1 ТАБ ЕД ХЭВКО
2 Ямгад танана яхаʼ тарка саля.
3 Яха сидя явна хэвы.
4 Яхаʼ талмоˮ ниня балагаңкоча.
5 Чикахана не иле.
6 Нюмча Таб ЕД Хэвко.
7 Вэнекочада танявась сеянта няна.
8 Яланчиʼ сидямбохоʼ.
9 Сяны ңэбта ңодˮ вэнекочада Чёрейˮ.
10 Вэнекочанта пыяʼ ңылмна сырңа, манэтада юңгу.
11 Вэнекочамта хахаюта поңгад нямада, вэнекочанта хахаʼ помна сылыˮ.
12 Ңэсодана мякʼ маниевы.
13 Таб Ед Хэвкор вэнекочамта мятʼ сярада.
14 Ниры маниевыда ңэсодана мядоˮ едʼ хуʼ ванталабтада, таʼ ванталабтада.
15 Сянат чедаʼ мимбата ңодˮ ңэсодана мяˮ мядичи пой хубтамбой ңэвы.
16 Няби мяˮ туда юңгорха.
17 Тамна ңэсомаданчи тумдавэй ңэрха.
18 Няби мякана палнаку со.
19 Та мядхаʼ понтʼ Таб Ед Хэвко тэвыˮ, сянпой мыхымийˮ.
20 Тандая мивы хурумэңэ хармыдэйˮ.
21 Таб Ед Хэвкор таʼ ңачена.
22 Няби мякана палнадуʼ со.
23 Ңэсомадантуʼ яберхаˮ.
24 Няби мятуʼ туда юңгорха.
25 Таʼ ёльчемахадантуʼ ңысутуʼ ңысутуʼ ерв мамононта:
26 - Мкантаˮ ятнадаˮ!
27 Хуняна ңаниʼ ямдаңгунаˮ.
28 Хуняна ңэсомаданаˮ сяркадуʼ ңаниʼ нивамˮ ңамдˮ.
29 Чедаʼ мякантаˮ ятнадаˮ!
30 Сидяри нея ңудад хасавамчиʼ сидя ңкдад минредиʼ.
31 Ңобтʼ сулмасетыдˮ.
32 Мядхаʼ пондʼ тэва тандаяʼ мивы хурумымʼ хоˮ.
33 Ңобˮ не маˮ нивˮ:
34 - Мяканта тэвраваниʼ серʼ ни ңаˮ.
35 Чедаʼ чикы пода хэхэрңая, ябебчёда хэхэрңая.
36 Тумиʼ пятавндавэй нивˮ ңаˮ.
37 Пуна тумиʼ пятамаданиʼ нимимˮ хосаяңгуˮ.
38 Нехэʼ хасавамчиʼ тандаяʼ мивы хурумыʼ ниʼ юсибталадиʼ.
39 Мячиʼ няна хаяха, тумчиʼ пятаңахаʼ.
40 Нердена тумчиʼ парраха.
41 Таб Ед Хэвкор ибидулыˮ:
42 "Нёрвадмʼ янолараˮ."
43 Таб Едʼ Хэвкор няби тумамчиʼ ерча тэвхава ма:
44 "Хасавамчиʼ хосая хадноˮ тутңахаˮ."
45 Таб Ед Хэвкор ңопой мыхывтэйˮ, явна хэʼмяда ни ңадюˮ.
46 Хан ханзад явна миёма юңгу, ңамгэрт юңгу.
47 Танянанта балагаңконта нёʼ синʼ хаˮ мыˮ ңани, Таб Ед Хэвкор ңопой мыхывтэйˮ.
48 Хасава сыраʼ ниня хаи.
49 Таб Ед Хэвкор ваванта юсибтэйˮ, хонэйˮ.
50 Ялэмаʼ няна немада хая.
51 Ялумаʼ нерчуʼ ңэвы.
52 Хасаванта немада хэрха, ябебчёда хэвакы.
53 Балагаңкомʼ сян сюрхалевонта.
54 Вадананта тоˮ мамта пюнакы?
55 Сян сюрхалевонта.
56 Тоˮмамта нись хуˮ нёмʼ чадэжа, мятʼ тю.
57 Таб Ед Хэвкор санэйˮ.
58 Тумта пята, чай едмʼ пире.
59 Толамта та.
60 Ңобˮ толхана ңорңа хасаваʼ няʼ.
61 Ңамгэ ңоромамчиʼ ёльчемахаданчиʼ хасава пинʼ хантамта ханнакы.
62 Таб Ед Хэвкор синяңы хэвхана харта Нулюдакомʼ, хунерку лехэбта, харта нулюдакуʼ ниʼ хонабтада хасавамта.
63 Хонёмахаданчиʼ тандаяʼ сававна ялума, тандаяʼ юркъяхаʼ.
64 Таб Ед Хэвкор чайнда пире.
65 Ңорңаха.
66 Хасава ханъебта сава хасава ңэвы.
67 Мирводиʼ танявакыˮ .
68 Хасава ханеванчь хая.
69 Пэвсюмняна то, сидя илебчамʼ хадавы.
70 Хобадиʼ тавы, ед черко тавы марчанта нирина.
71 Чикавахад хасава пилипонʼ хане.
72 Сяриʼ хунат мэнакэхэʼ ңани, нараʼ няңы нувода пявыˮ .
73 Хасавада яда ядеромаданта никадасьтадакы.
74 Хасава маˮ нивˮ:
75 - Ханяд товами ехэрадмʼ.
76 Ханяʼ хэбчатами ханяд хоңгудмʼ.
77 Твб Ед Хэвкор манма:
78 - Та ханяд хэбчант юңгобˮ вавмиʼ ңобтʼ сертахамиʼ.
79 Чи, ңобˮ вавʼ ниня хонёсетыхиʼ.
80 Сяны ңэбтуʼ ңодˮ пэвсюменяна хасавада ядерчь томаданта пэвсюмчь то.
81 Сидя илебчамʼ пилибтˮ тадңа.
82 Таб Ед Хэвкор ңани сыраʼ тырабтамбида, таʼ тырабтамбида.
83 Хасаванта ханесэй минханта мэядасьтьтда.
84 Тырабтасьтыда, мэядасьтыда.
85 Таʼ таңэв пывахад тырабтасьтыда таңы илебчаита хоба.
86 Ңаниʼ мэсьтыда, тырабтасьтыда, начетыда.
87 Напхая сюрпида.
88 Сяны ңэбта ңодˮ нараʼ нувода пявыˮ.
89 Таб Ед Хэвконт вэнекочада пихиня ңаниʼ чёревонта.
90 Таб Ед Хэвкор чедаʼ ченевˮ нивˮ.
91 Вэнекочанта хахаюта палкад нямада, хахаюта помна сылыˮ.
92 Ов, ңокая юрмян мядˮ.
93 Тыдуʼ хача юˮ ёнарˮ ңэбтуʼ, екарˮ .
94 Таб Ед Хэвконт хасавада хуны.
95 Таб Ед Хэвкор вэнекочамта вадарчь ниры ниры маниевыда ңэсодана мядоʼ едʼ пяда.
96 Мядˮ ңока ңэвыˮ.
97 Хача юрмян мяˮ.
98 Тыдуʼ юˮ ёнарˮ ңэрха.
99 Таб Ед Хэвкор вэнекочамта вадарчь миңа, мядоˮ хэванʼ ңоˮ тювыˮ.
100 Тад вадисей ңудамта ялента пырдариʼ няхарʼ нэкалңада.
101 Ибанта няд хадңэ нялпадылада.
102 Мядʼ маханяʼ сапченанˮ тыˮ юˮ ёнарˮ ңока ңэвыˮ.
103 Тэхэˮ тэвыˮ ңани, таʼ вэнекочамта табида:
104 - Мядʼ едʼ нердеин!
105 Тадхавʼ юрмян ты ныкалңа.
106 Вэнекочада няби ңэмта тибтессты, няби ңэмта тибтессты.
107 Мяеңгад хабчеˮ вэнекочаʼ пумна лямполыˮ .
108 Таб Ед Хэвкор ңани неновай ңудамта яляʼ серʼ няхарʼ нэкалңада.
109 Ңэрмта няд хаморе чир танэйда.
110 Хадңэ яхана сырамʼ ни хаеˮ.
111 Ниры минревы ты танта ёльчьмана наңада.
112 Сяриʼ хункана хэбта ңодˮ ңудамʼ вэңгала ңуда ни ңадюˮ.
113 Чикы мерчада.
114 Танабада тыдя сидя янʼ лекэйˮ.
115 Таб Ед Хэвкор мяканта тэвыˮ.
116 Вэнекочада нёнта пахаңгана мале чёклавы.
117 Не сырида яңгтакы, вэнекочамта сеянта пахантʼ мэ.
118 Хасаванта мамана хая.
119 Хасавада сенянта хуны.
120 Ялумаʼ няна хая.
121 Хасаваʼ немада хэнякы.
122 Мˮ нивˮ:
123 - Нявэˮ, балагаңкони хэвхана тарча сяврырта юңгусеты.
124 Тыбнеˮ мяна хуркари тыбнанаˮ ңэвононтуʼ.
125 Таб Ед Хэвкор манма:
126 - Масиˮ сармикʼ лабадавы тыˮ ңэдакыˮ.
127 Хасавада пихид то, манма:
128 - Хача юрмян ты ңэрха.
129 Хадхав ңамгэрт хад юңгу.
130 Таб Ед Хэвко ма:
131 - Ханячейʼ сава.
132 Падар яда ядерчетынанюˮ, нин никадасьтуˮ.
133 Ханячейʼ чедавʼ ңэдалё нинувˮ ханеңгуˮ.
134 Таминчиʼ юррьяхаʼ.
135 Таб Ед Хэвкор тумта пята, чай едмʼ пире.
136 Тюку яляхад хасавада хане ни ханьˮ, мась ңэдакы.
137 Чедав, тыда таняˮ.
138 Ханда юңгунюˮ.
139 Пэдараʼ няд ханкодамта пинта.
140 Сидя яляʼ мирчакы, няхарˮ яляʼ мирчакы.
141 Хандамта серта.
142 Мяеңгад хабчедуʼ ңэводуʼ манэңа, ханяңэдуʼ тэмгˮ.
143 Тэмг тэдамта мэ, ңэдалё ханелыˮ.
144 Сяриʼ хунат мэнакэхэʼ.
145 Чедавʼ илебчаита ңамса яляна ханесеида ңахат сидя илебчьʼ ңэсьты.
146 Чедаʼ ңамсасавэй малʼ тадьеда, ңэдалё ханеˮ нивˮ.
147 Пилибтˮ хане.
148 Таʼ ханесеты, сыраʼ ханесеты.
149 Ңэрёʼ няңы сырида пяˮ.
150 Таңы илебчаичиʼ ңмса тырабтамбиди.
151 Тырабтахая сюрпидиʼ.
152 Таб Ед Хэвкор таңы илебчаита хоба хаеркад тырабтасьтыда, сырэй илебчаита хоба ңобчикы тырабтасьтыда, мэяда сюрпида.
153 Хасавада хувʼ малко хэбˮ нанта илебядиʼ ңыдри вады.
154 Сэвʼ малʼ ёльмана малңэ илебяңэ хаяˮ.
155 Тянё нинякэхэʼ мэˮ, ңока помʼ мэтакэхэʼ.
156 Хасава манма:
157 - Хадоми хадо варьяваңэ ни ханьˮ.
158 Хувʼ хэбˮ нанта хача яляʼ ерңэ ханңа, пуданахананта яляʼ еръи пуняңэңэ ханлы.
159 Таю Ед Хэвконт хасавада манма:
160 - Таңы илебчает хобат сидя мюйкодар сэдˮ!
161 Сырэй илебчает хобат сидя таричейдар сэдˮ!
162 Мань ханедами мась нивˮ ңаˮ.
163 Мань хандами пиндаңгудмʼ, ямб хандами, юхунадами, вандакодами, сябудами, хандамт.
164 Падар ңани сидяхаʼ мюйкодар сэдˮ, сидяхаʼ таричейдар сэдˮ.
165 Хасава пилиˮ пиндасеты, пилибтˮ мирңа.
166 Тянё нинякы мирˮ, ханода ёльче.
167 Таб Ед Хэвкор мале сэдувнчида сидя таричеймʼ сэдвы, сидя мюйкомʼ сэдвы.
168 Хасавада манма:
169 - Та ңурими хаиˮ.
170 Ңурими юңгу, ңудми пинтаванчь хантадмʼ.
171 Чи, ңудода пинта, сян яляʼ мирчакы, ңудода ми.
172 Та ёльчаңгана хандада малʼ ёльчеˮ гивˮ.
173 Хасава Таб Ед Хэвконта вахалийˮ :
174 - Мань тыни сачь ңыхы сачь ңыхы яхана ханңаˮ.
175 Тыни маламбвами хубта нивˮ ңаˮ.
176 Ханод хураид.
177 Ямб ханар чи, юхунар чи.
178 Вандакуд чер ңамсакуд, тырабтавы ңамсакуд вандаконт мюʼ хураңгуˮ нядавˮ.
179 Сябунт черхав пуна томадани хоңгсакэдмʼ балаңкони латад.
180 Хасава малко хая.
181 Ялянта еркад хэˮ мяданта то.
182 Танабадида тыда чехэда ни ңадюˮ.
183 Ты вунихиʼ ңорˮ.
184 Хаңгнадиʼ ңобтаремʼ юңгу.
185 Ты тэврамаданта чаямчиʼ ңамтакэхэʼ.
186 Сябунчиʼ черад латакодамчиʼ хоңгтакэхэʼ балагаңкоданчиʼ.
187 Хабту ёркалңахаʼ, мюдадиʼ пуйдаңахаʼ.
188 Таб Ед Хэвков хасаваханта ңэвада ярэйˮ:
189 - Балагаңкоми тяхад няд мэмыни нивˮ ңаˮ.
190 Падар ңоˮ тюконʼ тэвˮ нисянавˮ.
191 Балагаңкоʼ мюʼ сулякодар нямˮ!
192 Хасава ңобˮ сулякомʼ няма.
193 Таб Ед Хэвкор ңаниʼ ма:
194 - Тюняңы хэвамта хабаркамиʼ.
195 Тюняңы хэвда маниʼ еймиʼ.
196 Ңылняңы хэвамта нёр хабарˮ, чикана хаёя.
197 Нёнт си, сидеринт си вар пиʼ няд малңэ хэвотанˮ всякона.
198 Тяхант няд нидамˮ мыˮ тюкона.
199 Падар ңоˮ чиканʼ тэвˮ нянавˮ.
200 Хэвотахая хаехамиʼ, тюняңы хэвковада маниʼ еймиʼ ңэˮ нивˮ.
201 Ненэся ңоˮ таремʼ сертадиʼ.
202 Сулякомʼ хабарңадиʼ.
203 Тюняңы хэвамта яхадиʼ, сидеринчиʼ си, нёнчиʼ си малңэ хэвотайдиʼ.
204 Ңылняңы хэвда чиканʼ хаи вэясавэй.
205 Та мансхальяхаʼ.
206 Ненэся ңоˮ хадоʼ мал хубта ңэвы.
207 Ңудунта ңэдалёбчедиʼ, хадончиʼ малмʼ тамна нидиʼ тэвˮ.
208 Нябимчей ңудунта ңэдалавананчиʼ тандаяʼ тэвадиʼ.
209 Надоʼ вармʼ хае хасава нултада тыда ңанчибче.
210 Тыдиʼ ңанчибчеңахаʼ.
211 Хасава нернякуʼ мансхалада.
212 Маˮ нивˮ:
213 - Тыни пуняюʼ ядерпˮ хадони малхад несэй янʼ хэрабтыртаниʼ.
214 Ңобʼ мюсеңахаʼ.
215 Таб Ед Хэвкор хаюбтаревы.
216 Тад хасавада нултада.
217 Мята мюд пюла.
218 Тюрамта палңа, ма:
219 - Тюкод мядʼ мюңе сава, мюдар чикавна сюрхалед!
220 Не мюдамта сюрхале ңани, мятиʼ палңахаʼ.
221 Хасавада тахаюда мэ.
222 Не вавда чер тюленакы.
223 Вавда лехэбтанакы.
224 Латада лехэбтанакы.
225 Латада лехэбтамаданта хасава пиня манзаямта пэрңа.
226 Тахаёда сюрхалё такалъяда.
227 Ханота со сюрңа, мятʼ тю.
228 Еддиʼ мале пивы.
229 Евэй ңормахаданчиʼ хонэйхаʼ.
230 Хасава ңахат ханебтаса, чедавʼ ңэдалё ханеˮ ниь.
231 Хуняна тэдда няма, ңэдалё хая.
232 Ңаниʼ сидя илебчамʼ хада.
233 Пиллипонʼ сидя ханоңа.
234 Пилибтˮ хане.
235 Хадодиʼ пуняңы хадочиʼ маланʼ тыдиʼ тэванʼ харбилыдˮ .
236 Ңаниʼ несяй янʼ хэрабтэйдиʼ.
237 Ңаниʼ несяй янʼ ңысыхыʼ, тари нинякэхэʼ мэˮ.
238 Таб Ед Хэвкор хасава нюкчамʼ хо.
239 Лаханако ню ңамгэ понʼ ңарамтаңгу?
240 Тянё нянякэхэʼ мэˮ, нюдиʼ ңарма.
241 Мале пивня харта ярколанаңэ хая.
242 Таремʼ харптыртаханчиʼ нюдиʼ хасава ёльчңганта тэвыʼ.
243 Ңаниʼ несяй янʼ ңэсосетыˮ, ңэсосетыˮ, тянё вунихиʼ мэˮ.
244 Сяриʼ хунат ненадо сутыʼ яданʼ ңысыʼ.
245 Пирчькая суты ңэвы.
246 Таб Ед Хавконт хасава ню харта ню харта ңэдалёрта хасаваңэ хая.
247 Хасава нюхунча ңэвада ярэйˮ:
248 - Хасава ңачекы, ңарка ненчаңэ нянавˮ ханьˮ.
249 Чедаʼ тэр сэвʼ малʼ ёльчаңгана мядмʼ сюрхалё малңэ тэңэ хаяˮ.
250 Илевамʼ пэрчаңэ ңэңгуˮ нянавˮ.
251 Вэва янд черˮ мят хэвувна турпˮ маңгбада ненчаˮ таняңгуˮ.
252 Ңобˮ - сидя сулякона чердембанˮ.
253 Тында тонавˮ чикав серˮ ни ңаˮ.
254 Чердембанˮ.
255 Ейдамтуʼ ңаниʼ ңобчикы хомбңгуʼ нянавˮ.
256 Маңгабада ненчаи ненэйвавна черсиˮ нён ңэдтамбюˮ.
257 Маниʼ нисянт няʼ нямтар ниниʼ ңаˮ.
258 Маниʼ мале таймна ядерчь хантаниʼ.
259 Сутыʼ ңэваʼ ниʼ мядикодмиʼ сертаңгуˮ нянавˮ.
260 Чикы мядʼ мюʼ сидниʼ хаеңгуˮ нянавˮ.
261 Мят хэвувна мядˮ туртˮ нимˮ ңани, тэр харта мась.
262 Недамт миртамна ёльче тэвна муңгуˮ нянавˮ.
263 Мят хэвувна мюсенаˮ хартуʼ тутаˮ.
264 Ненэся небяюда нисяюда сутыʼ ңэваʼ ниʼ валңаюда, тайримʼ ейчь мядикомʼ серта.
265 Мядʼ июʼ харчиʼ пакалъяхаʼ.
266 Маңахаʼ:
267 - Чедавʼ ервңэ хаян, ханьˮ!
268 Мяканта хая.
269 Пэвсюмняна ңамгэ тарчакомʼ пэртаккы, чикаривана мядикочамʼ маниеда.
270 Хуняна юркыˮ.
271 Мядикочамʼ ни манэсˮ.
272 Ңамгэрт мяˮ юңу.
273 Сидя тынчь хабчеда тыбнемяна мяевы.
274 Хабчехэюда няма, подерңахаюда.
275 Манэманчь хая.
276 Мядикоʼ ңоˮ ма ханяна хэвы ңэбта?
277 Ихинянта ма:
278 "Сутыʼ яданʼ тэвмахавами чинюʼ.
279 Сутыʼ ниʼ тандамами, ңэдалёвартами юңгуˮ.
280 Июй мядмʼ паламанʼ тэвыˮ ңани, ңамгэрт мядʼ паламарт юңгу."
281 Яда черсявы.
282 Сяриʼ хунат Таб Ед Хэвконт хасава ню мэбта, мюсенаˮ тоˮ.
283 Мякˮ ңэдалэйˮ , нинта чеба.
284 Ңэвакуида вуни танеˮ.
285 Хартуʼ няхататуʼ ңэвакодамта хонакы.
286 Мирдамта ёльче недамта мэ.
287 Тэвна недамта мэ.
288 Таб Ед Хэвконт хасава ню недамта хомаданта сававна илелˮ нивˮ.
289 Илебямʼ пэрчаңэ хая.