хая.
76 Таси маранʼ тэвмахаданта сылыˮ ңани, идʼ ервʼ мята ңадимы.
77 Ихинянта ма:
78 "Чедаʼ мятʼ тюбˮ нани сава?
79 Нябэңэ сими ниˮ хадаңгуˮ?
80 Мирабсми ңэлимая!"
81 Ңаниʼ мыхымийˮ, ненчаңэ хая.
82 Идʼ ервʼ мятʼ тю, ма:
83 - Ирикэˮ, мань ңодьˮ хабчаңгадани хунывˮ.
84 Ңа сими пя.
85 Ңахад ңэдаванʼ харвадмʼ.
86 Ябнатʼ, сими нён пиратˮ!
87 - Хаманчь сит питартадмʼ?
88 Ханячейʼ сава няни тобˮ нант.
89 Сими нядабадаңэ тараңгун.
90 Маханяʼ нябат ңаˮ сит ңахад ңэдаңгудмʼ.
91 - Ирикэˮ, вадид мадабˮ вэва.
92 Табэдавамт ханядмʼ сертаңгуˮ.
93 - Сиив яʼ хора таня.
94 Сиив яʼ хора халэни поңгамʼ пэбта.
95 Поңгарчь ямав.
96 Ңачекыни ңорчипойˮ хаванʼ харваˮ.
97 Сиив яʼ хорамʼ масиˮ пирдалеңгун.
98 Ңотаңоʼ пыдхавар яʼ хорамʼ масиˮ пирдалеңгун.
99 Ңотаңоˮ пыдхавар яʼ хорамʼ хадаба сававна ченеварханнюˮ.
100 Сиив тусавэй мыңгдамт татадмʼ.
101 Сиив яʼ хорамʼ хадаба мась ңэңу.
102 Чедавʼ ханьˮ!
103 Ненэй инявна тюʼ танадˮ!
104 Маринча ненэй иняанв тюʼ танэйˮ.
105 Идʼ сярʼ нимня ңадимя.
106 Тоʼ варанʼ тэвыˮ.
107 Тоʼ вархана сиив яʼ хора хадырмы.
108 Ңаркадуʼтоса яндараˮ сылаңга.
109 Чикавахана Маринча хасавар ңамгэнʼ ңаченаңгу?
110 Тусавэй мыңгахана енёрчь пяйда яʼ хорахаˮ.
111 Малʼ хадэйда.
112 Тад пырдариʼ хая ненэй инявна.
113 Идʼ ервʼ мятʼ тэвыˮ, ма:
114 - Ирикэˮ, чедавʼ сиив яʼ хора поңгамт ни пэбтаңгуˮ.
115 Малʼ хадэйнась.
116 Яʼ сяртʼ тэвбаˮ ни ханеванчь хантанакэдмʼ.
117 Чикавахана нумʼ нёи манˮ:
118 хаманчь яʼ хорамʼ хадабин?
119 Серми харни серми.
120 Идʼ ерв ма:
121 - Сиив яʼ хорамʼ пирдален.
122 Чедавʼ мякант ханьˮ!
123 Нянт не нюми татадмʼ.
124 Сидя нер ңэя.
125 Сяхариʼ ңэбта ңоˮ ңа сит пябтя няни хуньидˮ.
126 Яʼ сярʼ ниня илебˮ нани сит пилиʼ ңэдабаңгудамчь.
127 Ңа мякант тобˮ, ябтанʼ, нён ламгарюˮ, тоʼ варанʼ туˮ!
128 Ненэй инями чикана ңанэдёда.
129 Маринча хасава едэй мэвы ненча няʼ ненэй инявна танэйхаʼ.
130 Мятʼ тэвъяхаʼ.
131 Чедаʼ Маринча хасаваʼ сидя неда.
132 Пада ңани ңорңа, хонэйˮ.
133 Пиʼ сава ерня мунˮ совононтуʼ, хибяхав лаханавонта:
134 - Маринча хасавар нярхавы хаˮ, тамна едэй недамта мэда.
135 Сиив хэбидя яʼ хорамʼ хадавы.
136 Хачерʼ мэбˮ сава?
137 Хасенавадамта хадриʼ нидмʼ татˮ.
138 Чедавʼ сидя сава нюми тута, Маринча хасапамʼ танйраңгух.
139 Тад мунодуʼ сусаˮ.
140 Хуняна юркыд, ңгорңаˮ.
141 Маринча хасава ма:
142 - Тюку яляхана ханеванчь хэбˮнани савараха.
143 Маринча хасава макодаʼ синʼ сылыˮ.
144 Макодаʼ сарваʼ ниня ңа мале ңамдвыˮ.
145 Мамононта:
146 - Маринча хасава, нён манˮ, ңа сими юрвы.
147 Сими хадавахана хадриʼ ңэя.
148 Падар сиив хэбидя яʼ хорамʼ хадавэнанюˮ.
149 Чикар ңарка хэвы.
150 Чедаʼ мякадант тарпадˮ!
151 Сидя нувʼ нюда сит ңаче.
152 Маринча хасава мякад ңадимя.
153 Мята хэвхана сидя ңачамбой хасава нувы.
154 Лэдиʼ ңулиˮ пирчахаʼ.
155 Панэдиʼ ненэй паны.
156 Ңаркаюмʼ ма:
157 - Яʼ сярʼ ниня таросиˮ илен.
158 Чедаʼ сит пэдаранʼ ханаңгуниʼ.
159 Ңаркаюмʼ ңудамта хойхала.
160 Маринча хасавант идя ёховы.
161 Инта тоˮ махад манэңада:
162 пада мале пэдарахана мэвы.
163 Ненэй паным мэтаюмʼ Маринча хасавант идя ёховы.
164 Инта тоˮ махад манэңала:
165 пада мале пэдарахана мэвы.
166 Ненэй паным мэтаюмʼ Маринча хасавамʼ ңобʼ секадтада.
167 Макаданта тусавэй мыңгмʼ вэробта, ма:
168 - Маринча хасава, чедавʼ маянзиˮ хаңгун!
169 Нерʼ сиив хэбидя яʼ хорамʼ хадаба ңамгэрханась.
170 Нямта тусавэй мыңгахана мале хоркадтаңгудась, Маринча хасавар ңани хынума:
171 - Ябтакоенʼ, сими нён хадаˮ!
172 Етʼ иле сими ханяриʼ ңэдабтаин!
173 Ненэй панымʼ мэта тусавэй мыңгамта сюрңада, ма:
174 - Ңэява!
175 Ңотаңоˮ мякант нин салтˮ.
176 Ңаямт тюку яхана парадаңгумиʼ, сидряңгамт ңани ненэй панэна ембтамиʼ.
177 Минлейʼ тотревʼ выʼ нимня тирчь хантан.
178 Сидя немт ңани ңа няламда падар еэйдант.
179 Чикы вадита мэсомахад ңарка туда есума.
180 Маринча хасавар пара.
181 Лэюнта мюд тода мярабтахая минлей тюʼ тийˮ.
182 Таʼ маляңгэхэд сата хадʼ ладабˮ ненчаˮ манчетыˮ:
183 минлей торха, ядертарха.
184 Минлеймʼ серчипойˮ вадечь вэва.
185 Манчетыˮ:
186 нумтʼ нябат намдорˮ минлей сит хоңгу, танараңгу.