1 А. С.: Пӑтап ики Ԯимәңа мәнәм ясәң.
2 П. В.: Қө̆ты йәԯәт, тенә йәҳмиԯ ԯатнә.
3 Тәҳә йӱвмиԯ ԯатнә, әнәԯ пӑҳиԯ айәли вө̆ԯ.
4 Ө̆нҷәҳԯаԯ найнә ԯиват, ө̆нҷәҳԯаԯ әйнам тәрмәт, тюминт сорәм юккә йәҳәт.
5 Тютәты вӓрта ти нӓрипәт.
6 (Вӑԯтә) қотәт, веԯи қотәт - мәтаԯит, әйнам вӓрәнтәтаҳә, әйнам сорәм юҳәты.
7 Тют пырнә веԯиԯаԯ кӱҷ тӑйтаҳә йәҳәт, веԯит әйнам нө̆қ сорта йәҳәт: оңәт әнтэм, пун әнтэм.
8 Воҷҳә йәҳ, йәҳ.
9 Қө̆вә вө̆ԯәт мӱвә ван вө̆ԯәт.
10 Әй ԯатнә тэм Нюр йоҳәма ти йӱвәт.
11 Нюр йоҳәма йө̆вәтмиԯ пырнә, веԯиԯаԯ нө̆қ ти ӓрҳаҳԯәт.
12 Веԯи қот вӓрәт, ӱрәҳ веԯи қот вӓрәт.
13 (Ӱрәҳ) веԯи қот Ури йӑвәна тувиԯ.
14 Тө̆т вө̆ԯәт, мӓрә вө̆ԯәт.
15 А. С.: Мӱвә мӓрит вө̆ԯәт?
16 П. В.: Мӱвә мӓрит вө̆ԯәт?
17 Қө̆яҳинә вуԯи, (ма) әнтә вуԯэм, ма тө̆т әнтә вө̆ԯәм.
18 Қотәт, мәтԯит вӓрәт.
19 Моԯқӑтәԯ ти вуйԯән, әнәԯ қотлуми, қотвӑԯә.
20 Ма йө̆вәтмам унәԯта веԯи қот вө̆ԯ, тит пырнә найнә ԯиват.
21 Веԯиԯаԯ нө̆қ ти ӓнмиԯәт, мөқԯаԯ әнәԯ кӓԯәңкә йәҳиԯәт.
22 Веԯит арҳә йәҳиԯәт.
23 Ма ар ясәң әнтә тӑйԯәм.
24 А. С.: Пӑтап ики мӱват тәҳнам йӱв?
25 П. В.: Қӑԯи йыҳинә Сорт икинат вӑԯтә қө̆л вуԯәҳ йәҳмин, тәҳә йӱв.
26 Тәҳә йө̆витмиԯа, тәт қөтта вө̆ԯәт.
27 Тәт вө̆ԯәт, Пӑтап ө̆нтәп тәт вө̆ԯ.
28 Нӱң ти Йӑвән нэ вуйиԯэ?
29 А. С.: Вуйиԯэм.
30 П. В.: Пилька, ԯӱв ти ики сӓмԯәҳ, пәԯԯәҳ йәҳ.
31 Пилька қөԯәм ең оԯҳә йәҳмаԯ ԯатнә сӓмԯәҳ йәҳ, пәԯԯәҳ йәҳ.
32 Еиԯнә ти ӓнәмты, ӑԯә ястәтаҳә ӓнәмты.
33 Виҷә пә қутьңиԯнә тө̆йтәҳ.
34 Имиԯ ӑнта ропитԯәҳ, ԯин әйнам веԯэңкә вө̆ԯҳән.
35 Қӑԯи йыҳинә ԯин вө̆ԯҳән, тютат ими тәҳнам нө̆рипәҳ, икия йӑңқиԯәҳ.
36 Тенә ти вө̆ԯҳән.
37 Қө̆вә мӓрә мәттә вө̆ԯҳән, моқи ма тэм ө̆там ястәҳ.
38 Тьӑқа қө̆вә мӓрә, қөс оԯ ким тө̆мпия вө̆ԯҳән.
39 Ԯӱвә (әйқа вө̆ԯмин) қөс оԯҳә йәҳиԯәҳ, ниҷи әнтә йәҳиԯәҳ. Тю аңки, мәнәм пәтәнә, тю Йӑвән нэ, моԯқӑтәԯ қотлуми вуйтән, ти қотнә (вө̆ԯ).
40 Ти ики тэм мәҳа йӱвмаԯ, қытьәм пырат вӑԯтыԯнә, мемиҳә йәҳ.
41 Ти вө̆ԯәт, вө̆ԯәт, тит пырнә қө̆ԯнә вө̆ԯәт, ԯәҳ вуԯиԯ.
42 Ма тьӑқа ар ясәң әнтә тӑйԯәм.
43 Өс тэм әсэҳ ө̆тын (мәта тоҳитнә вө̆ԯ)?
44 Әсэҳ ө̆тув ӑнта виҷә тәт қөтта вө̆ԯ.
45 Тө̆ԯ соҳит тю веԯиԯаԯ ӑԯә тө̆т (қӑймәт).
46 Тәт вәԯэ ԯор.
47 Нӱң ти Пиңнам йӑңқиԯәманнә вуйиԯэ, қө̆в ԯорлиңки.
48 Тӑвин қуԯ кәнҷмин-ө̆тмин йӑңқиԯәт, тӑвин (тө̆т) вө̆ԯәт.
49 Ԯө̆ңин өс Аса мәнԯәт.
50 Аснә вӑԯԯәт, қуԯ кәнҷмин.
51 Тө̆ԯ соҳит Ԯимәңа, Кӓккәң урия йӱԯәт.
52 Кӓккәң уринә мәң виҷә тө̆т қөтта қӓрҳиԯув, ма вӑԯмам выҷнә тит.
53 Нәң йө̆вәтмин ԯатнә, моԯқӑтәԯ тэм аҳәнԯа тө̆внам, ти йоҳәмнам вәраҳтәԯат. Тө̆т вәԯэ ай йоҳәм пул.
54 Нӱң ти қота йө̆втыԯән.
55 А. С.: Әнта, тиминт мәта вӓр әнтә нө̆мԯәм.
56 П. В.: Йө̆втыԯән, веԯинат аңкеннат.
57 Мин виҷә тәт вө̆ԯмән.
58 Тьә мәта тоҳит мӑҳәԯты ти вө̆ԯмән, вө̆ԯмән.
59 Ԯө̆ң қотԯәмән, ти ԯө̆ң қотҳән ең оԯ, ең ӱрәккә әй оԯ мӱвә ең ӱрәккә кат оԯҳә (йәҳәт).
60 Тө̆ԯ соҳит тэм мәҳа йө̆вәтмән.
61 Тәт вӑԯтамән ең ӱрәккә мӱв.
62 Тю вӑԯтамән ең ӱрәккә ԯапәт оԯҳә йәҳ.
63 Тәт тенә қөтта вӑԯҳиԯув.
64 А. С.: Ти йоҳәм пулнә қот.
65 П. В.: (Тит мәң) қутув, ӑнта йыс веԯи қот. моқи тәт намән вӑԯмав (йыси).
66 Кисԯув тэм лота.
67 Мәң тәт қө̆в мӓрә вө̆ԯԯув.
68 Әсэҳ ө̆тувнә пиртоймән, тенә йәтаԯ иԯпинә, чтобы тэм мәҳа йӱтаҳә.
69 Мин веԯиԯәмән тө̆вә қөтта ҷәкәт.
70 Пәԯԯәккән тәт вө̆ԯҳән.
71 Пәԯԯәккән йира мәнәм пырнә, мәң тәҳ йӱвув.
72 Ит вӑԯтамән ең ӱрәккә ԯапәт оԯҳә йәҳ.
73 Тенам қөтта ти вӑԯԯув.
74 Тәҳәңә қөԯат ти йәҳи.
75 Өс әсэҳ ө̆тын ики ти Кӓккәң ури йӑвән қутьәңнә мӱв арит қот-ԯуңқ вӓрәңтәҳәԯ?
76 П. В.: Ти тоҳия, ти әнәԯ қотлиңки (вӓрәңтәҳ). Ит ти қотвӑԯәнә ө̆нҷҳәт ө̆вәрҳә йәҳәт.
77 Тит тю әй кӱта вӓрәм қутыԯ.
78 Пӑтап ики йәҳәԯнат әйқа вӓрәнтәм қутыԯ.
79 Йәҳәԯнат, йәҳ пӑҳәԯнат әйқа вӓрәм.
80 А. С.: Оԯқас тюминт қотәт, тәҳнам йӱтәнә қунтә, қө̆нтҳи пӓләкнә.
81 П. В.: Ти қотәт, ит вәԯэ ӑԯә юҳ пәриԯаԯ қытьәт.
82 А. С.: Өс тэм кат қотлөқи тӑйтә қот?
83 П. В.: Ма вәс ти қот иԯты ястәԯәм.
84 Ти қот, рутьәтнә, руть қотҳә тӑйԯи.
85 П. В.: Тит тьө̆рас йоҳ вӓрәм.
86 Тьө̆рас ики ропитԯәтә қуй йоҳ вӓрәм қот.
87 А. С.: Қө̆вә мӓрә ти қотнә вө̆ԯәт?
88 П. В.: Ҷәкә мәта қө̆вә мӓрә әнтә вө̆ԯәт панә тө̆вә қыйиԯ.
89 Мӱвә урнам ти еиԯаԯ - йоҳԯаԯнат әйнам тө̆т вө̆ԯәт.
90 Аңкиԯаԯ - ө̆тԯаԯнат әй кӱта вӓрәм қутыԯ.
91 А. С.: Өс тэм рутьәт мантэма әнтә ӓвәԯԯәт, ӱрәккә-мӑвәԯҳә певәртԯаԯ - учԯаԯ ӑԯә тет кәԯԯәт.
92 П. В.: Өс тю вӓрта, вӓрәм.
93 Тит ропитԯәтә қө вӓрәм қот, кӱта вӓрәм қутыԯ.
94 А. С.: Қот өвтыԯ қө̆вә мӓрә йәмҳә вө̆ԯ?
95 П. В.: Ма тәҳ йө̆вәтмам ԯатнә әнта, иԯә кӓси ӑԯә нө̆мԯи, тю ԯатнә певәрт, парт әнтэм вө̆ԯ.
96 Тьө̆валәң қот вө̆ԯ.
97 А. С.: Өс тэм пӓләкнә әтьә қотлуми ԯэйԯәм.
98 П. В.: Тит тәт вӑԯәм ики (Тайбин Яков), пәԯԯәҳ ики вӑԯәм қот, ԯин қутын.
99 Теԯ соҳит пә мәҳиԯа мән.
100 Тю мәнмаԯ тӑвнә мемиҳә йәҳ.
101 Тит ԯин вӑԯәм қутын.
102 А. С.: Әй тоҳинә, Тайбин Якәп тәт қөтта вө̆ԯ.
103 П. В.: Вәстю, ма тю қот иԯты ястәԯәм, ԯӱв тө̆т вө̆ԯ.
104 А. С.: Өс тэм ԯө̆ң қот, сӱҳәс қот қутьәңнә?
105 П. В.: Тит мәң вӑԯәм қутув, тьә йоққәнат вӑԯәм қотԯув.
106 Ең оԯ ӱрәккә тө̆т вө̆ԯув.
107 Тит әйқа вө̆ԯув ти қотнә, тәт ваннә.
108 Тит Айпәли мӱкким оԯҳә йәҳ?
109 Ти отьәт, қотәт, мәтԯит вӓрмав ԯатнә Айпәли (ӓви нӓм) вәртә пӱксәлҳә вө̆ԯ, тю ԯатнә мин теҳ кисәԯмән.
110 Кисәԯмән мӱвә, Аснә кӓрҳиԯәмамән пырнә, теҳә йӱвмән, тет ең оԯ ӱрәккә вө̆ԯмән.
111 Тө̆т вө̆ԯмән, вө̆ԯмән, өс ит тэм мәҳа ти йӱви.
112 А. С.: Өс Кӓккәң уринә қот тө̆йтәҳ.
113 П. В.: Кӓккәң уринә йыс нө̆пәт унәԯта виҷә вӑԯәм қутыԯ.
114 Йәԯәп қот, ма йө̆вәтмам ԯатнә, вӓрәнты.
115 Ӑԯә ястәтаҳә, тэм йоҳ тетикиԯ вӑԯтә унәԯта, вӑԯтә мәҳиԯ.
116 Виҷә вӑԯтә мәҳиԯ, виҷә тәт вө̆ԯәт.
117 Миннә тө̆вә қыймаԯ пырнә, рутьәтнә өс ти нө̆қ раңии, қотәт вӓрәнтәҳԯәт.
118 А. С.: Руть қот тө̆т омәсԯ.
119 Рутьәт тө̆т қуԯ кәнҷмин йӑңқиԯәԯәт?
120 П. В.: Әнта.
121 Мӱвә аңкенос, тит мӱвәԯит вө̆ԯәт?
122 Тю Салаваты (йоҳ) юҳ ԯө̆ртмин вө̆ԯәт.
123 Оԯәң ԯатнә тэм мәҳа йӱвәт, кӓв лэк (вӓрта йәҳәм ԯатнә).
124 Тит әщо мәң касәԯмав оԯнә, тәҳ йө̆втәт.
125 А. С.: Өс тэм Қө̆в рӓпәт, уҷәтнә, ти мәта мәҳәтнә қот әнтә тө̆йтәҳ?
126 П. В.: Мәң әнта, ти выҷнә әнтә вө̆ԯув.
127 А. С.: Өс тэм Ԯимәң нум пӓләкнә (қот тө̆йтәҳ)?
128 П. В.: Нум пӓләкнә әнта.
129 Қуԯ кәнҷмин мәң йӑңқиԯув.
130 Йӑңқиԯув, тө̆т вӑԯәм нө̆пәтнә, сойпаԯәмин уҷмин.
131 А. С.: Өс тэм йимәң мәта тоҳитнә, Пӑрнэ рӓпәт уҷәт қутьәңнә (йӑңқиԯтәҳ)?
132 Йим воҷа йӑңқиԯтәҳ?
133 П. В.: Ӑԯә йӑңқиԯта, мәң виҷә йӑңқиԯув.
134 Тө̆вә йө̆вәттә ԯатнә порексәԯи, уҷԯи, мәта тоҳи қөԯәмтәтә ԯатнә.
135 Моқи вӑԯәм ԯатнә, мӱвә тө̆ңпайԯәҳ ө̆т қөԯәмтәԯи?!
136 Тит мин Корныйнам виҷә нө̆рипәҳәԯмән моқи, бенсин уҷ пәтан, тәт вӑԯмамән ԯатнә.
137 А. С.: Нӱң Корный мө̆ҷә өвтәт нө̆мԯәԯа, әнтә.
138 П. В.: Тьӑқа әнтә, ма өвтәтнә қунтә таԯәксәҳԯәм.
139 А. С.: Ма тит айнә вӑԯмам ԯатнә, тө̆т таԯәксәҳԯәм, ӑньԯәң мӱв тоҳи ма нө̆мԯәм.
140 Йәҳәмнат Ԯимәң школаҳа йӑңқиԯәм ԯатнә.
141 Нө̆мтаҳә, әй мәта тоҳи пә әнтә нө̆мԯәм.
142 Әй тоҳинә, ăйԯәҳ ө̆там ястәҳәԯ, ти қӑмәтҳи рӓпнә ԯистан кӓвәт вӑԯԯәт.
143 П. В.: Тьӑқа, ма тюминт мәта тоҳи әнтә вуԯәм.
144 А. С.: Тө̆т ԯистан кӓв кәнҷԯи қунтә, то тю ө̆йәҳтәԯи.
145 Мин мәнмамән ԯатнә, ăйԯәҳ ө̆тамнат ԯистан кӓв ө̆йяҳтәмән, ӑнта мәтапи рӓпнә, ма айәли вө̆ԯәм панә мәҳ пә әнтә арьяԯәм.
146 А. С.: Өс виҷә сойпаԯтә рутьәт вәс қӑнтҳәт, сәйиԯ мӱв тоҳинә?
147 П. В.: Қө̆в рӓпнә ԯәҳ сойпаԯәҳԯәт.
148 А. С.: Ма нө̆мтамнә, ти Микипырәт, уҷәт әйнам қӑнтәҳ йоҳ тө̆т сойпаԯәмин вө̆ԯәт.
149 Тө̆т вө̆ԯәт мӱвә па тоҳинә, ма әнтә вуԯэм.
150 П. В.: Ури мәҳ ыԯ пӓләкнә (вө̆ԯәт).
151 Вирси йӑвән өңнә уҷ вӑԯиԯәт, тө̆т сойпаԯәмин йӑңқиԯәт.
152 Ти тоҳинә моқи қӑнтәқ қө йәмат ар вө̆ԯ.
153 Па тоҳинә йӑрҳан йоҳ, мәтԯит, әйнам Ԯимәң қө̆вит сойпаԯәмин йӑңқиԯәт.
154 Ит ястәтә, мунт ястәтә, Сарайәң вантәң нумпинам сойпаԯәмин йӑңқиԯәт.
155 А. С.: Ти сәйәт әйнам сойәп қӑрә тӑйԯәт?
156 П. В.: Әй мәта тоҳит, әйнам сойәп қӑрә тӑйԯәт.
157 Тит мәң ти тоҳитнә арпа вантмин йӑңқиԯув.
158 Өс ӑв йө̆та нө̆қ ньыньтьәмтәԯи.
159 А. С.: Тенә ти вө̆ԯи тю ԯатнә.
160 Мәттә (тэм мәта тоҳитнә), әнәԯ кирип пӓләккә орийәҳ.
161 Ти ясәң әнтә вуԯэ?
162 П. В.: Ма ти ясәң әнтә вуԯэм.
163 Әнтә вуԯэм, ӑԯә әсэҳ ө̆тәтнә ӓрәҳԯәҳԯи, тю кирип мӱват ӑнта теҳә кӓмпләмты.
164 А. С.: Ӑԯә мәта ԯуңқнә-каԯәтнә кӓмпләмты.
165 П. В.: Ԯәҳ пә тьӑқа ти вуԯиԯ.
166 Ԯуңқәтнә ти, ӑԯә йәмнам қө̆яҳинә.
167 Фёдор Геннадьевич: Ӑԯә ястәтаҳә, моньть.
168 А. С.: Моньть ти.
169 П. В.: Ԯӱв тьӑқа ма қөԯь вуԯэм, ти йыс йоҳ ма әнтә вуйиԯам.
170 А. С.: Сӑстәң рӓп иԯты ясәң.
171 П. В.: Вәс тю, ар мәта нө̆пәт қө̆вин тенә кӓмпләмты, ӑԯә нө̆мԯи.
172 Ма тит тө̆мпи ясәң қө̆ԯнә ястәԯәм.
173 Ԯяԯьәксәтә соҳит, тө̆вәнә қө̆ԯат кӓмпләмты.
174 А. С.: Ԯуңқәт, каԯтәт нюԯа питәт.
175 П. В.: Ԯӱв вәс ӑԯә нө̆мԯи, нюԯа питәт.
176 А. С.: Тө̆т, (ти тоҳинә) нӱң вӑԯиԯән, әнта?
177 П. В.: Ма әнта, ӑԯә вансипнә ӑнта йӑңқиԯув.
178 Ут пӓләки пә йӑңқиԯув.
179 Ут пӓләкнә тюминт сойәм тӑяԯ.
180 (Ти рӓп) ӑԯә мәта кириплиңки қӑмәтҳи ӑԯаԯ.
181 Ө̆вәр рӓплиңки, па рӓпәт киньтя йәмат ө̆вәр, ӑԯә мәта кирип.
182 Мәттә ԯуңқәтнә тө̆вәнә кӓмпләмты.
183 А. С.: Нӱң сар унәԯ тө̆йи мыньте, мӱвә тоҳинә сӓма питән.
184 Вӑԯәм вӓра мыньте.
185 П. В.: Сортәмнә сӓма питәм, Йӑвән ԯор қонәңнә вө̆ԯув.
186 Ма мәта ԯө̆витҳә йәҳмам ԯатнә, қөԯәм мӱвә ньәԯә оԯҳә йәҳәм, мәң Вать йӑвәна йӱвув.
187 Вать йӑвәннә вө̆ԯув, вө̆ԯув, тө̆ԯ соҳит лопкаҳа ай рытнат мәны Пиң воҷ вӓрта.
188 Певәрт қотәт вӓрат, школаҳа тө̆т, Пиңнә пә ти вәйойәм.
189 Школаҳи өс тэм мәҳа тувойәм, тәт қөтта ти вӑԯҳиюв.
190 Аснә, па тоҳитнә әйнам ти кӓрҳиԯәҳԯув.
191 Ԯө̆ңин Аснә, тӱԯҳин өс тәт қуԯ кәнҷмин, вө̆ԯув.
192 А. С.: Өс қуԯԯән нәң қө̆ԯнә нык тувиԯәԯән?
193 П. В.: Утнә тенә вӓԯԯи (қуԯ), әй йоҳԯаԯ веԯи тө̆йәт.
194 Ным пӓләкнә кат ԯорҳән, самолёт па ԯатнә йө̆втыԯәҳ.
195 Қуԯәт тө̆вә аԯԯат, тө̆ԯ соҳит туԯат.
196 Па ԯатнә өс вертолёт йө̆вәтԯ тэм пӓләк ԯора.
197 Ит нәң турпа қонәңнә йӑңқиԯтәҳ, теԯ соҳит вертолётнат (қуԯәт) туват.
198 Йәмат атәмҳә вө̆ԯув, веԯи әнтә тө̆юв.
199 А. С.: Өс қө̆ԯнә веԯэңкә йәҳтәҳ?
200 П. В.: Веԯи?
201 Тэм айпи нэ нө̆пәтнә, веԯи вӓйәт тӑйта ти йәҳув.
202 Оԯәң ԯатнә қут веԯи тө̆юв, тэм тоҳинә.
203 Тэм оть вӓрмамән ԯатнә, қотпәри пә ит тетты, ԯө̆ң қот, ең ӱрәккә әй оԯ тет вө̆ԯув.
204 Тө̆ԯ соҳит, нум пӓләка тө̆вә ти мәнув.
205 Ит ти вӑԯтә тоҳи, Вася нө̆пәтҳә йәҳ, веԯи вӓйәңкә ти йәҳув, вӑԯҳита туԯҳәтҳә йәҳ.
206 Рӑҳәм қө ма тю ԯатнә ар тө̆йәм, ит әйнам әнтэмәт, ма атыԯ уҳәм қыть.
207 Өс ясәң пә әнтә тӑйԯәм.
208 А. С.: Өс нӱң қутьңәннә вӑԯәм ө̆т, кӑлхоснә ропитԯәҳ, мӱвә қө̆ты йәҳиԯәҳ?
209 П. В.: Оԯәңнә ӑнта кӑлхоснә ропитԯәҳ.
210 Тө̆ԯ соҳит қө̆ԯнә ястәԯи, мӱв пәкәт, мӱв тоҳия, өс рыбучасткаҳа пит.
211 Тө̆т ӑнта виҷи ропитԯәҳ, Аснә виҷи ропитԯәҳ.
212 А. С.: Өс тю Аснам әйнам йӑңқиԯәтәҳ?
213 П. В.: Әйнам, мәң тю ԯатнә веԯи әнтә йө̆вәтԯув потта йәтә ԯатнә, сентябернә, вӑтәԯнә вө̆ԯув.
214 А. С.: Өс палаткаҳәт, па өтәтат мәйҳиԯотәҳ мӱв әнтә?
215 П. В.: Ти нө̆пәтнә әнта, мәң тө̆нтәҳ ивәԯ (вӓриԯув), нӱң вәԯэ вуԯэ ти вӓр.
216 А. С.: Кевәртәм тө̆нтәҳ ивәԯ вӑтәԯ вӓрәнтәҳәԯтәҳ.
217 П. В.: Вӑтәԯ тө̆нтәҳи.
218 Тиминт қөԯәмты қунтә, қот тӑйԯи, йәм қотнә омәсԯи.
219 Тюминт әнтә қөԯәмты қунтә, әнта.
220 Мәң Ԯор Воҷнә (вӑԯәм) ө̆тув (Кантерова Любовь Геннадьевна, дочь П. В.), тәҳә йиԯ мәҳи әтьә рутьәт йө̆втәт, мәң тю ԯатнә Ай Ас тө̆мпинә, Ԯимәң өң тө̆мпинә тө̆т вӑԯтәнә ма тютэм сӓма пит.
221 Рутьәт ти йө̆втәт, вәс тю ти ԯатәт унәԯта нө̆қ питәт, йәңк пӑҷԯәҳ сө̆ҳ тю ԯатнә нө̆қ ти ӓт.
222 Тю руть икит тюминтнат.
223 Мәң тю ԯатнә тө̆нтәҳ қотнат вө̆ԯув, тют пырнә тюминт йәңк пӑҷԯәҳ сө̆ҳәт, мәтԯит әйнам нө̆қ ти ӓтәт.
224 Қөԯәмтәтә қө, йәңк пӑҷԯәҳ сө̆ҳ ти вәԯ, йәм қота ти питԯи.
225 Нюки қот вӑрта ԯӑңкԯи қунтә, нюкит нюԯа йонтԯат, нюки қот ти омәтԯи.
226 Палатканә вӑԯта каҷ питәԯ қунтә, палатка омәтԯи.
227 Ти выҷнә йәмҳә вӑԯта ти йәҳи.
228 Тө̆нтәҳ пәриты мәң қотәт тӑймавнә, тенә әнәԯ пайәтнә мәтԯитнә мувты мәнԯат.
229 А. С.: Өс сопек тө̆йтәҳ?
230 Тю ԯатнә қө̆яҳи вӓрәм сопек.
231 А. С.: Нярәҳ кӱрат сөҷиԯәтәҳ?
232 П. В.: Ԯӱв вәс ԯөққәң ньырнат.
233 Қаҷәң қө тю нө̆пәтнә, ԯөққәң ньыр тө̆й қунтә, тютнат вө̆ԯ.
234 А. С.: Тю ԯатнә ма ай вө̆ԯәм.
235 Тю ԯатнә әйнам ныңәт, невремәт нярәҳ кӱрат вө̆ԯәт.
236 П. В.: Ит сопек вәсҳә йәԯ, (невремәт) ньӑвәмԯәт: - Сопекем вәсҳә йәҳ, сопеккән вәтаҳә (мосәԯ).
237 А. С.: Тю ԯатнә мӱв тоҳи.
238 П. В.: Мӱв тоҳи!
239 Вӓртә ө̆т вуйи қунтә, ө̆т қоԯәмты, йәмат ти ԯатнә атәмҳә вө̆ԯи.
240 Атәмҳә вө̆ԯи мӱв, йыс йоҳ вӑԯәмнәң.