1 НЯХАРˮ МАНТО
2 Намдавэми манту я ʼ валˮ нгэˮ нивˮ.
3 Нгавхы нгэвы серˮ.
4 Яра яхаʼ тэняна Ладукэй то таня.
5 Нгавнанта тюку тоʼ вархана няхарˮ манту илевы.
6 Недуʼ танявыˮ, нгачекыдуʼ танявыˮ.
7 Тыдуʼ нгани нгока нявы нгаˮ.
8 Няхарˮ манту халямʼ хадабасьты, ханеванчь ядерчеты.
9 Ладукэй тохона халяда нгока.
10 Тангы хадавы халэдуʼ няби таʼ нгэсонтʼ тэвсетыдˮ.
11 Нгобнггуна нгарка манто ханеванчь хая.
12 Чет хабчемʼ подернга.
13 Яра яхаʼ маланʼ хая.
14 Маˮ нивˮ, масиˮ илебчамʼ хадаштудмʼ.
15 Таняна илебчада нгоканюˮ.
16 Яляʼ ямбанʼ нгэдалёрнга, нгобˮ илебчамʼ хада.
17 Мяканта нгэдаланггучь, ядна немʼ манэнга.
18 Чикы нер ненэй не нявы нгаˮ.
19 Сябт панэямʼ мэмы.
20 Мантор хонаркурнга:
21 - Падар хибян, ханяд ядан?
22 Парнэн нянувˮ нгаˮ?
23 Парнэ манчь ханада:
24 - Нисями сими нгэдабтась.
25 Мась, мэдами пюлхарˮ.
26 Чедаʼ нгамгэ мэдамта хонггудмʼ?
27 нгамгэрт хадавэми юнггу.
28 Падар нгани нгобˮ илебчамʼ хадавэн.
29 Пелямта няни нянувˮ татʼ?
30 Нисями, небями нгоръихинчь.
31 Мантор маˮ нивˮ:
32 - Хаманчь пелямта нянт татадмʼ?
33 парнэˮ нянани ниˮ тараˮ.
34 Нгамгэʼ еэмня нгавламбанггун?
35 Парнэ нензюмя, ма:
36 - Сава ваданʼ нин харваˮ?
37 Чедаʼ сит хаданггудмʼ.
38 Чиканта мантонʼ санэйˮ, сяцавэй хаденгада.
39 Вэида нгадимяˮ.
40 Тад хасавамта маторнгада.
41 Матормы нгамчида ханʼ ниʼ мэйда.
42 Мальчамта, пибида харта серыда, мяканта нгэдалё хая.
43 Лаханакор пумнанта хая.
44 Яра яхаʼ тюняна нгобˮ нгарка надо таня.
45 Чикы надона я хоркадю таня, парнээтуʼ мянгэ мэта.
46 Чикы хоркадюʼ мюня парнэ вэсаку, парнэ пухуча иленгахаʼ.
47 Нгобˮ не нюдиʼ таня.
48 Чи, чедавʼ парнэʼ не ню нгэдалё то, мядʼ нёʼ хэванʼ хынрада.
49 Нисяда манма:
50 - нгулиˮ понʼ юнггун.
51 Ханямна ядерцан?
52 Тыд нгани ханяд хувыд?
53 Парнэʼ не ню ма:
54 - Нгобˮ нгэдалёдамʼ ходамчь, хадавась.
55 Нгамчида тямʼ, ханʼ ниня нгаˮ.
56 Екарˮ, нгамгэ ненэчьʼ нгэбтовˮ?
57 Манту нгэрханюˮ.
58 Чет хабчемта нидамчь хадаˮ.
59 Парнэ вэсаку ма:
60 - Янʼ похобэн.
61 Чедаʼ нгамсаваˮ нгоканюˮ.
62 Тамна чет ты таня.
63 Нгэдалёртˮ нявамˮ.
64 Тад парнэ пухуча едмʼ пире.
65 Нгормахадантуʼ хонэйдˮ.
66 Хуняна юркыдˮ.
67 Парнэʼ не ню чет хабчемʼ няма, подеръяда.
68 Сеней янʼ нгэдалэйˮ.
69 Тэвмахаданта манэнгада:
70 нгобˮ манто не тувы.
71 Хананта ниня нгамчувы, ярмы.
72 Манто не ярмонта, мамонта:
73 - Хибя вэсакоми хадавы?
74 Масиˮ парнэ хадавы нгэнпгу.
75 Чедаʼ нэкчини нисясипойˮ хаиˮ.
76 Парнэʼ не ню хахаярка то.
77 Немʼ нямада, сяцавэй хаденгада.
78 Тад харанта ниркана неʼ нгэванта сянзинʼ нгуркадтада.
79 Не ха.
80 Парнэ чивмта хавра, неʼ пасымʼ нгонггаонгада, хэвняʼ мода.
81 Тад неʼ нгамчида малʼ маторъеда, хананта ниʼ мэйда.
82 Мяканта хая.
83 Лаханакор няхарˮ мантуʼ нгысынʼ пулэйˮ.
84 Ёнэй мантуʼ мядʼ макоданʼ нгамтыˮ, инчеле.
85 Ёнэй мантор мамононта:
86 - Неками тованʼ ни харваˮ.
87 Ханяхавахана хавакы.
88 Чедаʼ нгамгэмʼ пэртаваˮ?
89 Пэванчь хантаваˮ?
90 Ненчаˮ манчетыˮ:
91 Яра яхаʼ малхана парнэˮ илеˮ.
92 Масиˮ падуʼ сертуʼ нгэдякы?
93 Парнэтуʼ мятʼ хэиваˮ!
94 Нюдя манту мамононта:
95 - Ибˮ хэивачь, парнэ хачерʼ пирдаленггунаˮ?
96 Нгамгэ мирвхана пянггунаˮ?
97 Нгынхана хадабанггунаˮ, тыбкахана?
98 Хуняна юркыдˮ, нгорнгаˮ.
99 Тад тыдуʼ танаˮ.
100 Ёнэй мантор чет падвы тымʼ няма, нюдя мантор нгани чет парисемʼ няма.
101 Нюдя мантонт хасава нюда чет хабтаркамʼ подернга.
102 Няхарнгэ нгэдалэйдˮ.
103 Нангэдя яляʼ ямбанʼ нгэдалыˮ.
104 Пэвсюмеʼ няна парнэтуʼ мятʼ тэвыдˮ.
105 Парнэ вэсаку я хоркадюʼ нёʼ хэвхака нгамчувы.
106 Няхарˮ нгэдалёдамʼ манэчь манма:
107 - Хаманчь тодаˮ?
108 Сиддаˮ вуньсядмʼ хайˮ.
109 Ёнэй мантор ма:
110 - Падар мань неками хадавакэр.
111 Нгэва лэда нёʼ хэвхана тямʼ нганюˮ!
112 Парнэ вэсакор ма:
113 - Мань хадавэми ни нгаˮ.
114 Не нюми хададась.
115 Пухучамта нгобтаремʼ хадась.
116 Чедав мякна мэхэваˮ, сава вадинаˮ мякана мэкнаˮ.
117 Ёнэй мантор ма:
118 - Ненэся нгоˮ мятʼ тюбʼ наˮ савараха.
119 Я ляʼ ямбанʼ нгэдалёбˮ нанаˮ мэнʼ харбилынаˮ.
120 Малнгэ мятʼ тю.
121 Ваванʼ нгамдыдˮ.
122 Парнэ пухуча едмʼ пиревы.
123 Едда ненсчьʼ нгамсахана паннга.
124 Вэвку нгабт тарсиˮ лехэдарнга.
125 Ёнэй мантор ма:
126 - Ненэчьʼ нгамсамʼ нгортаваˮ вуниваˮ нгаˮ.
127 Ханюй халяхаˮ нгаябаркаваˮ.
128 Чикыʼ пуд хонёдаваˮ.
129 Чи, нгоромамтуʼ ёльчемахадантуʼ хонэйдˮ.
130 Пиʼ сава ерня ёнэй мантор сиды.
131 Тад хармта нэкалнга, хонёда парнэда малʼ хадэйда.
132 Хуняна мантуˮ юркыдˮ.
133 Ёнэй мантор ма:
134 - Парнэни малнгэ хадэйнась.
135 Тыбка нись тараˮ, нгын нись тараˮ.
136 Чедаʼ мякнаˮ хэхэваˮ.
137 Тад пинʼ тарпыдˮ.
138 Тыдуʼ нямыдуʼ, подеръядуʼ.
139 Мякантуʼ хаяˮ.
140 Ненчаˮ манчетыˮ:
141 таʼ ёльчанггад парнэˮ ниˮ нгадимзетуˮ, ненчамʼ хадабадидуʼ юнггосетыˮ.
142 Та валакада.