1 НЕРДЕНА НЕНЭЧА
2 Лаханакоми яʼ валˮ ңэрха.
3 Ңавнанта яда хунарт юңгувы.
4 Пилипонʼ иˮ ңэвы.
5 Идʼ сярʼ ниня сидя сармик илевэхэʼ.
6 Няби паеры нюнякоча, няби вэнеко.
7 Вэнекочар идʼ сярʼ ниня хата.
8 Нюнякочар тад сирʼ ниня хата, нюнякочар идʼ сярʼ ниня хата.
9 Нюнякочар тад идʼ ңылʼ пакалпананта няхарˮ сян яляʼ юңгосеты.
10 Чикы нюнякоча таняд тахав ңобˮ ңувокочамʼ сякалпа ңадимчеңгу, вэнекочаханта митада.
11 Вэнекочанʼ манта:
12 - Ташиновˮ я таня.
13 Вэнекочар манта:
14 - Ңарейˮ, нюняков, хасуй ямиʼ ңулиˮ юңгунюˮ.
15 Ядамиʼ сертабˮ сава.
16 Сянат хунат ңувокочи тэвабабта нюнякоча хасуй ямʼ ңарамдада.
17 Няариʼ ңарка яңэ хая.
18 Вэнекочар ма:
19 - Чи, ямиʼ ңарка, хасуй ңэˮ нивˮ.
20 Хасуй яʼ ниня илебˮ ханя сава ңаˮ.
21 Тадхавʼ нюнякочар яʼ ңарамчь ханярина хэняка, сян ни ңадимчетуˮ.
22 Вэнеклчар ңани хасуй явна ядэлыˮ, хата ңэвадэйˮ.
23 Ңотаңоˮ вэнекочант ненчанта юңгу.
24 Хасуй явна ядерпата вэнеко сидя ненчамʼ ядабта, сидя нярава панымʼ мэтахаʼ.
25 Нябиюмʼ ма:
26 - Вэнеклча, серкат илен?
27 - Ңаа, серкани иледмʼ.
28 - Ерванʼ харван?
29 - Ханядмʼ харваˮ!
30 Ервани танябˮ сава ңэңусь.
31 Серкани иленив пирасˮ.
32 Ңамгэʼ ёльчаңгана нярава панымʼ мэтахаʼ сидя нярава сядэймʼ сертаңахаʼ.
33 Нябида не сидяңгʼ толха, нябида хасава сидяңгʼ толха.
34 Таремʼ сертаңахаюдиʼ.
35 Сертамахаданчиʼ маңахаʼ:
36 - Вэнекоча, чедахавʼ сиив яляʼ юңгуданиʼ.
37 Юңгодаханиʼ хибяри тарчари тубсу.
38 Ервхаюд нёхоюд мисˮ!
39 Сиив яляʼ ёльчаңгана тутаниʼ.
40 Няхарˮ яля хэнякы.
41 Ңобˮ ненэчьʼ то.
42 Панэда, ңаяда малңэ париде.
43 Манма:
44 - Вэнекоча, ервхаюд таняңахаʼ?
45 - Ервхаюни таняңахаʼ.
46 Сидя нярава сядэй, няби хасавараха, няби нерха.
47 Чикы парисеяр сидя сядэймʼ тад посхалңаюда, ненэй ненчаңэ хаяхаʼ.
48 - Ервхаюд чихиʼ, - ма.
49 Парисеяр тад хая.
50 Чиканта хэмяд, сибимчей яляхана, нярава панымʼ мэтахаʼ тоңахаʼ.
51 Маңахаʼ:
52 - Ов, вэнекочаниʼ ервхаюда чедаʼ мале ңадимэхэʼ!
53 Хачерʼ таремʼ хая?
54 Вэнекоча, падар салан ңэвэн.
55 Сенеʼ нянт манинчь, хибяриʼ тобˮ сядэймиʼ нёхоюд ңэдараˮ.
56 Тар нерняʼ падар ервхаюд тэри ненчаңгʼ ңэңухуʼ, хаңгаңгухуʼ.
57 Маниʼ ненэй ненчаңэ сертавй ңэбˮнани яниʼ черˮ ничь хаңгаңгуˮ.
58 Тад нерняʼ нейчамʼ ңорманта хабча ңадимта.
59 Чикы вадидиʼ мэсомахаданчиʼ нярава паны мэтахаʼ хаяхаʼ.
60 Чикад ненчаңгаюд, нябир хасава, нябир не ню хоңахаʼ.
61 Няби нюдя хасава, няби нюдя не.
62 Ңамгэʼ ёльчаңгана чикы нюхуюд ңармахаʼ.
63 Несңэ хаяхаʼ.
64 Сиив хасава нюмʼ хоңахаʼ, сиив не нюмʼ хоңахаʼ.
65 Чикыд ңармантуʼ серʼ ңобчикы несңэ хаяˮ.
66 Мирвдадуʼ хонакыˮ, мятамтуʼ мимба пяˮ.
67 Чикы сиив хасавар, чикы сиив нер ңобкана манзараˮ нимˮ.
68 Мятуʼ ңулиˮ пирчанэ хая.
69 Сененяңы нярава паны мэтахаʼ ңаниʼ тоңахаʼ, маңахаʼ:
70 - Ңагэм , тэвлдадаˮ?
71 - Тайкуй нувмʼ тэводаваˮ .
72 Нумʼ тарсиˮ хахаи.
73 Прича мятаваˮ сертабˮнанаˮ нумдʼ танаиначь.
74 Тарча вади намдмахад нярава паны мэтахаʼ тад лададиʼ ңани, сиив хасавар, сиив нер янʼ мантэйˮ, мятуʼ малңэ тахара.
75 Ңамгэʼ ёльчаңгана чикы ссив хасавар ссиив ненча нячт ямʼ сюрчемба ядертахантуʼ хурканʼ няхатуʼ тэвыдˮ.
76 Нябир нянта вадамʼ ехэра, нябир нянта вадамʼ ехэра.
77 Сиив хасавант сиив вададуʼ ңэдакы, сиив нент сиив вададуʼ ңэдакы.
78 Нитуʼ вада пилипонʼ ехэраˮ.
79 Нярава паны мэтахаʼ вадичиʼ серевʼ чикы ненэчаˮ понʼ иле ничь пирасˮ, хаңгачь.
80 Чедахавʼ ңаниʼ тарча.
81 Хусувэй ненэчьʼ сянтʼ илебата ңодˮ хабчада тута, хаңу.
82 Таʼ мальңгана вэнекочар сидя сядэймʼ нявы ңэбта ңэдараˮ чедаʼ ненэчаˮ ничь хаңгаңгуˮ.
83 Та валакада.