1 СИДЯ МАРИНЧА
2 Сидя Маринча ңамгэриʼ толаха яхана мэбчиʼ ңодˮ сидямбойңэ илеңахаʼ.
3 Недиʼ юңгу.
4 Яланчиʼ сидямбойңэ илеңахаʼ.
5 Илеванчиʼ ямбанʼ илебчаи ханеңахаʼ.
6 Илебчаичиʼ ңэва ялянта няңы хэвхад хэңгоядиʼ.
7 Сяриʼ хунат тянё нинякэхэʼ мэˮ ңани, понʼ мэнакэхэʼ ңани, таʼ ёльчаңгана ханедидиʼ хэнякыˮ.
8 Ханедаханчиʼ выдаңгалъяхаʼ.
9 Черсиˮ тосьтыхи.
10 Илебчаичиʼ ңэвав ибˮ хэңгосˮ нихимˮ, понʼ чехэ илебча ңэва тухуˮ мале ңамыˮ.
11 Ңамгэмтуʼ ңамдңахаʼ?
12 Ңорчиˮ хонаңгалъяхаʼ.
13 Ңарка Маринчант Нюдя Маринчаханта ңэвада ярэйˮ:
14 - Нюдя Маринча, ңотаңодˮ ңачекэркан нянавˮ ңа.
15 Тюку яхана мэнавваханиʼ хавнтарханиʼ.
16 Ңока ңорчиʼ хонэйниʼ.
17 Мвсиˮ илена якочамʼ хоңгун.
18 Илена ямʼ хобат ңани сими нён юрˮ.
19 Нюдя Маринчар панэчида сера ңани, ядалийˮ.
20 Хуриʼ ядэлпата ңодˮ ялянта ңылʼ хадрё ядэлтˮ нивˮ.
21 Нюдя Маринчар тадхав сяриʼ хуна ядбата ңодˮ пэвсюменяна тюнда нароңочь манчилабтасьтыда.
22 Хубтаʼ юркасетыʼ, ңаниʼ ядалчетыˮ.
23 Ирыʼ вэсʼ яда.
24 Ирыʼ яда.
25 Неранта няна маниеда:
26 сиив мяˮ ңэвы.
27 Нита еръи мяˮ ненадо ңэвы.
28 Нита еръи мядмʼ яляʼ няңы хэвувна сюртеда, нёда яляʼ н яʼ сядомы.
29 Яля наңы хэвувна мятʼ тю.
30 Пелейкутвы.
31 Няби вавʼ ниня тарˮ наръяна вэнекоя, хуʼ палсабе.
32 Мятʼ тюманда ваванʼ ңамтыˮ.
33 Сиʼ няна падвы вэнекоча танявы.
34 Падвы вэнекоча санэйˮ.
35 Тумʼ пята.
36 Чай ед ңыда, чаймʼ пире.
37 Сиʼ няна, лабтэйʼ ниня ңэтна хыдяда танявы.
38 Падвы вэнекочар паңгхаданта сякалпа пиняʼ ханада ңани, порсана чердевэда.
39 Сиʼ няʼ ңаютада.
40 Чай еданта пись вакхаданта сякалпа толханта тэврада.
41 Толʼ ниʼ хуркари ңавар хамида.
42 Ниры порсанта ңабта, сямян ңавар малңэ чикана ңаˮ.
43 Нюдя Маринчат ядэлыˮ, ма:
44 "Вэнекоʼ тавы мэхэна хачерʼ ңортадмʼ чедаʼ?"
45 Толмʼ панякуна мэдада, няби хэвдуʼ тюмюʼ наронтʼ вабтума.
46 Няби хэвдуʼ толанта ниня хаи.
47 Падвэкор хаювыда сиʼ няʼ малэйда, сиʼ няʼ мэйда.
48 Нюдя Маринчар пинʼ санэй.
49 Ихинянта ма:
50 "Нерʼ пинʼ ханланами хавравдавэй хаи, юррахавэдмʼ тювани малеңгана."
51 Тыбнемянʼ чёкалийˮ.
52 Сиив мядʼ вэнекоˮ тад санэйдˮ ңани, чет ңэнта ни хамыˮ.
53 Нён манˮ , ңобˮ ңэсомта хавравыˮ.
54 Ңобкарт ңэсомта ниˮ хавраˮ, сиив мядʼ вэнекоˮ ңулиˮ тоходуʼ.
55 Таминта таремʼ ңамчи паридев ханимя.
56 Лаханакор Ңарка Маринчаʼ няна хая.
57 Ңарка Маринчант идя ядерңа:
58 "Нявами иламʼ хонакы.
59 Тадхав ңорчиˮ хавнтархадмʼ.
60 Мань ңодˮ етʼ ядалтанакэвˮ.
61 Ядмани серʼ хаˮ мами ңэбта сава ңэңгоданакыˮ."
62 Ңарка маринчар ңобчикы ирыʼ вэсʼ яда.
63 Пэвсюмняна никадавнанта тюмча нароңочь хонасетыʼ.
64 Хуняна юркасетыʼ, ңаниʼ ядалчетыˮ.
65 Ирыʼ вэсʼ яда, ирыʼ яда.
66 Ңобчикы вада, сиив мядʼ нимня ңадимя.
67 Ңаниʼ сиʼ нямна ңадимя.
68 Мядʼ нёда яляʼ няңы хэвувна паняюʼ сядомы.
69 Ерченанта мяˮ ненадо ңэвы.
70 Ерченанта мятʼ тю.
71 Тюванта нерчуʼ тыбнемянʼ сылыˮ.
72 Ихинянта ма:
73 "Нями ңани чи.
74 Хадриʼ харта салимыңэңгуˮ нивˮ."
75 Мятʼ тю ңани.
76 Вавʼ ниня тарˮ наръяна вэнекоч, хуʼ палсабе.
77 Си няна падвэку танявы.
78 Падвэкор санэйˮ , тумʼ пята, чайда пина.
79 Мядʼ сиʼ няд ңэдалёдаˮ товононтуʼ.
80 Масиˮ ненэй ненэчаˮ ңэдакыˮ.
81 Ңарка Маринчар пинʼ вэдерчь ңадимя.
82 Нерʼ тоˮ мада няңы хэвувна вэдерңа.
83 Няхарˮ ңэдалёда.
84 Парисе алче чет хабтмʼ ледчемби.
85 Ңобˮ харамʼ пэмби.
86 Ңобˮ илебчамʼ хадавы.
87 Чикы нянта пумна вартэку падвэку.
88 Тонудуʼ няхарˮ хабтмʼ ледчембиˮ.
89 Чи, Ңарка Маринчар манэяда.
90 Тад мятʼ тю, ма, хартуʼ тутамаˮ.
91 Тад пихиня муңгурмонтуʼ, илебчамтуʼ ха днюˮ яхавдавэй тавкэдуʼ, чедавʼ чивримта хавраˮ, яханархаˮ.
92 Яханамадантуʼ илебчамтуʼ ңаричембрахаˮ.
93 Сиʼ няңы падвэку ңэтна хыдямта паңгхаданта сякалпа пиняʼ ханада.
94 Ңаябад тэнсрихина мыд ңэя, ңаябадхана сабвэда, вэяхана мэвэда.
95 Чикамта ңаниʼ сякалпа тюледа, сиʼ няʼ ңабтада лабтэйʼ ниʼ.
96 Ханодуʼ сюромахадантуʼ ңани, ңамсамтуʼ ңарипчерхаˮ.
97 Парисе алчер мядʼ хансовна нерде мятʼ тю.
98 Ңэда яңгаңа.
99 Тарˮ няръянаʼ хэванʼ ңамтыˮ.
100 Чикы нянта пумна няврёку то.
101 Ңэда яңгаңа, сиʼ няңы хэванʼ ңамтыˮ.
102 Ниры падвэку нямта яңгаманчь хэнякы, пихиня яңгтовнончиʼ.
103 Вартэку падвэку чикы нянта паняңы хэванʼ ңамтыʼ.
104 Падвэку толмʼ сиʼ няд вакхаданта солада, ңылна тэврада.
105 Нерчейʼ ңаябарңаˮ.
106 Тад чикавахад семян навар тэнс ңабтэйда.
107 Чаямтуʼ ңамаˮ, сямян ңавар тэнс малңэ таня.
108 Ңопой толхана ңорңаˮ.
109 Ңормамтуʼ ёльчемядантуʼ падвэку хвдида тэңа, хыдида сюрңа.
110 Пэвсюмняңэ хая, ялумдата паклахэйˮ.
111 Мяднчерˮ хонавамтуʼ пярхаˮ.
112 Ханяңыдуʼ пихиня ханланидуʼ ханлархаˮ.
113 Нита пиняʼ хансомад Ңарка Маринчар пинʼ хая.
114 Томахаданта ниры нита понтʼ ңамчёмяханта маханякуʼ тари юсибтэйˮ.
115 Нида ңоˮ хонэйдˮ.
116 Хонавахана харада юңгоя.
117 Хуняна Ңарка Маринчар хонараркавыˮ, яда ңодˮ никадасьтадакы, ңорчипойˮ нисявˮ ядˮ.
118 Мятуʼ ңулиˮ ядимы.
119 Падвэкодуʼ сенеңана тумта пятархавы, ңаврада пиревы.
120 Нида ңодˮ сядʼ няʼ ңамчё хамыдˮ.
121 Та юркыдˮ.
122 Пихиня ханланидуʼ ханланакыˮ.
123 Ңарка Маринчар ңоˮ пихиня ханңа.
124 Толдуʼ то.
125 Ңобˮ толхана ңорңаˮ.
126 Ңорчь ңоˮ хача ңоˮ ёльчеванʼ харбилыдˮ.
127 Нёʼ няңы хэвхэда парисе алче ненэй вадавна танда вахалийˮ:
128 - Ңарка Маринча, няхавар харта вовˮ нисявˮ.
129 Падар чедаʼ хаванʼ харва иландамт пюсь нисянавˮ туˮ.
130 Чедаʼ нсдамт татˮ нидамˮ.
131 Мятамт татˮ нидамˮ, хандамт.
132 Тэдамт татадмʼ.
133 Ямб ханант вяняңы хэванʼ ты небя яхадсямʼ сярңгудмʼ.
134 Мань подермэми тэми мятиʼ ёльчантʼ сидидиʼ тэвраңгу, мялиʼ сяриʼ ёльчаңгана ңэдакы.
135 Мятиʼ ёльчантʼ выдаравнда ни ңэңгуˮ.
136 Ябтанʼ, тали яʼ понтʼ нёдиʼ ңэсуˮ.
137 Вадани пирда.
138 Чедариʼ тымана сермаˮ вуни таняˮ.
139 Тынчини хартуʼ мась ңэˮ нимˮ.
140 Чедариʼ тыңгарңаяˮ, тыдуʼ маллаңгуˮ, мюдамт хамидаңгуˮ, хандамт хамидаңгуˮ.
141 Тындана серми вуни таняˮ.
142 Пихиня тымононтуʼ.
143 Тынчь ёльчемяхадантуʼ мятʼ тюˮ.
144 Няврёкудуʼ тю.
145 Пихиня аңгтана танявонта.
146 Падвэкор вартэку падвэмта яңгпадакы.
147 Та нёримʼ пю, та няврёку сиʼ няңы хэванʼ ңамтыˮ.
148 Неры падвэку мятʼ тю.
149 Тюков хуринта нямыта юңгу.
150 Падвы панымʼ мэта не.
151 Тюй сюрнямʼ сякававнанта янʼ хамола.
152 Нянта паняңы хэванʼ ңамтыˮ.
153 Та яңор чаймту пяˮ.
154 Яңор чаймтуʼ ңорңаˮ.
155 Парисе алче ңаниʼ вахалийˮ:
156 - Ңарка Маринча, ниры мэмыни вадини ибиед?
157 Ямб ханант няби хэвхы ты небя яхадея ңэңгу.
158 Чикамчиʼ нита нерняна нюириʼ ңавˮ.
159 Таʼ еэмня ңормантадамчиʼ ңани ненсэй мюдчиʼ сихит ңоръидиʼ чедариʼ.
160 Ябтанʼ, тали яʼ понтʼ нюидиʼ ңысуˮ.
161 Харта ирыʼ мюседиʼ.Мань подермэми тэми выдаравнда ни ңэңгуˮ.
162 Вадани пирда.
163 Сававна сит табидаˮ нидамˮ.
164 Ңарка Маринчант ңудунта ханда чёндеретна хан ңэвы.
165 Ненча ямб ханта, юхуна, вандакуда таняˮ.
166 Ямб ханʼ пуняʼ яхадеямʼ ненэся ңоˮ сярвы.
167 Ты небя яхадеймʼ нер вадеңасьнюˮ.
168 Таʼ мансхальяхаʼ.
169 Сяриʼ хунат мюсебчиʼ ңодˮ ялэмдачи пакалийˮ.
170 Ялэмдачиʼ пакламад тамна мюсеркаңахаʼ.
171 Не хаюбтаравы.
172 Ваднана ханя хаюбтараˮ.
173 Маринчар пуй чёндеркад маханякуʼ хартюлэйˮ.
174 Недя то.
175 Хасавамта марчьхаданта сян сухудасьтыда, манчеты:
176 - Нер ирир мась ңани, яʼ понтʼ нёдиʼ ңысуˮ!
177 Намдортада юңгу.
178 Сян сухудасьтыда, юңгу.
179 Ңарка Маринчар ма:
180 - Пуйхы тыˮ ваңгхаˮ ханони малңэ ңосалъядˮ.
181 Чедариʼ тыни ныланаяˮ.
182 Сиив нумгыта тид салкава Ңарка Маринча намчё хамыˮ.
183 Тад ханамта нернякуʼ вадалңа.
184 Пуйхы тыˮ хадо ваңхаˮ ңосалмы ханода мание ңани, ма:
185 - Садуʼ ныклаңгоданакыˮ.
186 Нернякуʼ мансхалада, не ңаниʼ мюдамта мансхала, ңобкарт сада ни ныклуˮ.
187 Не ма:
188 - Чи, сава ңэрха.
189 Ңарка Маринчар нерняʼ мансхалада.
190 Ңамгэʼ пират нернякуʼ ңудонта, нернякуʼ хая.
191 Не хаюбтаравы.
192 Тад Ңарка Маринчар мята мюд пюла.
193 Тарамта паллңа.
194 Маˮ нивˮ:
195 - Ов, тюкода салмуй ңэрха.
196 Не, мюдар чикавна сюрхалед!
197 Недя маңгва ма:
198 - Нерʼ ирир масьнюˮ, яʼ понтʼ нёдиʼ ңысуˮ!
199 Ңарка Маринчар манма:
200 - Маˮ нидамˮ, мюдар чикавна сюрхалед!
201 Мюдамта чикавна сюрхаледа.
202 Мятиʼ мярңахаʼ.
203 Не вавнта чер лехэбтанакы.
204 Едамта ңыданакы.
205 Пада ңани пихий манзаида пэрчакы, тахаёда - тята сюрхале такалтакы.
206 Тахаёда такломаданта ханота са сюрңа.
207 Сокамта аңгакая ңамчёрта ңылʼ мэда.
208 Ңарка Маринчар мятʼ тю.
209 Падвэку, падвы панымʼ мэта не чедавʼ ңэˮ нивˮ.
210 Худанта нямыта вуни таняˮ.
211 Едамта мале пиревы.
212 Ңобˮ толхана ңорңахаʼ.
213 Тад пинʼ хананидиʼ ханңахаʼ, хонэйхаʼ.
214 Иринта тавы наблюй паныʼ мюʼ, не ңаяʼ юдертʼ Ңарка Маринчар хонарэйˮ.
215 Сачь хонаравынюˮ.
216 Пиʼ сава ерня немада хая, ихинянта ма:
217 "Нерʼ неʼ макана хонёвани мальңгана ненаˮ ибиңадамченюˮ.
218 Тюков сененяңы мякачани, тось мэмыни панэчини мэлхадамнюˮ."
219 Немада ни харваˮ.
220 Тамна пэварка.
221 Тад юркы, пинʼ тарпыˮ.
222 Нерчейʼ мята пюла.
223 Манма, мяни палома чикана ңэдакы?
224 Тыни хадо чикана таняңгусь.
225 Ңамгэрт ты хадо хось яма.
226 Хурканʼ таремʼ сюрнаханта ненэй яляданта хая.
227 Яʼ хобакори.
228 Ңамгэрт мяды юңгу, ты хадо юңгу.
229 Ихинянта манма:
230 "Ңахат мэмыни, мякадани тось мэмыни хорэча панэсини мэңадмʼ.
231 Ненаˮ вомадамнюˮ.
232 Чикы томани яхад ңаниʼ хэидамчь, няни тотрсвʼ сими нимˮ сертаңгуˮ ңобчикы.
233 Харни нядамˮ вовˮ.
234 Сененяңы томани мядикони мюʼ етʼ хаңгуданакэдмʼ."
235 Ңарка Маринчар мяканта ядалийˮ.
236 Мяканта ханя тэвˮ, сененяңы томанта мяканта.
237 Мядиконта мюʼ юсибтэйˮ, ңорчиˮ та хадкэйˮ.