1 jŏχanəŋ iki.
2 jeməŋ ńŏl pa woš luχ χŏjn̥ śăńa joχn̥ ăt ujətlajtn̥?
3 măš ŏw kuʀ nŭmpijn̥, χuləm jŏχan χŏrkemən, χor lora nik metśatman kăt un ut ńŏl tăjŋən oməsləŋn̥.
4 lorəl tŏwetn̥ śikem un ulʼlʼijəl, pa pelək χăšlal tup tup sem tăjən nilajət.
5 jeməŋ ńŏla i woš luχa kašəŋ tŏw śăńa joχ poriliti jirasti χojlilət.
6 tăjtaŋšək joχ jirasti χojlilət, ăt tăjtaŋšək joχ poriliti χojlilət.
7 mŏχti măntikem χujem an šup tăχti opsəmtijl̥, an šup tăχti ăt opsəmtitikem χujem ŏχ jŭwətl.
8 ma imŏlti tŏw χăšti χu piln̥ χŭl werətn̥ kurtət χŭwat mătsəmən.
9 ăt lawləsman roman woš luχa joχ poriliti tăχaja jŏχətsəmn̥.
10 sŭmət ńŏl elti χor lora etsəmn̥.
11 wot, jeʀ, loś, šŭw, neməlti tăχa ăt nila.
12 woš luχa χŏti mosl wot kŭtn̥ waŋkəʀsəmn̥.
13 jeʀti i loś pitti tăχa elti wŏlijəs.
14 wotl śikem taka jis, χor lor iśi mătti χălewn̥ latəm; χŭplal śikem unət, χot lŏŋəl iti ărəklət.
15 woš luχa jŏχətsəmn̥, i χu jŏln̥ ăntum.
16 kŭš măti imi iśmilmən, joχ χŏlta mătsət - neməlti imi lil šŭw ăt lall!
17 śiti χŏlti karitemn̥ săχat jŏχan tăj ne kŭš χŏti śŭkənlijəs, ăl pa pŏtər oləŋ śi wŭs: "joχluw woš luχa poriliti mătsət."
18 min pelajemn̥ jastəl: "joχ moslət ki, ńawremən at tulajtn̥."
19 śikemən min jastəlmən: "woš luχ i jŭχ χuləl lŭŋti ujətlemn̥. nemlti ńawrem ăt mosl, min mănləmn̥."
20 tŏχi joχ poriliti tăχaja jŏχətsəmn̥, wŭti katlsəmn̥, χopemn̥, lupləmn̥ mŭjləmn̥ wŏlaŋa leśatsəmn̥.
21 min tŏχi jŏχətmemən̥n̥ wŏlaŋšək joχ jŏχətmel, ăl ajəm kitəm joχ itn̥ kătən̥n̥ weʟśi jŏχtiliti pitsət.
22 joχ χŏśa jŏχətsəmn̥, wŭśa mŭjn̥ weʀsəmn̥.
23 poriliti joχ un tŭt pŏnmel, tŭtel kerətman ăktəśmel.
24 kašəŋ χu lŭw werl̥ werl̥.
25 χŏj χujem ler werl̥, χŏj χujem śol ńŏχərl̥, χŏj χujem ŏləl; aritikem χujem arijl̥, mośtikem χujem mośl.
26 χuləm un kew pŭt nik tăχərtəmət.
27 χuləm low χŏrpi χopti mis sŏχ lak keln̥ sŭmta jărəmət.
28 jăləp ńuləŋ ńăl lŏlpijn̥ jŏχanəŋ iki oməsl: uləm χu nupət elti ăktəm jermakn̥ luməttəm kŭwśəŋ χu kŭlat.
29 nŏχ lumətti ăt lepəm sŏχlal lipaśa pŏnəmət.
30 kăt pelək elti kăt χujn̥ lawəlla.
31 pŭŋəl χuja wana mănti ăt răχəl.
32 i ŏtśam aj ńawrem luχ iki χop śŭŋarija opsəs, in χujŋən̥n̥ śălta jŭwətsa, jel pŭwman lărijəs.
33 joχ min jŏχətmemən̥n̥ χŭw wanən ŏχ jărmel.
34 aj χul śikem ar ŏχn̥ jărəm, nŭwlal il menlamel.
35 ŏχət jărəmət jŭpijn̥ anət oməssajət.
36 śiti χŏlti karitew săχat tʼotʼi iki jastəl: "ja joχ, śăʀti mosl, mătti joχlən at oməslət śăʀti!"
37 mir i ŭŋəln̥ ńuχəpsət: "jŏχan tăj aj pilip pŏχ pa tʼotʼi pŏχ śăʀti at oməsləŋn̥!"
38 tʼotʼi pŏχ kŭš χŏti śŭkənlijəs, ăl pa mir jurən śi opsəs śăʀti.
39 mir kŭt elti it śaśilijəl: "χŏti, mŭjen χŏti jis tăm χătl? pa mŏlti χătlətn̥ paʀlajən mŭj ăntum, tup taś mŏχti oməslən!"
40 śikemən tʼotʼi pŏχ jastəl: "rŭśŋən lojləŋn̥! pŭŋla paʀti mŭj atəm."
41 joχ jastələt: "rŭśŋən năŋ χŏśajen χun kŭnšeməltn̥? lin lojtan tăχajən lojləŋn̥."
42 tʼotʼi pŏχ śi śărtəs, śărtəs, mir pela kerləs, jastəl: "joχ! ma χuləm wŭli χuləm tăχaja aʟsəllam: χănšaŋ χoptem jeməŋ ńŏləŋ iketa aʟsem; nŏwi χoptem jŏχanəŋ ikija aʟsem; piti χoptem kŭr ilpi ikija aʟsem. ma śi jetśəsəm", tʼotʼi pŏχ ńuχməs.
43 jŏχan tăj aj pilip pŏχ śăʀti pa opsəs, pŭt siskem śărtəs.
44 iśi pŏtərn̥ pŏtəʀl, mŭj tʼotʼi pŏχ pŏtərtəs.
45 jŏχan tăj aj pilip pŏχ jetśəm jŭpijn̥ anət wŭsajət; anət wŭjəmət jŭpijn̥ sorəm ńŏχet wŭsajət.
46 wŭlet χŏrti pitsajət. tʼotʼi pŏχ mir kŭt elti luχ ŏχsari kăr teli teln̥ wŭlet lʼepa mŏrχəsl.
47 in ŏχsari kăr tellal wŭli sapəl mŏχti alemilli.
48 kašəŋ pŭš alemitaln̥ nŏχli turəm pela pojkaśman ŭwaltijl̥.
49 lŭw ŭwti śirəln̥ pa joχ pa ŭwlət.
50 wŭlet χătśəti śi leśatsajət.
51 χătśətet jelpijn̥ lapət pŭš nŏχli turəm pela ŭwaltisət.
52 wŭlet isa ńara pitəm jŭpijn̥ jeməŋ jŭχət wŭrn̥ tepsajət; jŏχanəŋ iki pa wŭrn̥ ńŏsətsa weš pelkəl.
53 χuləm un kew pŭt kăt pŭšn̥ nik tăχərtəsajət.
54 ńar ńŏχet oʀsajət; pŭt jetśəs, pŭtəŋ ńŏχet oʀsajət.
55 ńar ńŏχijn̥ kašəŋ χu χuləm pŭln̥ pitilisa, kawərtəm ńŏχijn̥ ńăl pŭln̥ pitilisa.
56 χŏj šiməl letikem χujem, tărəpsa; χŏj lewəpsajəŋkem joχ, iśi χu χŏraslaln̥ nŏχ lojsət.
57 χătl lela wŏlli jis.
58 χŏrəm sŏχət χŏl jŏχanəŋ iki lʼepa i ŏχn̥ pŏtsajət.
59 jŏχi χăśəm anət wŭjəm jŭpijn̥ kŭjəp χošməʟsa. śańka jastəl: "ja joχ, kŭjəp jetśəs; χŏjn̥ sekla?"
60 mir i ŭŋəln̥ ńuχəpsət: "ŏw oləŋ pilip ikijn̥ at sekla!"
61 pilip iki kŭjəp sekti opsəs. kima jastəl: "năŋ joχlan pojkilijaln̥! śi lŏwat jăm at werlət, mŭŋew at esəlləllal! wot χun pela il pitl? χun uś jŏχətl, sora mŭj ajlta? lŭŋən χŭl welluw mŭj ăntum? mŭŋ tŭwəm wŭliluw jŏχanəŋ ikija răχsət mŭj ăntum? pa pŭš pa ti jŏχəttew unti tŭm-taka at ulluw!"
62 ŏw oləŋ pilip iki śi śăʀti pitəs.
63 kejti wŭtśijəl, pa wŏlijəl, pa kejti wŭtśijəl, pa wŏlijəl.
64 met juχət kej oləŋ wŭs.
65 pilip iki śi śărtəs, śărtəs, mir pela kerləs.
66 joχ jastələt: "ja χŏti, joχlan mŭj jastələt?"
67 pilip iki jastəl: "wot pa χătlkemən il pitl mŭj ăntum, ŏš ăntum. uś pŭlŋawətkema jŏχətmal."
68 śol ńŏχrəmkem χujem śol ńŏχərti tăχa elti wŏlijəs, ler werəmkem χujem ler werəm tăχa elti wŏlijəs; isa šitamət, nemlti pălʼəŋ sij ăntum!
69 mir kŭtn̥ śikemən i χu śaśilijl̥: "wot χun il pitl, tŏrli jastəti mŭj atəm?"
70 śi jasəŋn̥ ŏw oləŋ pilip iki ăt ujətti χu iti nŏχ lojəs.
71 χut lapətkem χu śăʀti opsilijəs.
72 isa kăti kŭtija pŏtəʀlət: "wot pa χătlkem il pitl mŭj ăntum, ŏš ăntum!"
73 isa śăʀti tăχa elti jetśəmel jŭpijn̥ jŏχanəŋ iki jaŋ χujn̥ nik pitara χŏti mosl taʟsa.
74 in ńăl lŏlpi jik śar elti tup uśl.
75 χălewta jis.
76 aləŋ săχat nŏχ kilmewn̥ naj tup wŭrtel etmal.
77 in imi-leŋket šŭš-pŏšəχ iti esliśilət letŏt leśatman.
78 joχ pa śi χŏlti ăktəślət.
79 tŭt χot pătilal śel ŏχ kăštel elti mŏχti pŭtləsət!
80 χŏta ŭwətti χujem śita ŭwətl śel ŏχ kăšman.
81 in imi-leŋket śel ŏχ urəŋn̥ apərlija tŭwəmət pa śiśki pŏšəχ jăχti tăχa elti jăχlət.
82 kašəŋ χu tăjmalkemən lumətlʼəmal; ăt tăjəmkem χujem jelta śos keša lumətmal.
83 tup naj păla jis mŭj ăntum, joχ lojəpsət, tup i kŭr tăjsət.
84 χopən χŏta kŭmreməti χujem śita kŭmreməl.
85 mŭj χŭw ăkteśeməsət.
86 pŭt siskemən kašəŋ χu lŭw jŭkan tăχajəln̥ us.
87 kajka leləmkem χujem kajka leləs, wet lŏlpija leləmkem χujem wet lŏlpija leləs.
88 χŏj χŏlta nŏpsəl pitəs, śi leləs.
89 χŏlta śi lŏwatn̥ ăktəślət, minemn̥ sŭs pătlam at χŏrpi.
90 χăšti χu ŭwaltəs: "jŭχur, ti jăŋχa sa, mŏlti wer ul̥l̥!"
91 χăšti χujn̥ jŭχur iśməsa: "χŏlta śi lŏwatn̥ ăktəśləti?"
92 śikemən jŭχur ńăχmanšək ńuχməs: "năŋ aʟ tăŋχa ujətlen, tăm χătlətn̥ śăńa joχ χuśl păla jitikemn̥ χŏlta ăktiśilət!"
93 χăšti χu ăt ujətti χu jŭkana i jel karaləlli.
94 met juχət lŭw mŭj ujətti wŭtśijəs, ŏša pawətsəlli.
95 in joχ leləpsət, śiti kăsman mătsət; lorn̥ tup wet pŭš lăreməsət.
96 lŭw mănmel jŭpijn̥ min luχəssakŋən kaš kăšman pan χŭwat ńol jŭwət(ti) nak unti mătsəmn̥.
97 ńol jŭwət naŋka wanaməmemn̥kemən naməlta min pelajemn̥ ŭw śi pŏnəm śaśl: "χom χiń werəmli wŭrəŋ sămŋən, mŭja jeməŋ tăχaja jistn̥, χŏjn̥ nin ti woχsajtn̥ jeməŋ tăχaja?"
98 min ăt ujətti χu jŭkana i jel šušləmn̥.
99 met juχət ŭwəs, ŭwəs, śi wew śi esləs.
100 śikemən śaśilijl̥, χŏj pa jastəl: "tăm χătl jŏχi jŏχətlətn̥ pela, ŏχ pušəχlən akarətn̥ aʟ alʼlʼilajət!"
101 χop ńŏl tup wŭti răχəmtəs mŭj ăntum, ŏw oləŋ pilip iki mŏχti wŭti esləmtəs.
102 χut lapət pŭš jel jŏχli χuχətlʼijəs.
103 tinśaŋ χŭwatkema mănəs, lojəmtəs.
104 pŏslaŋ joχ, χŏlija wŭti ma kaʟmem χŭwat jŭwati, i χu kŭlatn̥ lojati!
105 in joχ tup taśət, iśi mătti śit i lawəʟsət.
106 ŏw oləŋ pilip iki pŏslaŋ joχ pela χišəmtijl̥: "ŏχ χŏl tăjləti mŭj ăntum? χŏj ăt ki tăjl̥, jelta at wŭl!"
107 χŏj ŏχ tăjəmkem χujem, i jasəŋ ăt jastəs, χuləm kartijn̥ wŏśkəs; at tăjəmkem χujem jelta sojəmnaja wŭs pa wŏśkəs.
108 pilip iki ńuχməs: "ma jŭpemn̥ i χu kŭlatn̥ jŭwati! ma χŏlta purəmləm, nin pa śi purmati! χŏj ma jasŋema ăt χulətl, mŏχti jŏχi kitlem."
109 pilip iki joχlal jelpi utltəlli: "al numəsati, tăta woš luχ χŏrpikem χun! i tŏrn̥ ler, i warəs nŭw moreməti ăt răχəl!"
110 in pŏslaŋ joχ pilip iki jŭpijn̥ kel iti olməssət, śiti wŭti mătsət.
111 śi wer śi χăśəs.
112 min śitemn̥ jŏχi mătsəmn̥.
113 rămkəmtəmkemən lorəl χŭp kŭtn̥ wet kajək il lŏŋəltilajət, nŏχ etltilajət.
114 wanašək jŏχətsət: kăsti joχ.
115 śăńa joχ pŏslaŋ joχ piln̥ kăslət.
116 pŏslaŋ joχ jaŋ χujn̥ χŏlʼmaŋ χujn̥ i χopa lelmel.
117 χoplal jikn̥ mikra jŏχətmel.
118 - χuśl śi pa χurliti wanaməs.
119 kašəŋ χu lŭw werəl werti pitəs.
120 χŏja mosəs ler, ler wŭti unta mănəs; χŏja mosəs śol nak, śol nak sekti mănəs.
121 kăsərliti mănəmkem χujem kăsərliti mănəs, kŭsiliti mănəmkem χujem kŭsiliti mănəs, il ŏləmkem χujem il ŏləs.
122 lewman oməstew săχat ow šŏppi nemli mănəmtəs.
123 ma jŭpel χŭwat ŭwn̥ pŏtsem: "tăχa nemli, ti jăŋχa sa, ma jasəŋ tăjləm!"
124 lŭw mŏχti kareməs, woχsa mŭj ăntum.
125 nemli, opsa, opsa leti!
126 lŭw tup taś tŏwi χu!
127 χănəm, mătti moś šup ăt tăjlən? monśa sa, at ăl mŭj kašn̥ χŏlal!
128 lŭw mośti peramajəl jŏχtəs.
129 ma jastələm: "moś χŏti χulətti kaš ăntum. năŋ in luln̥ jeməŋ ńŏla jăŋχəm weren pŏtəʀlən ki, mŭj χŏrpi pela?"
130 ma inśəsti śi pitsem.
131 mănem mŭj mosəs, inśəsti isa inśəssem.
132 i pŭš iśməsem, lŭw mănem iśi mătti nepek lŭŋətl, isa χŏlija χăńa werət pŏtəʀsəlli.
133 nemli pŏtəʀti oləŋ śi wŭs.
134 "ma jeməŋ ńŏla met oləŋ pŭš mătsəm. jeməŋ ńŏla χŏti joχ jăχlət, mănem tăm χătl unti sŭs pătlam at χŏrpi us, tăm χătl ăt ki jăχsəm.
135 tŏχi jŏχətsuw, mŏχti mŭŋ pŏslaŋ joχ ateʟ jira opsəʟsajuw.
136 oləŋn̥ il oməssuw, kašəŋ χu sŏlkŏwa peləkn̥ wŏśkəs.
137 jeməŋ ńŏln̥ mŭŋ pŏslaŋ joχ neməlti ăt weʀsuw, mŭŋ werew tup oməsti.
138 śăńa joχ tŭt ăʟsət, jŭχ sewəʀsət, jik aʟsət, letŏt weʀsət, ńŏχi oʀsət, mŭŋ jŭkan šăškanluw jăʀsət.
139 mŭŋewa i tŏrn̥ ler, i jŭχ nŭw ńŏχtəti ăt răχəs.
140 mŭŋ werew tup tălaŋ χătl još lŭja sewman oməsti.
141 χŏj oməsti tăχajəl elti ješa ki pŭŋla ńŏχləl, mŏχti kaśaləlajən, il opsəʟʟajən.
142 jik jiślən ki, umpija pa kăt χuləm karti wŏśkəti mosl.
143 tŭt elti χăχsa ki kŭšməʟʟən, tŭta pa ńăl wet karti wŏškəti mosl.
144 mŭj tup ńŏχtəln̥, isa ŏχ mosl!
145 "tal śepən jeməŋ ńŏla măntikem ăntum. ma oləŋ mănmemən śepem śel ŏχn̥ kŭšəm iti lojəs, in tăta śi tup kăt karti χăśəs. jam kuʀ lapkajn̥ aśem χŏlʼmaŋ sŏlkŏwa śel ŏχ peltijəs, χuləm χujn̥ χŏlija ar tăχaja jowlsəlluw. in jŏln̥ peŋka pŏreməti i ńań pŭl ăntum; ńań mŭjn̥ lutti ŏš ăntum!
146 "χălewət χutləl mŭj ăntum, in wŭli tutlʼijəm joχ mŏχti śi ŏχ kănšəmələt. kašəŋ χu ńăl-jaŋ sŏlkŏwajn̥ pitsa; mŭjn̥ soχəptantəti ŏš ăntum! ŏw oləŋ pilip ikilan mŭj χŏrpet? kawrəm ńaləm kim talti χŏrpet! ăt ki ŏχ măln̥, śita pa atəm, mosəŋ mŭləsti pitl. ješa lŭw eltel jŏwrašək ki mănlən, ekrəŋ χălew χŏrpi mŏχti mŭləsti pitl. măti ŏt ăt ki tăjlən, lŭw mušəln̥ el sajen eŋχa, lŭw śalʼətti wer ăt tăjl̥!"
147 ma iśməsem: "kămən wŭli jeməŋ ńŏla tutlʼisti?"
148 - "wet χăttər χopti, lapət ăl ajəm kitəm wŭlet."
149 ma pa iśməsem: "χŏrəm sŏχlən χŏlta tuslən?"
150 - "kăt piti lawəm χŏrpi sŏχ il kŭr ilpi ikija laksəlluw, i sŏχ jiŋka eslsew, χuləm sŏχ nŏχ tăχəʀsuw. χăśəm sŏχlal mirn̥ lutsajət."
151 ma iśməsem: "χŏjtət śăʀsət i kămən χu śărtəs?"
152 - "meta mŏltet śăʀsət, χăś ul pa χuskem χu."
153 - "χŏti śărtəm joχ jastələt?", ma iśməsem; "wot sora mŭj ajlta il pitl?"
154 - "nemlti wŏlaŋ ŏšel ăntum, ar sirn̥ rŭwemələt. itlal jastələt, wot χălewət il pitl, tuχəllal jastələt, tăm pa χătl il pitl. śiti ar sirn̥ rŭwemələt, ŏš ăntum, χŏja ewəlti. śol nak sekti χolman mănti kŭš wŭtśisəm, mosəŋ χălewət wot il pitl, mănti mosl. mălχatl woš luχn̥ mŭj ăt tăjəm χujem śitl werəs. jeməŋ ńŏln̥ tup tălaŋ χătl još kăt păl wŏša ńorətman opsa!"
155 śiti rŭweməmemn̥ elti uś at χutləs.
156 naj jŭχ tăjət pălata jis.
157 nŏχ lojəpsəmn̥, kăt χu kăt tăχa pela šušməsmən.
158 χătl χošma jiti săχat isa ajn̥ ajn̥ χopət nŏχ kilti pitsət.
159 in wŭli tutlʼijəm joχ tup semlal nŏχ meneməsət mŭj ăntum, jušn̥ χŏj lʼikməs, aprapsa ŏχ soχəptəti.
160 χŏta ŭwətti χujem śita ŭwətl ŏχ kăšman.
161 pŭt sis χăśəs mŭj ăntum, sojəm pa peləkn̥ śiməś sij siməlləs, mŭw wŏlli ăl kŭmijəl.
162 in leti nem werilijəm joχ-leŋket iśi kŭrəmn̥ jăχa ăktəmtəmət.
163 χŏta kŭš šăšti χu śita kŭš šăšl ŏχ woχman.
164 ŏχ kănšəməsa.
165 χŏj ŏχ tăjəmkem χujem, i jasəŋ ăt jastəs, mŏχti kŭrkəs.
166 tŏnti tăjəm χujem tŏntel kŭrkəs, laŋki tăjəm χujem laŋki kŭrkəs.
167 χŏj unta esləm ŏt tăjəs, unta esləm ŏtəla nŏməs pŏnəs.
168 χŏj mŭj tăjəs, śitl măs.
169 χŏj unta esləm ŏt ăt tăjl̥, χŏlta nŏməs pŏnl̥?
170 tuχəl χujem kăt jošŋəlal lojləŋn̥, mŭjəl măl?
171 tuχəl χujem peŋka tuχəmti ńań pŭl ăt tăjəl, măti pa jirasəm wer soχəptəti?
172 kima ŭwl̥: "tăχa, nemli, ti jŭwa, ŏχ soχəpta!"
173 nemli sorəm lŏwi lanti pŭtl piln̥ ăt jetśəl, măti pa ŏχ soχəptəti wer!
174 ăt ujətti χu jŭkana i jel lat pŭlemijəl, śiti χăś jastəl: "jeln̥ χŏʟśa rŭwemati!"
175 tijeʟ śaśilijl̥: "lanti anem lipija pawəttem takli χun jiləm! tăm lanti anem χŏna ki pawətlem, tăm tŏwi χătl χŏlatal ăt śaśl."
176 met juχət lawləsman wewli pitsət.
177 nemli woχti kimet χu kitsa.
178 kitilijəm χu ti jŏχtəs, jastəl: "nemli sorəm lŏwi lanti pŭtəla ŏlmal, wŭrajn̥ śi nŏχ χŏpitsem."
179 nemli ti etəs, lŏwatəln̥ latn̥ nŏpitimal, tup semŋəlal kŭśləŋn̥.
180 nemli jeln̥šək jitaln̥ ŏw oləŋ pilip iki joχ pela jŏraśmanšək ńuχmijl̥: "jŏχətl kŭš ăntum, mŭj tewtəmlal măl!"
181 nemli ńuχməs: "ja χŏti! mănem mŭj perətti śi lŏwatn̥ ješaləslən? perətti mŏlti tăjləti ki, nin lʼalʼ tel arat mir nin pertaln̥!"
182 pilip iki śikemən pek ńŏχi lewman χišəmtijl̥: "al lalta tăta, mŭj lampa wŏs χu! năŋ urŋen̥n̥ jaŋ pŭš pojkaśman jăŋχa!"
183 nemli jastəl: "mŭj śi lŏwatn̥ ńerəslən! tăjtaŋ śi tăjtaŋ, χŏjn̥ ăt ujətlajən! mănem wŏs χuja lŭŋətlen - wŏs joχ mŭj tăm pŏrajn̥ sorəm lŏw lanti pŭt χun lelət? năŋ potəm wŏj šăš wŏj pŏrten săχat pa χu pa χun potəm wŏj šăš wŏj pŏrəl?"
184 pilip iki χišəmtijl̥: "ja, mija, mija ŏχ! ampət iti al χŏrta! năŋen lawəlman wewli pitsuw."
185 - "năŋ śi watlen, neməlti ăt tăjləm, mŭjem măləm! ăl ăt ki ewəllən, lumtəm sŏχlam pela kaśləltijaln̥!", nemli pălmanšək ńakšilijəl.
186 pilip iki jastəl: "χŏjn̥ ńara eŋχəssajn̥? šema šŏχa lumətlʼiten?"
187 nemli jastəl: "năŋ mosəŋ tăjtaŋ χu mŭj χŏrpi χătl werl̥, śiməś sŏχ lumətlən. năŋen χŏti mŭj šuk? mălχatl jeməŋ ńŏln̥ mătti χuja kăt χuləm ńŏχi pŭl măsn̥, in śi jŭkana mŭŋew ŏχ urəŋn̥ apərlija tulen. uś ul ăntum, uś ki us, nik lora lowəlməsn̥, ńăl wet χoləp il jiŋka kŭrkəsn̥, χop tel χŭl ješa mosəŋ pitəs!"
188 nemli-leŋki kŭš χŏti pojkaśijl̥ tăl unti lawəlti, in pilip iki śi χun χulətl: "i jel woχəl! ăt tăjlən, pa mija!"
189 met juχət nemli likaśəs. nemli el sajəl lakeməsli, pilip ikija wŏśkəsli.
190 ta wŭji, senaŋ el sajem mosl ki. senaŋ el sajem tŭmpijn̥ neməlti ăt tăjləm. măti ŏt tăjsəm ki, tăta tălaŋ χătl lojti uməś χun?
191 śi jasəŋn̥ pilip iki jastəl: "mŏlti pŏrajn̥ pa jŏχətlən sa ma χŏśema śăʀltəti, ma śi pŏrajn̥ năŋen jastəti jasəŋ tăjləm!"
192 śikemən nemli wana šušməs: "mănem mŭj jăm werilisn̥? năŋ werəm jămlan ma ăt śi watləllam, χŏʟśa ullət. năŋ potltəm potəm χălajen tŭta śi ŏləl. mostal lampa ki, χiri nŏχ! năŋ al pătijn̥ tup tăjəm χoptem χŏʀsəm. tŏwi χŭwat ata χătla imem šukəš tŭm-taka weʀsen, năŋ šăš wŭren ow elti tup pentəs, in neŋen ăl jowl̥məsa."
193 pilip iki śikem śi tarəm as kew χŏrpi nemlti śirn̥ wŭra ăt esələl.
194 met juχət nemli tup tăjəm lajəm šupəl wŏśkəs.
195 ta wŭji, ńelti šek mŏlti sămen χošijl̥ ki!
196 ŏw oləŋ pilip iki śikemən ńuχməs: "tăm lajmen̥n̥ χun χŏlʼmaŋ sŏlkŏwa lăp mănla?"
197 nemli jastəl: "sămen aʟ mănl̥! χutsi mŏlti pa mŏśatləm ki, pa mălem."
198 pilip iki ješa lojlijəs, nemli lăŋkər pelkəl elti χătśəman ńuχməs: "χănəm, uś jŏχətti jŭpijn̥ ma jŭkanema jaŋ χoləpən χutlem ăt jăχlən mosəŋ χolpiti?"
199 nemli ješa lojlijəs, ńuχməs: "jăχti χŏti jăχti! χŭl welti opraśem χun nŏχ kiltəlem? satańem tŭmpijn̥ leti mosl tăln̥! năŋen χŏti mŭj šuk, jik χŭl ki ăt wellən? kewn̥ taśen wot iti mărijəl, asn̥ low taśen mis taśen wot iti mărijəl! ma jik elti neməlti joša ăt pawətləm, tăln̥ lelli χălti wera jil."
200 nemli lajəm-leŋkel wŏśkəmalkemən ńuχməs: "ta ăktaleŋki mir χuli! mŏlti pŏrajn̥ χulta at kerlələt. χŭw ullən, wan ullən, mŏlti pŏrajn̥ karti tosəp χot elti semŋəlan kŭśtijn̥ nŏpsəŋa jŭwəntiln̥!"
201 nemli šăšn̥ kareməmalkemən ńuχməs: "năŋ pa năŋ ula, ma pa ma ulləm. wan tăχajn̥ etlʼija, χŭw tăχajn̥ pentilija. tăm jastəm jasəŋlam tăta at χăślət!", nemli eŋəlməman ńuχməs.
202 śiti ješaśtel elti naj lŏŋti pitəs.
203 śiti ultew elti pa χătl śiti χăśəs, tăm ńălmet χătl śiti χăśəs.
204 šukəš tewən lawəlluw, lawəlluw, wewli pitsuw lawləsman.
205 petra ńăχilijəl: "tewna jiti unti mosəŋ χălʼlʼiti χŏjat χălʼlʼijəl, lʼaksiti χŏjat lʼaksijəl."
206 tewən lawəlman ńańli pitəm χujem ńańli pitəs, ńŏχili pitəm χujem ńŏχili pitəs.
207 opsəm χopət χŏśa χŏj sorəm lŏw lat tăjəs, śi χu jăm us!
208 met juχət sorəm lŏw lat ăntuma jis.
209 jaŋmet χătlewn̥ jetna pelka wotl ješa lăjaləs.
210 mănti lup ńŏχtəln̥, lup - lup pelək; χop ńŏχtəln̥, χop - χop pelək; tŏnti ńŏχtəln̥, tŏnti - tŏnti kar; ul ńŏχtəln̥ - ul šup!
211 opsəm χopət χŏśa tălaŋ pŏrmas ăt χăśəs.
212 ja śi i-χŏś-jaŋmet χătlewn̥ wot il śi pitəs.
213 iśi mălχatl χor loren iśi mătti śel wŏjn̥ šošməm.
214 χor lor wŏlli nŏri χăr χŏrpi, nemlti χŏʟśa śŭk ăntum.
215 in jaŋ χătl lelli śŏrməltijəm joχ-l̥eŋket amtəm rŭweln̥ śărən kŭrəŋn̥ χuχətlʼilət.
216 naj lŏŋəmkemən χopət wasi ŏlŋas iti nik lora χŭwləsət.
217 χor lor pela wantiln̥, χŏʟśa teln̥ i wulti parəš aŋkəl, iśi mătti χor lor aŋkəln̥ seŋkəm.
218 kašəŋ lŭw jušl pela mănl̥.
219 χŏj χujem uśa mănəs, χŏj χujem uś keša laŋki woša mănəs, χŏj χujem lor keša as kurta mănəs, χŏj χujem lŭŋ pŏln̥ welpəsləman χăśəs.
220 oləŋn̥ mănəm χopət jeməŋ ńŏl saja petsət.
221 jurlikem χopət χŏlna χur wŭrn̥ wŭratilət.
222 met juχət min nik măntija leʟsəmn̥.
223 ma kăt šăš lupŋəlam pŏtsəllam, jel śi lowəlməti wŭtśisəm.
224 śikem sem olŋem sojəm păti pela mănəmtəs: ńăl χu leləm wet lŏlpi kărmas kŭt elti ajltaje nik śi χŭwləs.
225 wana šukəš lawəllemn̥, in wet lŏlpemn̥ i lotn̥ tup jik tajn̥ χowijl̥.
226 met juχət lawləsti wewli pitsəmn̥, ŭw śi tŏχeʟ pŏtsəmn̥: "ănta, śi χun χulətl, in χopemn̥ i jel oməsl! χŏj χop măšjajn̥ mŭj ŏšl ul, watti mosl."
227 tŏχi lowəlti śi pitsəmn̥.
228 min mŭjkem wana jŏχətləmn̥, lŭw śikem jel mănl.
229 met juχət śiti măntew elti lora etsuw.
230 lor lŏwatn̥ i wulti nŏwi šăškan pelək!
231 χŏj χujem karteŋ kel jŭwətmal, χŏj χujem juχl̥ ŏχ piln̥ jŭwətmal; jŭwtəm ńolət păslal ŏχn̥ lujətn̥ jărəmət, juχəl jănlal păńar keln̥ jărəmət.
232 "χŏti mŭj kŭlʼ elti śi lŏwatn̥ χŏntalti?", ma iśməslam.
233 in wet lŏlpi jŏχanəŋ iki lawəʀn̥ jik śar pălatn̥ oməsl.
234 jŏχanəŋ iki at jik elti tŏntijn̥ laŋkəm.
235 ješa pŏtreməsuw, kăt χop kăt tăχa pela lowəlməsuw.
236 jŏχanəŋ iki lŭŋ sis luχ jŏr kurta tusa, min măš ŏw kurta lowəlməsmən.