1 ЛАМДИК ВЭСАКО
2 Ялморе хойʼ сюмбаʼ ниня чет ңарка мяˮ.
3 Мынеко масинюˮ:
4 чет ңарка мяˮ ңэбнанта ңодˮ, Ламдик вэсакуʼ няхарˮ хасава нюдя, ңобˮ не нюдя.
5 Чет нюдя лэтаханта.
6 Ламдик вэсакуʼ ңарка хасава нюнча не - Неңы Пякойʼ.
7 Ламдикʼ ңарка хасава ню имча мэсетада ңамгэри илаңгана.
8 Ламдикʼ ңарка ню манма:
9 - Неңы Пякойʼ, харвабат нябат няхарˮ Пякʼ янʼ мяпойʼ пяңгув.
10 Неңы Пякойʼ сеинта паханта пилиˮ сыхыбтэйˮ.
11 Манчь ханада:
12 - Ламдикʼ илебя няхарˮ ёенре.
13 Тамна хамадуʼ хобадуʼ ңоканюˮ.
14 Чикы хобат паны ңобʼ нивамˮ сэдыбюˮ.
15 Няхарˮ Пякʼ янʼ чеда мяпойʼ хэбˮ нани!
16 таняңы яхана индад нир ётˮ?
17 Илеваʼ ямбанʼ няхарˮ Пякʼ яхантуʼ тувы ненчаˮ пырдариʼ туртадуʼ юңгу.
18 Мань чедаʼ нянд маˮ нидамˮ:
19 ңылбад небяни ню, нисяни ню нени ниˮ ңаˮ.
20 Ңадьбяни мадмʼ, хэвани мын ни ңаˮ.
21 Чикаанʼ та ңея.
22 Няхарˮ ёнре тэни хамадуʼ нимˮ таняˮ.
23 Панэдами нидамˮ сертаңгу.
24 Няхарˮ Пякхад хувы панэдуʼ сава.
25 Панэри ңэя, ңамгэри ңэя.
26 Ламдикʼ ңарка ню манма:
27 - Неңы Пякойʼ, муңганд нидмʼ надмˮ.
28 Няхарˮ Пякʼ янʼ мяпойʼ пяңгув, нями ханаңгув.
29 Мюсеиˮ яхана ңамгэ сехэ нивˮ тараˮ.
30 Неңы Пякойʼ ихиниңа ма:
31 "Хандриʼ ңэя.
32 Хачерʼ муңгудмʼ?
33 Недмʼ нидамˮ ңаˮ, хасавани мунʼ тяхаʼ ңэсь хачерʼңэңгу?"
34 Сиив нумгыта салкава ңани, чебтаʼ ямдэйнаˮ ңока мякатанаˮ, няхарˮ ёнаркад.
35 Ламдик вэсакуʼ яляда хэвы, сидя еркаданта яляда хэвы, мале хэвы.
36 Вэсаку нивˮ ңаˮ.
37 Няхарˮ нюдя ңобтуʼ юңгу.
38 Мань ихиняни мадмʼ:
39 "Няр ңэлиринюˮ.
40 Чёняңы мякы ңопой неками чи.
41 Ңобтуʼ хуна?
42 Ханяна мэбтавˮ, мэсьтаютавˮ?
43 Ламдикʼ няхарˮ нюдя, четюмдеймань."
44 Хадриʼ ңэя, чебтаʼ ямдэйнаˮ.
45 Пякойʼ нябами юˮ панта хурюдамʼ вална, мань ядʼ валңадмʼ.
46 Ңока хурюданаˮ ңарка мякананаˮ хаюˮ нивˮ .
47 Таремʼ мюсерпанаˮ сиив мю хаеваˮ, ңоюʼнись ңысуˮ.
48 Сибимчей мюхунанаˮ Ламдикʼ ңарка хасава ню манчь ханада:
49 - Чевʼ ёльчаңгана хадңоˮ ңэдалёрма саваңэ ханта.
50 Мань хуняна ңэдалёртадмʼ.
51 Неңы Пякойʼ, мядмʼ хобˮ нани, томадани мядинчь нидимˮ хантˮ мядимантаңэ.
52 Пякойʼ нябами пиняʼ сыхыбтэйˮ, манма Пыдыр ваданат, пыдыр вырьшат туˮ нивамˮ.
53 Нядамˮ манˮ, няхарˮ Пякʼ яхад салэрта юңгуʼ, юңусеты илеваʼ ямбанʼ.
54 Чедаʼ хэбˮ - нант индад нир ётˮ?
55 Пякойʼ нябани таремʼ мантанʼ хибидя туя сибямта мода, сидянʼ мода.
56 Хадриʼ ңэя.
57 Ламдикʼ ңарка хасава ню ңэдалэйˮ, самбляңг хабтаркамʼ подерчь ңэдалэйˮ.
58 Пуна пэвсюмчь то.
59 Пэвсюмняна то, манчь ханада:
60 - Няхарˮ Пякаяʼ мядомуʼ хоян.
61 Ваобˮ нанту, мачь, не няваˮ мядинчь нинавˮ таˮ?
62 Мачь, нянаˮ ңэсуин.
63 Чедаʼ яхант салпанант тыд нитаˮ, ну мл нарэймта.
64 Нарэй иди хачерʼ маторпаңгуд?
65 Мада нид пиратˮ.
66 Нянаˮ ңэсуин, ңобˮ поʼ сидерт.
67 Няваˮ маниеиваˮ, нябковаˮ.
68 Иачь, тахабе ңамгэр хадакэңгу?
69 Пуна ңэрёймта, нинувˮ хантˮ яхант.
70 Мядʼ лэтрамбада няхаюд нихимˮ таняˮ.
71 Пякойʼ нябами манма:
72 - Чедаʼ сава вадамʼ тананюˮ.
73 Пунэй ңэрёмт чедаʼ вадант еэмня мадаштоютумʼ, ниңгсбтумʼ?
74 Манчьван серми вуни таняˮ.
75 Харт сел.
76 Мань яңгравндами ңынами юңгу.
77 Хучерʼ сит муңтудмʼ?
78 Манчьван мадмʼ, тюкод салкаваˮ.
79 Хуняна ңэдалёрканиʼ, таминаˮ яханаˮ салкаваˮ.
80 Переняни няхарˮ Пякаяʼ вадидуʼ саваˮ.
81 Ңулиˮ сававна лаханакуˮ.
82 Ңобˮ тамадан ңапгэваˮ хадкэңгу?
83 Ңаниʼ нивамˮ илеңгуˮ.
84 Ңопой тамад ңамгэда таня?
85 Харт сел, манчьван яңгравндами юңгу.
86 Чебтаʼ ямдэйнаˮ.
87 Няхарˮ Пякʼ няхарˮ ңарка мятуʼ ханя ңаˮ.
88 Маняˮ ңысываˮ мядоˮ ёркахаˮ.
89 Мямиʼ мярамиʼ Пякойʼ нябани няʼ.
90 Тад Ламдикʼ ңарка хасава ню, Пякойʼ нябами мядинчь ханяхаʼ ханьˮ.
91 Мань тарчанʼ серыми вуни таняˮ.
92 Сэври мэңадмʼ илевани ямбанʼ.
93 Не ңачекэдмʼ нэˮ нидамˮ.
94 Ңамгэ тарча мядʼ мансаяхана мань серми юңгу.
95 Хубтариʼ юркавакынаˮ, пинʼ сырңадмʼ, сэври мэңадмʼ.
96 Ңаниʼ яля то, пинʼ юркывˮ, ңамгэ тарчамана нямторңадмʼ, сэври мэңадмʼ.
97 Чикантуʼ Нюдя Пякая имча мэтадуʼ ңэдякы.
98 Неняңг иры нерденя сиивмта ёльчеда.
99 Неняңг ирыхана Гюдя Пякая манчь ханада:
100 - Ябтулабиˮ ёльчаңэ хая.
101 Няхарˮ юˮ Пякав, ябтунчь хэхэваˮ!
102 Ябту ладвэрха ңэңгу, сиив хасрёнʼ ябтунчь хэхэваˮ.
103 Няхарˮ юˮ Пякант сидя ючуʼ хаёя, сидя ючуʼ хэя.
104 Ийваˮ ңодˮ ядертˮ нянанаˮ.
105 Ехэрана ябтулаби манэтˮ нивˮ.
106 Ламдикʼ ңарка хасава ню пинʼ санабтэйˮ, тарчари вадамʼ ңачевакы.
107 Чет парисе хабтмʼ подерңа.
108 Мань ихиняни мадмʼ, мань ирйв ядерна, "Няр ңэлиринюˮ.
109 Ңуданта мэмыда чет парисе хабчемта ха симтада янʼ чедаʼ подертакыда.
110 Хасава ңэвы ңэбни тарчамʼ нидамчь мэтˮ.
111 Чет тынча хабттыдатанянюˮ."
112 Хандриʼ ңэя, мань серми вуни таняˮ тарчаʼ пойхана.
113 Ябтунчинаˮ хаяˮ.
114 Ябтунчинаˮ хэсь таңы яляхана, сиив ямб яляʼ ябтунчинаˮ юңгуˮ.
115 Сибимчей ялснтуʼ сэя, таңы яляна хаерта пакалчь няхарˮ юˮ Пякадуʼ ңадимяˮ.
116 Ламдикʼ ңарка хасава ню, некаями, чиканта юңгоя.
117 Чикана серми вуни таняˮ.
118 Пякойʼ нябахани Нюдя Пякая мамононта:
119 - Нябаку тюку тярсай ябтуд хосая.
120 Пякойʼ нябами маˮ нивˮ:
121 - Тярсай ябтудуʼ таяˮ.
122 Мань серми вуни таняˮ, хари мэңадмʼ.
123 Пякойʼ нябами ябтудуʼ мятʼ тюленакы.
124 Мань ңани йнчилебˮ нани Нюдя Пякая таремʼ мамонта:
125 - Ламдикʼ ңрака хасава ню сянэй ңэвы.
126 Нядманта танявы ңэбˮ сими хача сянкултаˮ.
127 Сиив хасрёнʼ нита ңэвхы нердена хасрёнʼ нисявовˮ талˮ.
128 Хача нивувˮ ңэдараˮ.
129 Ңэдавами мыңг ңамса ңадавна ханта нись ңаˮ.
130 Минсялмы мыңн ңавэдана нидавˮ мыˮ.
131 Няби хэвхы сюдыʼ ерня ңавыдана нидявˮ ховэда ңаˮ, сэвни едʼ ңэдавы мыңг.
132 Ңари нябчипойˮ ңэдавами мыңгами нянта ни теберˮ.
133 Екарувˮ, хучерʼ пудибабтавˮ?
134 Чедавʼ мэваˮ Ламдикʼ ңарка хасава нюмʼ.
135 Чи, тари намдав.
136 Пякойʼ няюами тарча вадад ехэраˮ нивˮ.
137 Мякана ханесэй ябтукои хана мяканта тюнакы.
138 Хандриʼ ңэя.
139 Нумʼ пэвсюмчь ненчаˮ хонэйдˮ.
140 Мань ңани мякычани ниʼ таңы паэми серадмʼ, ними срадмʼ.
141 Сиңг ңотабе пиби серадмʼ.
142 Сярпани ңоˮ яңга иняна нелкани серʼ малʼ сяроен.
143 Ибˮ таремʼ маˮ:
144 ңавнахавами сиив танявтачь ңобˮ ялумдат нидпасьтын.
145 Чедаʼ хучерʼ муңгув?
146 Томандуʼ мюмня хэбни савараха.
147 Пякойʼ нябами манчь ханада:
148 Пякойʼ нябами манчь ханада:
149 - Не ңачекы, хуняʼ пяр?
150 - Хуняʼ пяв?
151 Ламдикʼ ңаркаˮ ню, хасавар, юңгунюˮ.
152 Ңэдлёвантуʼ мюмня хантˮ нидамʼ.
153 Пякой нябами ма:
154 - Хэбˮнант ңожˮ меркуʼ туин.
155 Мань хаңгуˮ нидамˮ понʼ юңгоюˮ - нант.
156 Хадриʼ ңэя, хэхэва хантˮ нинувˮ.
157 Пыдавар не няда нинувˮ ңаˮ.
158 Не няхаванта ннэчьʼ ңамгэмʼ ханта.
159 Пинʼ санэювˮ.
160 Ханни мюня Ламдикʼ нюдя нюʼ сиив тюнд еся ядачь нямарчилида тальняʼ ңа.
161 Ядабчими нэкалңадмʼ, некани тавы.
162 Чикавахад сиив танетава минтакэдмʼ.
163 Таняна хунантуʼ сиив хасрё нивы ңаˮ, ябту ладвэрха ңэвы.
164 Ябтудуʼ тоˮ, чикана ңаˮ.
165 Маниебˮ нани Ламдикʼ ңарка ню, неками, чет парисе хабтамта тоʼ таню саляна таремʼ талвэдуʼ няхарˮ юˮ Пякар.
166 Таремʼ талвэдуʼ ңани ңудитуʼ сяра.
167 Нямтуʼ харе ңэдтавакэдуʼ ңани тоʼ маланʼ, ңудитуʼ сяра нямтуʼ талвэдуʼ.
168 Ханта ниʼ ңабтавэдуʼ, Ламдикʼ ңарка хасава нюмʼ.
169 Чет парисе хабтамта нареʼ симэдуʼ.
170 Хачерʼ ңэдалёса ңани тыда таминтуʼ миңаˮ, миндярха юсидаˮ.
171 Маниебˮ нани Ламдикʼ ңарка хасава нюʼ пыхыдамта ханта ниʼ ңабтавэдуʼ.
172 Тасиʼ ңамгэ нямта сюрмамта нимня дэбтлабтавэдуʼ.
173 Таремʼ ңамты, нерняʼ панода тюʼ парталая.
174 Таремʼ ңамчёда ненэчьʼ манэсыта юңгу.
175 Хучерʼ муңгув?
176 Тэвывˮ нянта.
177 Ханта нид панода тасиʼ мэхэя пынчилабтав.
178 Хучерʼ муңгув?
179 Мань нидамˮ ядˮ.
180 Тад мань ңулиˮ пырдариʼ вырчадтев, мякни хаядмʼ.
181 Хубтариʼ мякини нултав.
182 Няхарˮ юˮ Пякант нердена мяˮ тандаяʼ юркаˮ.
183 Пякойʼ нябами тамна хуны.
184 Мань юсибтэювˮ.
185 Пуна юркаванта Пякойʼ нябами манма:
186 - Не ңачекэми ченяна хэрхасинюˮ .
187 Чедаʼ чикана хунынюˮ; Нярхавынюˮ ханьˮ.
188 Нямта хачерʼ хэвамʼ нярхавэданюˮ манэсˮ.
189 Едда пи.
190 Сими юркабта, манма:
191 - Не ңачекы, ядерцан, ңамгэ?
192 Мань таремʼ мадмʼ:
193 - Ядеркава ядерңадамчь.
194 Ңамгэ илена ненэчамʼ татадмʼ?
195 Мале хаскэпявэдуʼ.
196 Танянанта хавы, хадавэдуʼ няхарˮ юˮ Пякар.
197 Хадабатуʼ ңодˮ я мэтакана нямтуʼ хадавэдуʼ.
198 Хадахава хадамту, тенаˮ таремъиˮ мэтабабтуʼ ңамгэдуʼ ңэвы?
199 Ңавнанта ңодˮ пыдар миречь мэвы нен ңэдакэн.
200 Пыдар еэмнянт таремʼ мэвакэдуʼ.
201 Чи, таремʼ пʼданиʼ.
202 Пякойʼ нябами манчь ханада:
203 - Няхарˮ Пякая небяни ню, нисяни ню нини ниˮ ңаˮ.
204 Мань ңамнда серии?
205 Небяни ню, нисяни ню хадаˮ махадантуʼ ңачекы ервовоˮ ма, начекытуʼ ервоңэ хэˮ мя.
206 Хучерʼ муңув?
207 Сенеʼ нянта нисядамˮ манˮ, нʼховаˮ ханьˮ.
208 Чиканта ңэя, харта серта нивˮ ңаˮ.
209 Муңгахаˮ ни нись надмˮ.
210 Хандриʼ ңэя, ханяʼ хантаниʼ?
211 Чебтаʼ ямдэйнаˮ.
212 Маниʼ ениʼ ханяниʼ чикана мыˮ.
213 Ханя, хэвнаниʼ?
214 Тоˮ маниʼ яниʼ няюʼ сиданчь ныхымиʼ юңу.
215 Тэвааˮ сидя оюрˮ.
216 Хабтриˮ.
217 Тынаˮ ринаˮ.
218 Ёрчаңгана пэрˮ нидюмˮ.
219 Ёрчь инямʼ няамбабˮ - наниʼ нютниниʼ Пякойʼ нябани няʼ нямарпюˮ нинимˮ.
220 Ёрчь инямʼ няамбабˮ наниʼ Нюдя Пякая ёрчь инямʼ садхалчеты.
221 Маниебˮ нани Нюдя Пякʼ не, ламдикоко не, сэракоко не, вывтый саңомта Нюдя Пякаханта сян нэкалңада.
222 Нярумтэна таремʼ ёрчь иняна сими садхалпахананта ламдикоко не, сэракоко не вахалийˮ:
223 - Нюдя Пяков, ёрчь инямʼ няамбада немʼ нись сынакусˮ тэдар ңобкуʼ нямарпюˮ!
224 Ханяʼ миңанэйˮ ңани, ңобʼ мюсехаваˮ, чедаʼ ямданаванюˮ.
225 Таремʼ манда немча тынчаʼ саˮ на хоркана ңэваханта ладада.
226 Ладабата ңодˮ ламдикоко неʼ, сэракоко неʼ вэида хамдумаʼ, тайда лекэйˮ.
227 Вэида тэпи, мфта няʼ ядалийˮ.
228 Мята хавравдавэй ңэˮ нивˮ.
229 Манчь ханада:
230 - Нюдав Пяков, ненэся ңаркавна сими мэванор.
231 Нянаˮ вадавэн, сими вадавэн.
232 Нюдя ңэдани нисями сими таˮ нисявˮ нятн.
233 Нисярхами ңэˮ нинивэˮ.
234 Чедаʼ мэмтами вадами таня.
235 Дамдикʼ ңарка хасава нюмʼ хадамадант Ламдик ёнэй хыита явота перенянт тобˮ пыдар мандакэн, тюку ладоромамттаремʼ мэсу?
236 Вадеехэнант Ламдикʼ не нюмʼ мэмбдакэн, недант пэотакэн.
237 Дамдикʼ не нюиʼ тэводанант маниʼ сидянэ нобˮ ёхортʼ ңамдңгуниʼ сит няʼ.
238 Ламдик ёнэй хыита явотамʼ хумна нюбеңада.
239 Тарчамʼ намда, вадамʼ намда ёрчаʼ мюʼ тари хубубтэйˮ Нюдя Пякая.
240 Ңобчикы чикы яхаданаˮ ямдэйнаˮ.
241 Сиив яляʼ мюсеваˮ.
242 Ңэсовахананаˮ ңэсодакэваˮ.
243 Ңамгэʼ ёльчанңгана пихина мэва ёлчь нивы ңаˮ.
244 Мань ңани сиʼ няна сэдорадмʼ.
245 Хумбаачиˮ вэва, мямиʼ харниʼ мямиʼ мэңамиʼ.
246 Хибярт ни турˮ.
247 Ңаврамиʼ ни юңгуˮ.
248 Ңорчалпаниʼ тэдамиʼ харниʼ хадабиниʼ.
249 Сиив яляʼ ёльчаңгана, мюʼ ёльчаңгана маняˮ минаваˮ.
250 Инчелебˮ нани ламдикоко не, сэракоко не сёнта ңардан мунубтырмонта пихий пихиня:
251 - Нюдяв Пякав, мань хасавав, сабе инчелеˮ!
252 Ламдик ёнэй хыита явота переняр то.
253 Ярмелехава нивакэн ярмеʼʼ.
254 Ңамгэ мирвхана пяңгодабтувˮ?
255 Тубкахана пяңур, хархана пяңур?
256 Тарчамʼ намда Ламдик ёнэй неками нисявувˮ ехэраˮ.
257 Сеняхавʼ маˮ нисядамˮ, сеневувʼ нивась манэсˮ.
258 Нёни си няңгарңав, пичейнʼ санэювˮ.
259 Хуна нэдалёда?
260 Хибярт юңгу.
261 Няр ңулиринюˮ, ңавэда вадеңа?
262 Тарча вадана Нюдар Пякар чет хабтʼ мунчьпойˮ няˮ мыда.
263 Мядмʼ нядмячь чет ңарка сэрта малʼ подерьяда.
264 Сырчеты.
265 Ңамгэна мэнамʼ мание?
266 Тамна ңоˮ чёрырчеты:
267 переняр то, ңамгэ мирвахана пяңодабтувˮ?
268 Нюдя Пякар тарча вадахана вары мядмʼ нядмячь ңэдалэйˮ.
269 Тарча ңэдала ваңганʼ пакалийˮ.
270 Сутыʼ тяхад сиди хадиле, нямт хадиле сидя хабтарче ңадимяхаʼ.
271 Юрˮ тибяханчиʼ Санчиʼ малхана Ламдик ёнэй чи ңэдякы.
272 Манэмэв ңэись харни неками.
273 Мякнани мэсь вунив манэчетуˮ, ңамгэʼ толха ненэчьʼ ңэбтовˮ?
274 Хурумэнта сдямбой ңэда.
275 Ханда тад ңадимя, сидямбой ңэта хо хурумэната юˮ чибя, нинамта нись толабюˮ.
276 Ирас мялха.
277 Мань таремʼ ини ңыл лаханадмʼ:
278 "Хаита явота ңэхэвабˮ нант, Нюда Пякаямʼ пиркавобат, нямта хачерʼ мэса таремʼ мэир.
279 Нибат пирасˮ хаңгуˮ нинавˮ.
280 Ламдик ёнэйʼ ңэварида яры.
281 Пыда мантарха:
282 "Не ңачекы, таремʼ тась харвотахавабат тахав."
283 Чикы яхана сиив яляʼ илеваˮ.
284 Сибимчей яляʼ хубтахана Ламдик ёнэй чикавна ңадимя, сидя хадиле хабтарче.
285 Четамта сэремта пунта вэтавэда, Нюдянта Пяканта.
286 Нюдяамта Пякамта пялахава пяхад ңаютаривэда, таремʼ минреда.
287 Манибˮ сякана сядкабты.
288 Ламдикоко не, сэракоко не вары мякад ңадимя, манчь ханада:
289 - Ламдик ёнэй, чедавʼ ниравˮ танараˮ.
290 Инд хавомта нёр хадаˮ!
291 Сими вадавы.
292 Хадабˮ нант мань хачерʼ илеңудмʼ евакоңэ?
293 Небями юңгу, нисями юңгу.
294 Ңавракодами хобадми няравˮ таˮ.
295 Неʼ таремʼ мантанʼ Ламдик ёнэй ханамта сяра, маˮ нивˮ:
296 - Тарана нэбта, чикар ханад!
297 Тад мятʼ тю, манчь ханада:
298 - Чдаʼ ямдаңгунаˮ.
299 Не ңачекы, мюдар нэкалˮ!
300 Нюдя Пакахана ңачебяваˮ юңгу.
301 Ты ни тараˮ, ңамгэрт ни тараˮ.
302 Ламдикоко не, сэракоко не, падар сими манэңанась.
303 Ханедамʼ хохова хасавар сава ңэңгу.
304 Ламдик ёнэй недамта мэванчь хаясь.
305 Ламдик ёнэй некант ейңэ мань тодамчь.
306 Нисянт ню, небянт ню няр нидмʼ ңаˮ.
307 Ламдик вэсакуʼ хэхэдмʼ.
308 Ханедам када ехэрадмʼ.
309 Мань ханедами илевани ямбанʼ ңэта хора.
310 Ламдик ёнэй некант юңгоданʼ нкамт хадаˮ нидюмˮ перенида.
311 Ламдик ёнэй некант ейңэ ханʼ мюня ңамчёда хэхэ юркмадмʼ.
312 Ңадбяни сими манэчь ехэран.
313 Сими ханяд манэтан, сэвод тяхана некар хаясь мяпойдарчь, чедаʼ харта товакы.
314 Тармʼ мантанта сейми хая.
315 Тад ямдэйнаˮ.
316 Ламдик вэсакуʼ мятʼ ңысываˮ.
317 Нябани няʼ мямиʼ мярамиʼ.
318 Сибимчейхананта мяпой мюдко ңадимя.
319 Мяпойʼ пумна няхарˮ юрˮ ты.
320 Тюкод ханавыда ңэдакыˮ.
321 Тыˮ пуд ненэчьʼ ңадимя.
322 Ламдик вэсакомʼ пыдана, нярпойʼ лэта, ламдорка ңэвы.
323 Ламдик ёнэй неками тандеяʼ манэңав хуʼ маёңони мэсомадани.
324 Чечумчей мята мярада.
325 Тад хуняʼ хантаваˮ, таняʼ илеваˮ, ялморе хой сюмбаʼ ниня.